مكتبة أبجدية.. تتهجى الأبجدية فى التنظيم الثقافى - فن وثقافة Feature - كايرو 360
 







مكتبة أبجدية.. تتهجى الأبجدية فى التنظيم الثقافى
مكتبة أبجدية.. تتهجى الأبجدية فى التنظيم الثقافى
اصدرت في: 24/10/2011

"أبجدية" مكتبة موجودة فى شارع طلعت حرب أمام مطعم فلفلة، بدأت فكرتها عند كل أفراد مجموعة الإدارة فى نفس الوقت تقريبًا لكن هند مختار هى اللى بدأت بالسعى للبحث عن مكان قريب من وسط البلد (المكان اللى بـ يجتمع فيه معظم الوسط الأدبى والفنى والصحفى والثقافى بشكل عام) وبالفعل لقيت المكان المناسب وافتتحت المكتبة فى مايو 2011 بالتدبير مع صديقيها حسام جويلى وأحمد صوان.

مكان جديد نسبيًا، لكن انتشر بسرعة كبيرة فى الوسط الثقافى والأدبى، وبقى بـ يروح له كثير من الأدباء الشباب إما علشان يحضروا أمسية أو يقرأوا أعمالهم فى أمسية أو يشتروا كتب، أو حتى يقعدوا فى الكافيه يستعملوا الإنترنت المفتوح عندهم مجانًا.

المكان مش كبير لكن إدارته بـ تعرف كويس كيفية استغلال الأماكن حسب جدول زمنى منظم، عبارة عن 3 قاعات، أكبر قاعة فيهم بـ يتعمل فيها أمسيات شعرية وندوات للشعراء الشباب، وبـ تتعمد إدارة أبجدية اللجوء للبساطة فى الاستعدادات، فمثلاً لما كان المتوقع وجود جمهور كثير فى أمسية كُتاب الأغانى للفرق الحديثة اللى كان ضيوفها رامى يحيى وميدو زهير وإبراهيم عبد الفتاح قررت الإدارة إخلاء القاعة من الكراسى لتوسيعها وكمان الجمهور والضيوف قعدوا على الأرض على "كليم" ملون ومنقوش بألوان ورسومات جذابة، والجو ده طبعًا أضفى على الأمسية نوع من الحميمية والقرب بين الشعراء والمستمعين، وخلال الأمسيات بـ يلاقى الجمهور على جدران القاعة إما معرض لوحات أو معرض إكسسوارات تعمدت الإدارة وضعهم فى مكان الأمسيات علشان جمهور الشعر يسمع ويتفرج على المعرض فى نفس الوقت.

أبجدية مش بـ تقدم شعر فقط، لكن بـ تعمل ندوات فى موضوعات مختلفة وكمان ندوات لعرض ومناقشة الأفلام السينمائية، ومناقشة الكتب زى مناقشة كتاب "يوحنا النقيوس" الصادر عن دار الثقافة الجديدة يوم الخميس القادم 27 أكتوبر واللى هـ يناقشه الأستاذ عزت بولس رئيس مجلس إدارة "الأقباط متحدون" والأستاذ محمد بركة الصحفى بالأهرام.

كمان أبجدية بـ تنظم مسابقة فى شعر العامية هـ تستمر فى تلقى الأعمال المشاركة فيها ليوم 16 نوفمبر، وجوائزها 1000، و500، و250 جنيه، كمان بـ تنظم مهرجان مسرح "الحجرة" واللى بـ تعتمد عروضه على المسرح الصغير والممثل مع استخدام ديكور بسيط جدًا، وبـ يشرف على مهرجان مسرح الحجرة فى أبجدية د. ناصر العزبى.

ده بالإضافة لورشة السيناريو تحت إشراف د. أشرف محمد أستاذ السيناريو فى معهد السينما، وورشة الإخراج تحت إشراف المخرج فخر الدين نجيدة، وورشة الباليه وورشة تعلم الحُلىّ للأطفال وورشة التمثيل وكمان ورشة التجميل اللى هـ تشرف عليها خبيرة التجميل رانيا موسى.

القاعتين الصغيرين فى أبجدية بـ تتعمل فيهم الورش وبـ يتم تأجيرهم للفرق المسرحية لعمل بروفات وكذلك للاجتماعات الصغيرة الخاصة بالشركات مثلاً.

كمان أبجدية بـ تنظمfun day للمدارس أو للحضانات أو الجوامع والكنائس ودور الأيتام، فـ تعمل فيه ورشة رسم للأطفال وورشة حلىّ وممكن كمان تعمل معرض للأطفال بالمنتجات اللى عملوها بنفسهم وبـ تعرض لهم أفلام كارتون فى نهاية اليوم.

وخلال الفترة القادمة أبجدية هـ تنظم رحلات بعنوان "حلوة يا بلدى" لزيارة أماكن تاريخية وأثرية وترفيهية وهـ تعلن عن مواعيد الحجز فيها على صفحتها على الفيس بوك.

نعتقد أن قريب جدًا هـ تضطر إدارة أبجدية أنها تبحث عن مكان أكبر من مكانها الحالى علشان تغطى كم الأحداث اللى هـ تقوم بها وكمان عدد الزوار اللى هـ يحضروها، خاصة أن إدارتها بـ تتكون من مجموعة من الشباب المتصلين بالوسط الثقافى واللى هـ يعرفوا أول بأول إيه الموضوعات المطروحة على الساحة حاليًا ويتعرضوا لها، ودى من أهم الحاجات اللى بـ تضمن استمرار النجاح لأى مؤسسة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هبة حسب
حرر بواسطة:
هبة حسب
تاريخ النشر:
24/10/2011
مدير المكتب الإعلامى لساقية الصاوى، مترجمة وكاتبة قصة على قدها.. وقدها ده مش صغير ده بـ يكبر كل يوم معاها، لخصها العقاد في جملة "عرفت النور ورأيت الجمال ولكنى احترقت".