دليل أحداث نهاية الأسبوع: مدحت صالح ودينا الوديدي وريم البنا وحسن شرارة - الحياة في كايرو Feature - كايرو 360
 







دليل أحداث نهاية الأسبوع: مدحت صالح ودينا الوديدي وريم البنا وحسن شرارة
دليل أحداث نهاية الأسبوع: مدحت صالح ودينا الوديدي وريم البنا وحسن شرارة
اصدرت في: 02/08/2012

بجد النهاردة 14 رمضان؟ وصلنا نصف رمضان بالسرعة دي؟ رغم العطش والحر وأيام الصيام اللي قولنا عليها مش هـ تعدي، فجأة نلاقي نفسنا في نصف الشهر، الوقت بـ يمر بسرعة مذهلة، بسرعة تخلينا نفكر كثير قبل ما نضيع أي دقيقة من غير ما نعمل حاجة مفيدة، لكن للأسف إحنا ساعات بـ نضيع أيام وأسابيع من غير ما نشعر، فـ اللي يقدر يفكر حد بقيمة الوقت ياريت يعمل كده وأهو كله بثوابه.

رمضان كريم وفي النصف الثاني من الشهر بـ تزيد الأحداث الفنية وبـ تزدحم أجندات العروض في كل المراكز الثقافية، وإحنا كان دورنا نركز لكم على أهم العروض وسط الكم الهائل منها في يومين الأجازة اللي جايين، وحاولنا ننوع في اختياراتنا علشان نرضي كل الأذواق.

هـ نبدأ كلامنا عن الليلة دي الخميس بجو رمضاني شرقي جدًا من خلال عرض التخت الشرقي اللي هـ يبقى في المسرح المكشوف في دار الأوبرا المصرية، هـ يحيي الحفل الفنانين وليد حيدر ورحاب عمر والتذاكر متوفرة على الأبواب.

على مسرح الجنينة في حديقة الأزهر وضمن الاحتفالات الليلة في شهر رمضان هـ تقدم المطربة والملحنة الفلسطينية المحبوبة ريم البنا حفل غنائي بمصاحبة فرقتها، حفلات ريم بـ تبقى زحمة جدًا فحاول تروح في ميعاد مناسب بعد الأفطار، والحفل هـ يبدأ الساعة 9:30 مساءً والتذكرة بـ 20 جنيه.

في دار أوبرا جامعة مصر للعلوم والتكنولوجيا MUST هـ يكون فيه حفل للفنانة نسمة عبد العزيز عازفة الإيقاعات وآلة الماريمبا. الحفل هـ يبدأ الساعة 10 مساءً. حاول تحجز تذكرتك قبل ما تروح.

نروح للمعارض الفنية. يوم الأحد اللي فات تم افتتاح معرض جماعي في جاليري كالا في الزمالك لعدد من الفنانين والتشكيليين منهم سمير نجيب، وعادل ثابت، وحسام حسن، ووليد الديب، وصلاح عناني، ومحمد يوسف، ومحمد السيد وعبد العال وفنانين شباب. وهـ يستمر المعرض حتى نهاية شهر أغسطس.

يوم الجمعة على المسرح المكشوف بدار الأوبرا هـ يكون فيه حفل مميز جدًا بـ يجمع بين اثنين من أفضل العازفين في مصر وهم حسن شرارة على الكمان وعماد حمدي على الجيتار. الثنائي قدم حفلات كثير ناجحة والمرة دي بـ يتقابلوا ثاني على المسرح بعد غياب لفترة مش قصيرة.

حفل ثاني قوي على مسرح الجنينة هـ تقدمه الفنانة دينا الوديدي وفرقتها. دينا بـ تغني على موسيقى الجاز والفيوجن، تقريبًا هي حالة غنائية فريدة في مصر، متمكنة جدًا وفرقتها محترفين، هـ تستمتع بحفلة قوية وموسيقى مذهلة.

عودة قوية للفنان مدحت صالح وحفل ضخم هـ يحييه في دار أوبرا جامعة مصر للعلوم والتكنولوجيا MUST يوم الجمعة الساعة 10 مساءً. مدحت هـ يقدم مجموعة من أشهر أغانيه والسهرة ممتدة لحد السحور. أسعار التذاكر 150 و200 و250 جنيه.

يوم السبت هـ يكون فيه عرض لآلة السمسمية وأغاني الفولكلور الساحلية في قاعة النهر بساقية الصاوي، والتذكرة بـ 10 جنيه فقط.

موسيقى الفيوجن جاز لها ناسها ومحبيها، شوفنا فرقة فوق السطوح قبل كده وعجبنا عزفهم وإن كان لسه قدامهم شغل كثير علشان يتقنوا واحد من أصعب أنواع الموسيقى في العزف والأداء. فيه حفل للفريق بساقية الصاوي بقاعة الحكمة يوم السبت الساعة 8:30 مساءً والتذكرة بـ 25 جنيه و20 جنيه لأعضاء الساقية.

عود وطرب وسلطنة مع فرقة مشربيات بقيادة الفنان سيد رفاعي. الفرقة هـ تقدم حفل على المسرح المكشوف في دار الأوبرا المصرية يوم السبت الساعة 8:30 مساءً، والتذاكر متوفرة من على الباب.

فيه عروض ظريفة وحفلات يومية في مراكز ثقافية وفي مناطق الحسين والغورية، ممكن تتابعوا الأحداث دي وتفاصيلها من على أجندة موقعنا وتقرروا هـ تروحوا فين الويك إند ده. رمضان كريم ويارب لياليه يبقى حلوة عليكم.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
02/08/2012
-