دليل أحداث نهاية الأسبوع: أندروميدا وبلاك تيما وحفلات توقيع كتب ومعارض فنية - الحياة في كايرو Feature - كايرو 360
 







دليل أحداث نهاية الأسبوع: أندروميدا وبلاك تيما وحفلات توقيع كتب ومعارض فنية
دليل أحداث نهاية الأسبوع: أندروميدا وبلاك تيما وحفلات توقيع كتب ومعارض فنية
اصدرت في: 28/02/2013
يا سلام على فبراير لما يفاجئنا أجمل مفاجأة بأنه -بعد 28 يوم بس- خلص يوم الخميس مع بداية الويك إند، يعني تقبض المرتب بدري يومين عن المعتاد وتطلع تصرفه في خروجات الويك إند مباشرة، تقريبًا ده اللي إحنا هـ نعمله بالضبط النهارده وبكرة وبعده. بس لو لسه ما قبضتش أو مش بـ تقبض أصلًا ما تضايقش نفسك، هـ نقول لك على حاجات تعملها في الأجازة من غير فلوس خالص، من إمتى كانت متعة الثقافة محتاجة فلوس! المهم روح الانطلاق وتوافر الوقت والمجهود للخروج والتنطيط.
نبدأ بالنهارده الخميس وعدد من الحفلات اللطيفة جدًا "بس بفلوس" زي حفلة فريق روك أند لول في كايرو جاز كلوب. الفريق بـ يقدم موسيقى الروك على كلمات أغاني عربية معروفة من الثمانينيات والتسعينيات وبعض أغاني الأفلام والإعلانات. نفس الألحان على توزيعات مختلفة، وبـ يلبسوا زي نجوم روك الثمانينيات وبـ يقدموا شو أقرب للكوميديا مع شوية موسيقى ظريفة في الخلفية. هـ يعجبوكم. في نفس البرنامج هـ يلعب فريق Crash Boom Bang والحجز ضروري في كايرو جاز ويفضل قبل ما تروح بيوم أو اثنين.
نروح لساقية الصاوي وحفل أوركسترا بيت العود العربي والعازف الأشهر الفنان نصير شمة وحفل بقاعة الحكمة بمناسبة احتفالات الساقية بمرور 10 سنوات على افتتاحها. التذكرة بـ 45 جنيه والدخول الساعة 8 مساءً.
وعلى المسرح الكبير بدار الأوبرا المصرية حفل بمناسبة ذكرى الفنان محمد فوزي يتضمن تقديم مجموعة من أجمل أغانيه وألحانه تقدمه الفرقة القومية للموسيقى العربية. الدخول بالملابس الرسمية.
نروح بقى للحاجات اللي من غير فلوس، دعوات عامة ودخول مجاني لعدد من المعارض وحفلات التوقيع في مراكز ثقافية مختلفة. نبدأ بالمعارض الفنية وأهمهم معرض هـ يتم افتتاحه النهارده وهو معرض صمت الأوتار للفنانة هند الفلافلي في جاليري سفر خان بالزمالك. اللي بـ يتضمن العديد من لوحاتها اللي بـ تركز على المرأة بشكل خاص واعتبارها منبع كل شيء جميل في الحياة.
معرض ثاني تم افتتاحه من يومين هو دعم الدفاع للفنان محمود حلوي اللي بـ يناقش أشكال الحماية الإنسانية وعلاقتها بتطور شكل المدن، تقدر تروح المعرض النهارده في مركز آرت اللوا لأن المعرض أجازة أيام الجمعة والسبت.
وآخيرًا معرض الفنان الدسوقي فهمي في جاليري مصر بعنوان "إيروس"، الافتتاح كان يوم 24 فبراير اللي فات والمعرض مستمر حتى يوم 21 مارس اللي جاي.
وفي مكتبة "أ" فرع مول العرب في السادس من أكتوبر يوقع المؤلف أحمد مراد أحدث أعماله الفيل الأزرق في طبعتها الجديدة. الدعوة عامة طبعًا والدخول الساعة 7 مساءً.
وفي بيت السحيمي في منطقة الأزهر ينظم قطاع صندوق التنمية الثقافية الملتقى الخامس للعروسة الشعبية تحت عنوان "مسرح في كل مكان". تضم الفعاليات عدد من ورش العمل وعرض أفلام وثائقية عن عروض الأراجوز وخيال الظل بالإضافة لمناقشة كتاب الأراجوز المصري في يوم الافتتاح وتُختتم الفعاليات بحفل المولوية المصرية بقيادة الفنان عامر التوني الساعة 7 مساءً.
نرجع ثاني للحفلات الموسيقية ويوم الجمعة الأول من مارس هـ يكون موعد مجانين فريق بينك فلويد وسهرة مع ألبوم Animals وبعض أغاني ألبوم The Wall مع فريق أندروميدا في قاعة الحكمة في ساقية الصاوي. فريق أندروميدا هو أشهر من قدم موسيقى بينك فلويد في مصر في الـ 25 سنة الأخيرة. التذاكر بـ 35 جنيه للأعضاء وغير أعضاء الساقية.
ويوم السبت حفل كبير آخر في قاعة النهر بساقية الصاوي وهو حفل فريق بلاك تيما وده برضه في إطار احتفاليات ساقية الصاوي بمرور 10 سنوات على تأسيسها. بلاك تيما هـ يقدموا حفلتين: أغاني مصرية في قاعة النهر بالساقية، الحفلة الأولى 4 عصرًا والحفلة الثانية 8 مساءً، سعر التذكرة 30 جنيه للحفلة الواحدة.
نتمنى تكون اقتراحاتنا لأجازة الأسبوع ده عجبتكم وتلاقوا حاجة ظريفة تعملوها من خلال ترشيحاتنا، ولو مش لاقيين هنا ممكن تلقوا نظرة على أجندة كايرو 360 اللي فيها كل كبيرة وصغيرة بـ تحصل وهـ تحصل في القاهرة من النهارده لحد أسبوع كمان. نشوفكم على خير.. استمتعوا بوقتكم.
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
28/02/2013
-