دليل أحداث نهاية الأسبوع: سوني رحالة ومسار إجباري وإيلي أوف لندن ومعارض فنية - الحياة في كايرو Feature - كايرو 360
 







دليل أحداث نهاية الأسبوع: سوني رحالة ومسار إجباري وإيلي أوف لندن ومعارض فنية
دليل أحداث نهاية الأسبوع: سوني رحالة ومسار إجباري وإيلي أوف لندن ومعارض فنية
اصدرت في: 07/11/2013

سقف التوقعات كان عالي حبتين فيما يخص الأسبوع اللي إحنا فيه، الأسبوع العاصف اللي هـ يشهد محاكمة الرئيس السابق والقلق اللي خلى الناس ما تنزلش أشغالها يوم الاثنين –ماعدا إحنا طبعًا– وتتوقع أن الأحداث هـ تتفاقم الأيام اللي بعدها لحد الويك إند، لكن الحمد لله ما حصلش حاجة وأدينا في الويك إند وعندنا خطط ظريفة للفسحة والخروج حتى في يوم الجمعة وقبل حظر الساعة 7 اللي خلانا ننسى يوم الجمعة تمامًا ونشيله من حساباتنا وكأن الأسبوع أصبح 6 أيام بس.

نبدأ بالليلة دي وحفلات كايرو جاز كلوب اللي بـ تبقى شكل ثاني يوم الخميس، النهارده فرقة مسار إجباري جايين من إسكندرية، وبـ يوعدونا بمشوية مزيكا ما حصلتش، احجز مكانك بسرعة لأن الحجز ضروري دائمًا في كايرو جاز. 

ساقية عبد المنعم الصاوي فيها حفل أغاني راب عربي للفنان سونى رحالة الليلة دي بقاعة النهر، سعر التذكرة 20 جنيهًا. وفي نفس التوقيت بقاعة الحكمة وزي أول يوم خميس من كل شهر مسرح الساقية للعرائس بـ يقدم حفلات "أم كلثوم تعود من جديد" وسعر التذكرة 10 جنيه و5 جنيه لأعضاء الساقية. 

النهارده وبكرة وبعده تقدر تروح عدد من المعراض الفنية المتميزة اللي لسه فاتحة أبوابها الأسبوع ده، ساقية الصاوي فيها معرض تصوير زيتى للفنانة منال شحاتة حسين، والمهندس محمود شكري بقاعة الكلمة، الدعوة مفتوحة ومواعيد المعارض من 11 صباحًا إلى 8 مساءً، ويوم الجمعة لحد الساعة 5 مساءً.

ومعرض ثاني لتصوير خامات مختلفة للفنانة إيناس سعد في بقاعة الأرض، والدعوة مفتوحة. 

وفي جاليري سفر خان بالزمالك برضه هـ يقدم مصور الفوتوغرافيا باسم سمير معرض خاص لأعماله اللي بـ يلقى من خلالها الضوء على أحوال مصر السياسية والاجتماعية وحالة الفوضى اللي بـ نعيشها. المعرض بعنوان "يا إلهي" بجاليري سفر خان. 

يوم الجمعة كمان ممكن تحضر محاضرة للدكتور نادر الهريدي الأستاذ بجامعة ويلز والمصور الفوتوغرافي في مركز فوتوبيا الثقافي بمصر الجديدة، المحاضرة عن فنون الإعلان والإبداع البصري، للمشاركة لازم ترسل إيميل لـ info@photopiacairo.com والتذاكر متاحة على الأبواب بسعر 40 جنيه وعلى الراغبين في الحضور التسجيل بالبريد الإلكتروني قبل الحضور. لمزيد من المعلومات اتصل بـ 0222904085 أو 01211338991 

يوم السبت بيت الرصيف في المعادي بـ يستضيف اجتماع لمجلة البوسطجي بعنوان "ناويين على إيه" لمناقشة الخطط المستقبلية للمجلة والمحتوى الخاص بها والمساهمات اللي ممكن تحتاجها، لو مهتم بالصحافة والعمل التطوعي شارك فورًا، الدخول مجانًا ولمزيد من المعلومات اتصل بـ 01003277397

وفي ساقية عبد المنعم الصاوي هـ يكون فيه حفل أغنيات مصرية للفنان شادى مؤنس وفرقته "حكايات" بقاعة الحكمة، سعر التذكرة 25 جنيهًا لغير الأعضاء، و20 جنيهًا لأعضاء الساقية. 

ولموود مختلف من المزيكا تقدر تروح جاز مايت في الزمالك وسهرة مع كلاسيكيات الجاز والجاز المعاصر مع النجمة البريطانية Ellie Of London والحفل هـ يبدأ الساعة 8 مساءً ولمدة 3 ساعات.

وممكن تروح أوبيم وسهرة مع دي جي بيدرو وتامر ومورو اللي هـ يلعبوا أجمد تراكات الـ R&B والهيب هوب، وفي سهرة السبت مسموح للسيدات يدخلوا مجانًا زي ما عودنا أوبيم مرة كل شهر، والرجال هـ يدفعوا 150 جنيه رسم دخول، للحجز اتصل بـ 01007319867

هـ نضيف الأحداث الثقافية أول بأول على أجندة الموقع، صحيح الحفلات الموسيقية والمهرجانات بعافية شوية اليومين دول بسبب الأحداث السياسية، لكن هـ نحاول نجيب لكم أي حدث من تحت طقاطيق الأرض علشان مافيش يوم يعدي من غير ما تعرف اللي بـ يحصل في العاصمة من خلالنا، وأجازة سعيدة للكل.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
07/11/2013
-