دليل كايرو 360 لتحقيق مكاسب من الزبالة: افرز في البيت تريح الدولة وتكسب ماديًا - الحياة في كايرو Feature - كايرو 360
 







دليل كايرو 360 لتحقيق مكاسب من الزبالة: افرز في البيت تريح الدولة وتكسب ماديًا
دليل كايرو 360 لتحقيق مكاسب من الزبالة: افرز في البيت تريح الدولة وتكسب ماديًا
اصدرت في: 12/12/2013

"زبالة".. يع! اسمحوا لنا نتكلم المرة دي عن موضوع مقرف شوية، لكن معلش استحملونا، هـ نتكلم عن الزبالة... أه الزبالة، هـ نقترح عليكم شوية حاجات كده لو قدرتوا تعملوها يمكن تكونوا جزء مهم من حل المشكلة الأزلية اللي بـ تعاني منها مصر وزهقت ناس كثير في عيشتها!

في ألمانيا ودول كثير بـ يعرفوا حاجة اسمها "فرز من المنبع" يعني ببساطة الناس من البيت بـ تقسم زبالتها في أكثر من كيس: واحد للبلاستيك، وواحد للزجاج، وواحد للورق، وواحد للمواد العضوية وباقي الزبالة، بالتالي الشركات اللي بـ تجمع الزبالة بـ يكون سهل عليها تدور الزبالة، وجمعها بدون أزمات... هنا بقى في مصر حدث ولا حرج، كله على بعضه من غير تمييز، والأصعب أن الدولة عمالة تجمع فلوس نظافة، وفيه كلام أنهم هـ يزودوها!

فيه جهات كثير بـ تشتري الزبالة المفروزة بـ "الكيلو" يعني لو فيه مكان مناسب تقدروا تحوشوا فيه الزجاجات البلاستيك، والزجاج، والورق ممكن توفروا ثمن فاتورة الكهرباء، أو على الأقل الجزء الخاص بالزبالة فيها! خلال السطور الجاية هـ نقول لكم على مجموعة من الناس اللي بـ تشتري الزبالة، منهم ناس بـ تشتري البلاستيك بس، ومنهم ناس بـ تشتري الزجاج بس، ومنهم ناس بـ تأخذ المعادن والألمونيوم، ومنهم ناس بـ تشتري كل شيء، هـ نعرض لكم الأسعار والتفاصيل، والاختيار لكم.

 

هيبكو إي جي.. كل حاجة

ده مصنع كوري في المنطقة الصناعية الثالثة لتدوير القمامة، مديره حب يعمل حاجة مبتكرة شويتين، فكرة أنه بدل ما يشتري من وسطاء، قرر يروح بنفسه للمنبع ويوعي الناس بضرورة الفرز من المنبع، الأستاذ وليد منير مدير المصنع بدأ مؤخرًا يعمل ملصقات وإعلانات بسيطة تنصح القائمين على المدارس والجامعات في 6 أكتوبر أنهم يحافظوا على أموالهم، وما يرموهاش في الشارع، ويبيعوها له.

أستاذ وليد ومصنع التدوير بـ يشتروا زجاجات الزيت، والمياه المعدنية، والكوكاكولا والبيبسي والكانز الفارغة، كمان بـ يشتروا الكرتون والورق المستعمل، وزيوت التحمير بالكيلو، وكل ده له تسعيرة خاصة.

كيلو البلاستيك بـ 2 جنيه، والكانز بـ 3 جنيه، والكارتون والورق بـ 50 قرش، وزيت التحمير المستعمل المصفى بـ 2 جنيه للكيلو.. طبعًا مع الكميات الكبيرة، ولو فيه إمكانية للاتفاق مع باقي السكان، في رأينا أن الحصيلة ممكن يكون لا بأس بها.

لو عجبتكم الفكرة، وكنت من سكان أكتوبر أو الأماكن القريبة منها، وجمعتوا كمية كويسة، ممكن تتصلوا بأستاذ وليد على رقم 01090172831.

 

سمير عرابي.. كانز وألومنيوم

في شبرا الخيمة، فيه تاجر كبير اسمه سمير عرابي، متخصص في شراء زجاجات الكانز وأي حاجة ألومنيوم، لو كلمتوه هـ ييجي لحد عندكم والسعر مغري جدًا جدًا.

لو تعاونتم كسكان عمارة أو منطقة، أو حتى مجموعة أصدقاء، على جمع كل الكانزات والحاجات الألومنيوم اللي بـ تتعاملوا معاها وجمعتم نصف طن أو طن كل فترة، هـ تقدروا تأخذوا مقابل كبير جدًا، سمير عرابي بـ يقول لكم: "الكانز أو علب الحاجات الساقعة التجار بـ يجمعوها من المخلفات أو الشوارع زي ما يكون، وبـ يجمعوا معاها ورق الألومنيوم "السيلوفان" اللى بـ نلف به الأكل وبـ يجمعوا معاه الطبق الألمنيوم بتاع الطواجن اللى بـ ييجي فيه الأرز باللبن أو طاجن المكرونة، الثلاثة عناصر دول اسمهم "شغل كانز خليط أو شغل صوالا" بـ نشتري الطن ثمنه داخل القاهرة 6500 وخارج القاهرة 6250، لكن لو تم فرزه وأصبحوا ثلاث أنواع علب الكانز لوحدها والطبق لوحده والورق الألومنيوم لوحده كده كل حاجة بـ يكون لها سعر، الكانز لوحده بـ 7000 جنيه داخل القاهرة و6750 خارج القاهرة، والطبق الألومنيوم بـ 7000 جنيه داخل القاهرة و6750 خارج القاهرة، والورق الألومنيوم 3000 جنيه للطن وده بـ يكون كميته صغيرة تتراوح بين 100 لـ 70 كيلو فى الطن.

سمير بـ يقول أنه بـ يشتري كل الأنواع، وبالكميات، من أى مكان خارج أو داخل القاهرة، لو عجبتكم الفكرة، وحبيتوا تعملوا دخل لطيف من حاجات بسيطة ممكن تتصلوا بسمير عرابي 01027890334.

 

المهندس تامر خليل.. والورق

الورق في البيوت كمياته مش طبيعية، نقدر نقول أطنان، كراسات وكتب دراسية، وغيرها منتجات ورقية كثير الواحد بـ يرميها وبـ تختلط بباقي المخلفات العضوية، فما بـ تبقاش صالحة للاستخدام أوي بعد كده زي ما تروح لمصنع إعادة التدوير على طول من المنبع، فيه تجار عندهم استعداد يشتروا الزبالة ككارتون والورق بكل أنواعه، من الناس دول المهندس تامر خليل اللي بـ يجمع الورق بكل أنواعه، ويوصله لمصانع التدوير، كايرو 360 بـ تشجع فكرة الفرز من المنبع، لو كنتم في بيت عائلة، أو عمارة سكنية وقادرين تتواصلوا مع بعض، ممكن تتفقوا، وتجمعوا الورق والكارتون مع بعض وكل فترة تتصلوا بالمهندس تامر تتواصلوا معاه وتبيعوا الورق له، هو مستعد يتقبل أي كمية، في العادي بـ يقبل طن كحد أدنى، لكنه قال لنا: "لو جاء لي كيلو في اليوم أنا موافق، أسعار البيع 800 جنيه للطن، و80 جنيه للكيلو.

الورق اللي يقصده المهندس تامر هو الورق بكل أنواعه سواء مكتوب، أو دشت، أو جرائد، أو بواقي الكرتون وورق التصوير وكل حاجة، الكتب القديمة، مكان المهندس تامر في مدينة السادات، في المنطقة الصناعية، والعيب الوحيد أنه محتاج الناس تروح لحد عنده تعطى له الحاجة، لكن الدفع فورى، لو عجبتكم الفكرة وشايفين أن بـ يكون عندكم ورق كثير بـ يروح في الزبالة ممكن تتواصلوا مع المهندس تامر على رقم 01110120145 وتتفقوا معاه.

 

الزجاج.. يعني مصنع العبور للزجاج

الزجاج من أكثر العناصر الثقيلة، تجميع كمية منه أمر سهل، مع كميات الزجاج اللي بـ نسخدمها، ونرميها بعد شرب العصير، أو المشروبات الغازية، أو الأدوية، كل ده بـ يشتريه المهندس يسري السنطاوي اللي شغال في مصنع مصر للزجاج، وبـ ينقسم المنتج لزجاج عسلي، وأخضر وأبيض ومحروق.

الشوال الواحد من الزجاج -بحسب المهندس يسري– بـ يساع 50 كيلو بـ 25 جنيه، لو عمارة كاملة تعاونت وجمعت إنتاجها في شهر، أو شخص واحد عنده مساحة تخزينية مناسبة لجمع كميات كافية من الزجاج على مدار مدة طويلة، تقدروا تبيعوا الطن بـ 500 جنيه، المهندس يسري بـ يقول أن الشغل على الزجاج الملون (أخضر وعسلي) متوقف مؤقتًا، لكن الإقبال أكثر على الزجاج الأبيض، لو مهتمين بالموضوع تقدروا تروحوا على عنوانهم في 8 المدينة الصناعية، مدينة العبور، وتليفونهم 0246103911 (5 خطوط).

 

المخلفات العضوية... هي كمان لها فائدة!

كل المخلفات الصلبة لها مشترين ومقابل مادي، العنصر الوحيد في زبالة كل بيت اللي مغضوب عليه وما حدش بـ يحبه أو يحب يتعامل معاه ولا له مشترين هو " القمامة العضوية".. يعني بواقي الأكل، ودي العناصر اللي بـ تعمل رائحة غير لطيفة وبـ تبوظ باقي العناصر لو معاها، إحنا في كايرو 360 دورنا كويس وحاولنا نعرف هل فيه حد ممكن يأخذ المخلفات دي، للأسف بشكل عام مافيش حد بـ يحب ولا بـ يحتمل يتعامل معاها، لكن المفاجأة أننا اكتشفنا المهندس محمود جابر اللي دلوقت شغال على مشروع للاستفادة من المخلفات العضوية، واللي بـ يشتغل على تدريب الشباب على الاستفادة من المخلفات دي في إنتاج "بيوجاز"، تكلمنا معاه وقال لنا أنه كمان شهرين بالضبط هـ يكون جاهز أنه يأخذ المخلفات العضوية وينتج منها الغاز اللي يشبه الغاز الطبيعي وطبعًا هـ يحتاج مساعدة ناس كثير في أنها تمده بالنوع ده من المخلفات.

الفارق الوحيد بين العنصر ده وبقية العناصر اللي موجودة في القمامة، أنه مش هـ يكون بفلوس، لو حابين تتبرعوا به للمهندس محمود هـ يكون مساهمة طيبة منكم، لأن المهندس محمود جابر نفسه بـ يتبرع بوقته وجهده وعلمه في تدريب الشباب على كيفية بناء مخمرات وإنتاج غاز البيوجاز، وهو مشروع بالكامل قائم على التطوع بداية من الناس اللي بـ تعلم الشباب الطريقة، مرورًا بالمعدات اللي قائمة على تبرعات جمعيات أهلية انتهاءً بالمنتج اللي هـ يشغل شباب كثير مش لاقي شغل.

لو مهتمين بالفكرة، أو حتى حابين تنضموا بفريق عمل المهندس محمود وتتدربوا ويكون عندكم المشروع ده تقدروا تتواصلوا معاه على الصفحة دي، لو مهتمين ابعثوا رسالة وهو هـ يرد عليكم مباشرة، هم دلوقت في مرحلة التدريب والتحضير، وبعد شهرين هـ يبدأ المشروع اللي هـ يوفر كميات بيوجاز كويسة تقدر تشغل مصانع الطوب، ومزارع الفراخ وغيرها من المشروعات اللي بـ تحتاج طاقة كبيرة وبـ تصرف مصاريف باهظة عليها.

مزيد من الصور
  • دليل كايرو 360 لتحقيق مكاسب من الزبالة: افرز في البيت تريح الدولة وتكسب ماديًا
  • دليل كايرو 360 لتحقيق مكاسب من الزبالة: افرز في البيت تريح الدولة وتكسب ماديًا
  • دليل كايرو 360 لتحقيق مكاسب من الزبالة: افرز في البيت تريح الدولة وتكسب ماديًا
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/12/2013
-