أولًا لازم نبدي إعجابنا وانبهارنا للمرة الثانية بتصميم مول صن سيتي بمساكن شيراتون، المبنى مكون من 5 طوابق تحت الأرض؛ بمعنى أنك تبقى في الدور الخامس المخصص للمطاعم وتبقى شايف الطريق على نفس مستوى قعدتك من نوافذ المكان. ده غير المساحات الكبيرة والروقان اللي بـ يحظى به المول وساحات انتظار السيارات العديدة حول المكان، فكل زيارة للمول ده نكتشف فيه حاجة جديدة تحببنا فيه أكثر.
المطعم اللي زرناه المرة دي هو «سانو لاونج»، وهو مقسم لجزئين: مكان مغلق مكيف يتميز بالأناقة الشديدة والأضواء الخافتة باللون الأزرق وقعدات مريحة وواسعة، والجزء الخارجي المفتوح عبارة عن تراس بـ يطل على الشارع من بره وفيه قعدات أشبه بقعدات الأندية الرياضية والحدائق، وهنا مسموح تدخن أو تشرب شيشة. بس اللي لاحظناه أن الفرق كبير في الشياكة بين الجزئين الداخلي والخارجي لصالح الداخلي طبعًا.
لوجو المكان وطريقة الكتابة عليه وكلمة "سانو" نفسها أعطتنا طابع آسيوي للمكان، وبدأنا نصدق إحساسنا لما دخلنا المكان ولقينا كل العاملين لابسين غطاء الرأس المميز للعاملين في مطاعم السوشي والمطابخ الآسيوية، لكن المفاجأة لما سألنا الجرسون عن نوع المطبخ وقال لنا أنه إيطالي! طيب ليه اللوجو ده! واللبس ده! لكن لما شوفنا المنيو كمان لاقينا أنه مش إيطالي بس، لكن هو مطبخ عالمي عادي زي الموجود في أي مطعم أو كافيه، يعني حتى كلمة "لاونج" كانت مش دقيقة. يعني نقدر نقول أن أصحاب المكان كانوا عاوزين يعملوا كل حاجة في مكان واحد وما قدروش يعملوا شخصية مميزة للمكان، لكن اللي نفعهم الديكور الأنيق والقعدة الحلوة اللي مش هـ تخليك تدقق في التفاصيل وهـ تحب تقضي وقت طويل هناك.
طلبنا طبق مقبلات "سانو" (49 جنيه) اللي كان شكله يجنن في المنيو وكان لذيذ فعلًا وكل حاجة فيه مقرمشة وفريش زي أصابع الموتزاريلا والسبرنج رولز والبطاطس المخبوزة وستربس الدجاج، حتى البافلو وينجز اللي أماكن كثير بـ تعمله مش حلو كان مضبوط جدًا هنا. من منيو الأطباق الرئيسية جربنا ستيك فيليه تقليدي Traditional Fillet Beef وكان سعره 79 جنيه واختارنا معاه صوص البلو تشيز وأرز وبطاطس محمرة، لكن الطبق خيب ظننا من حيث الكمية أولًا والطعم ثانيًا، وحسينا أن اللحم كأنه متسخن مش طالع فريش من على الجريل، وكان باين من رائحته أنه مش فريش كفاية. طبق رئيسي ثاني من اللحم البتلو المقلي بخلطة الكانتري الذهبية Country Veal & Chicken وده بـ 74 جنيه وكان حلو فعلًا وطريقة القلي بالخلطة اللي شبه خلطة البانيه العادية كانت ظريفة وحسينا بطعم التوابل واللحم والدجاج هنا كان فريش ومستوي كويس. بس الدجاج هنا هو نفس طعم قطع الستربس في طبق المقبلات، علشان لو مش عاوز تكرر نفس المذاق. السوتيه والبطاطس البيوريه حلوين، الأرز والبطاطس المحمرة مش حلوين، ده بالنسبة للأصناف الجانبية.
منيو حلويات ظريف ومتنوع، حبينا نجرب تيراميسو الشوكولاتة (24 جنيه) طلع مش موجود، فجربنا فادج شوكولاتة (19 جنيه) وطلع يجنن لحسن الحظ. وجربنا كوكتيل "سانو" المميز من المانجو والموز والفراولة والآيس كريم (19 جنيه) وكان لذيذ ومنعش رغم أنه مش مثلج زي ما كنا متوقعين.
منيو «سانو لاونج» فيه بيتزا وباستا وفاهيتا وبرجر وسلاطات وشوربات وحلويات وكل المشروبات الباردة والساخنة، يعني جايز إحنا حظنا طلع مش تمام في حاجات طلبناها، لكن حظكم ممكن يطلع كويس وتلاقي في المنيو العريض ده حاجات تعجبكم. الخدمة كمان جيدة جدًا وسريعة، واهتم مدير المحل أنه يسألنا عن رأينا في الأكل وقولنا له بصراحة ملاحظتنا اللي ذكرناها فوق وتقبلها بصدر رحب طبعًا مع بعض الاعتذارات اللي أحرجتنا إحنا بشدة.
«سانو لاونج» مكان جميل لأي نوع من الخروجات، وأسعاره كـ "كافيه" ظريفة وفي متناول الجميع، لو كنت بـ تدور على مكان جديد تريح فيه بعد جولة تسوق في صن سيتي مول أدينا عرفناك على «سانو لاونج».