جيزة كافيهات in Cairo, Egypt

كافيهات

كوكيز أن مور: خدمة توصيل ما لذ وطاب من المخبوزات
اصدرت في: 19/07/2014

عاوز تعرف أحسن طريقة تنهى بها اشتياقك للأكل؟ تناول كمية محترمة من الكوكيز. "كوكيز أن مور - Cookies 'N More" - أحدث إضافة لمخابز القاهرة المميزة اللى بـ يقدم خدمة التوصيل فقط- وصل وهدفه يكافئنا بمخبوزات لذيذة فريدة من نوعها تشبع شهيتنا للحلويات. مع تقديمه لتشكيلة متنوعة من الكوكيز، والبراونيز، والكيكات، والكب كيكس، والمافينس والبسكويت، وكلهم مخبوزين بمكونات طازجة، كوكيز أن مور كمان بـ يقدم اختيارات أكثر صحية من الدقيق المطحون، والشوفان، والفواكة، والمكسرات والخضروات مع منتجات خالية من الجلاتين. كل الطلبات بـ تتكون من دستة أو أكثر؛ طلبنا كوكيز بالزنجبيل (40 جنيه)، كوكيز الشوفان بالزبيب (50 جنيه)، تشوكليت تشيب كوكيز (50 جنيه)، وكمان دوبل تشوكليت تشيب كوكي (50 جنيه) وعدد 12 قطعة من البراونيز بالشوكولاتة (70 جنيه). الطبيعى أن الطلبات بـ تتعمل قبلها بيوم، لكن حيث أننا طلبنا فى وقتها، تحضير الطلب احتاج وقت أطول من المتوقع. كنا نتوقع تعبئة أفضل من كوكيز أن مور، كونه قائم على خدمة التوصيل فقط؛ علب كارتون محبطة وغير جذابة مقفولة بشريط لاصق. داخل كل علبة موجود كل طلب من طلباتنا ملفوف فى ورقة بلاستيكية، حاجة تشبه كوكيز الكريسماس. اوعى التغليف يخدعك! بدأنا أول حاجة بالتشوكليت تشيب كوكيز، وفوجئنا بطريقة تنفيذها الرائعة؛ مقرمشة بشكل رائع من الخارج وطرية من الداخل، مع كمية مضبوطة من قطع شوكولاتة ممتلئة. رغم أن طعمها يشبه التشوكليت تشيب كوكيز التقليدية، ومافيش فارق ملحوظ، فيما عدا بقع من الزبدة باقية على أصابعنا، لازم نقول أن قطع الشوكولاتة نفسها كانت مثالية، لا هى مسكرة بزيادة ولا حادقة بزيادة، وسواء كانت شوكولاتة محلية أو من ماركة شهيرة، تستحق كل التقدير. رغم أن كوكيز الشوفان والزبيب مش طلب ثابت، السناكس الحلوة الصحية تعتبر دائمًا المنقذ لكل الملتزمين بحمية صحية وعاوزين حاجة لذيذة وفى نفس الوقت سعراتها الحرارية قليلة. كوكيز الشوفان من "كوكيز أن مور" تعتبر السناك المثالى، على الرغم أنها ينقصها الزبيب وكان فيها شوفان كثير جدًا. الجينجر سنابس، هى عبارة عن خليط من الزنجبيل والقرفة، لعشاق الزنجبيل وبس. طريقة طبخ الكوكيز هى هى، لكن الزنجبيل والقرفة طعمهم بـ يفضل مستمر معاك بشكل ممكن يضايقك لو مالكش فى الزنجبيل. لازم كمان نتكلم عن براونيز الشوكولاتة، بحجمها الكبير، مع سطح ناشف وقلب طرى لذيذ، البراونيز دى فعلاً مبهرة. صحيح أغلب البراونيز بـ تسبب لنا تخمة وتعب بسبب طعم الشوكولاتة المسكر، براونيز كوكيز أن مور كانت خفيفة والشوكولاتة معقولة، تقدر تأكل مئات منهم وتفضل مستريح. بعد ما تأكل كل اللى فات ده ولسه عاوز تجرب الدوبل تشوكليت تشيب كوكيز، نحب نقول لك ده انتحار يا كوتش، بس لو عاوز تنهى اشتياقك للحاجات الحلوة، جرب قضمة منها وكده يبقى تمام. الكوكي كانت مليانة داخلها بكل أنواع الشوكولاتة، ومن خارجها قطع شوكولاتة ممتلئة على الوش، لازم نعترف أنها مناسبة لعشاق الشوكولاتة الحقيقيين. بشكل عام، كوكيز أن مور نجح فى إبهارنا، وصحيح هو مش اختيارنا اليومى لما نتكلم عن المخبوزات، لكننا ننصح به فى المناسبات الخاصة.

...

الدمياطي: كل ما تتمناه فى عالم الحلويات فى المنيل
اصدرت في: 29/11/2012

حلويات؟!.. مش الدمياطي ده بتاع فول وطعمية؟ لأ خلوا بالكم.. إحنا مش بـ نتكلم هنا على "التابعي الدمياطي"، ده محل حلويات اسمه "الدمياطي" فى ميدان الباشا فى المنيل، تاريخه من سنة 1950 ومحقق نجاح لحد دلوقت وعامل اسم لنفسه فى السوق بقوة من ساعتها وله 5 فروع فى ميدان الجيزة، ومدينة نصر، والمنيل وأكتوبر والبحر الأعظم.المحل له موقع على الإنترنت وفيه معلومات عن تاريخهم ومنيو بالحاجات اللى بـ يقدموها بس الغريب أن مش مكتوب أسعارها خالص، وبالتالى لو عاوز تعرف المعلومات دي لازم تزورهم وتأخذ المنيو المطبوع وأهى فرصة تشوف بنفسك جودة الحلويات اللى بـ يقدموها.المحل حجمه ضخم وواخد مساحة محترمة فى الميدان وبالتالى أنك تدور عليه مش هـ يكون أزمة بتاتًا، المكان بـ يتكلم عن نفسه وخاصة أنك كمان هـ تلاقى كام ترابيزة وكام كرسي فيرفورجيه محطوطين بره للى حابب يطلب حاجة ويأكلها، بس الفكرة دي ما عجبتناش شوية لأنها ببساطة على رصيف أو ساحة فى الشارع ومافيش خصوصية، كل اللى رايح واللى جاي كأنه معاك على الترابيزة.هـ تلاقى هناك كل حاجة لها علاقة بالحلويات الشرقية والجاتوهات والمخبوزات وكمان فيه قسم لعمل الفطائر والبيتزا أمامك، وأطباق الشوكولاتة والتورتات (العادية والآيس كريم) وكمان الآيس كريم نفسه. الناس هناك خدومين ومبتسمين ماعدا واحد بس اللى على الكاشير!المحل له بابين فى الواجهة للدخول والخروج، أول ما تدخل على إيدك اليمين هـ تلاقى كاونتر زجاجى طويل فيه ما لذ وطاب من الحلويات الشرقية اللى شفناها وعارفينها قبل كده والجديد منها كمان اللى أول مرة نسمع اسمه.. فيه أطباق جاهزة أسعارها 48، و52 و70 جنيه وممكن أنت تعمل تشكيلة من اختيارك بالوزن وهو بـ يحسب لك السعر النهائي للأنواع اللى أنت أخذتها. بعدها فى الواجهة هـ تلاقى ركن عمل البيتزا والفطائر الحادقة والحلوة (الحاجة الوحيدة اللى لها منيو، الباقى يا إما مكتوب عليه يا إما هما بـ يجاوبوا على أسئلتك)، أسعار البيتزا الصغيرة 10 أو 15 والمتوسطة بـ تتراوح من 15 لحد 24 جنيه والكبيرة من 26 لحد 35 جنيه. الفطائر الحادقة يا إما تأخذها ملفوفة زي الساندويتش (من 7 لـ 17 جنيه) أو تأخذها فطيرة عادية بحجم وسط (من 12 لـ 18 جنيه) والكبير (من 25 لـ 40 جنيه)، والفطير الحلو فيه بالكريمة، وبالسكر، وبالشوكولاتة، والمكسرات والأسعار برضه فى نفس النطاق. بعد كده هـ تلاقى أرفف للسقف عليها أنواع عيش ومقرمشات ومخبوزات بأسعار لطيفة، باتيه الجبنة الرومي (3.25 جنيه) وبيتزا مدورة حجم صغير (3 جنيه)، وفى المنتصف هـ تلاقى قسم معروض فيه أطباق صغيرة أم على وأرز باللبن ومهلبية وعاشوراء، وجنبها أطباق البيتي فور الجاهزة أو بالكيلو بأسعار 50 جنيه لكيلو العادي و60 جنيه للبيتي فور السواريه، للأسف هنا مش هـ تقدر تأخذ بالكيلو دائمًا لأن المتاح هنا أطباق جاهزة بس لأنهم بـ يجهزوها كده من بدري وقليل ما هـ تلاقى سايب تأخذه بالكيلو.جنبهم كمان فى المنتصف ثلاجة آيس كريم فيها أصناف مختلفة، وكمان فى ظهرها ثلاجة تورتات آيس كريم أشكالها لطيفة، ولأول مرة نشوف هناك صواني شوكولاتة للمناسبات مكتوب عليها تاريخ صلاحية! عجبتنا قوي، الصلاحية لمدة 90 يوم وفيه بالكيلو وفيه ممكن تجيب صينية كاملة، وكل التفاصيل مكتوبة على الطبق.فى الجنب الثاني القسم اللى بـ تستلم منه حاجتك ويليه قسم التورتات والجاتوهات والساليزون، التورتات بـ تتراوح أسعارها من 65 لحد 120 جنيه، الجاتوه القطعة إما بـ 5.5 أو 6 أو 8 جنيه، الساليزون المشكل (1/2 كيلو بـ 40 جنيه) وبـ يكون أطباق جاهزة برضه، وفيه ستاند فيه شموع وأشكال لطيفة بـ تتحط فى التورتات للاحتفال بالمناسبات المختلفة.طلبنا بيتزا سوبريم (وسط بـ 24 جنيه) عبارة عن صوص طماطم وموتزاريلا ومفروم لحم ومشروم وسوسيس وفلفل أخضر وزيتون، وكمان جربنا فطيرة بالمكسرات (حجم صغير بـ 10 جنيه) اللى بـ تتكون من كريمة ومكسرات مشكلة وعسل وسكر وسمن، تحضيرها أخذ حوالى 20 دقيقة، البيتزا كانت حلوة جدًا، حظنا السيء بس جاء فى فلفل مشطشط شوية، تعليقنا الوحيد بس أننا بـ يستحسن –بالنسبة لنا- أن ما يكونش فى البيتزا لحم مفروم لكن عامة طعمها كان كويس، فطيرة المكسرات كانت مردومة مكسرات وزبيب لكن ما كانش فيها ريحة أى كريمة وبالتالى كانت كل مكوناتها ناشفة وما عجبتناش قوي، غير أنها كانت ملسوعة شوية من تحت.أخذنا كمان ¼ كيلو حلويات شرقية مشكل (7.5 جنيه) وكانت حلوة قوي، وعندهم هناك أصناف غريبة ما سمعناش عنها وكمان ما عرفناش نحفظ اسمها من صعوبته، من ركن المخبوزات اختارنا واحدة باتيه بالجبن الرومي وواحدة بيتزا مدورة والاثنين كانوا أحلى من بعض، أى نعم البيتزا ما كانتش غير صلصة وجبنة رومي وزيتون غير ملحوظ لكن معمولة بحرفية وعجبتنا.الإغراءات كثيرة فى المكان هناك، والاختيارات مالهاش نهاية وفوق كل ده الأسعار معقولة جدًا بالمقارنة بأماكن ثانية بـ تغالى فى أسعارها، لو عندك مناسبة وحابة تقدمي أصناف متنوعة لضيوفك أكيد هو ده المكان المناسب.. بس خلوا بالكم من وزنكم.

...

لارين دوريه: ساندويتشات وأطباق وأكلات شعبية تيك أواي فى المنيل
اصدرت في: 21/11/2012

من وإحنا صغيرين بـ نحب الآيس كريم بتاعه وكان دائمًا أهلنا بـ يقفوا عنده علشان نختار من تشكيلة البولات اللذيذة بتاعته الموجودة فى كشك ألوميتال صغير مرفق بمحل الحلويات «لارين دوريه – La Reine Doree» الموجود فى شارع عبد العزيز آل سعود فى المنيل، ده غير أننا كنا بـ نتردد على المحل نفسه علشان نشتري أطباق حلويات شرقية أو تورتات لو عندنا مناسبة أو رايحين نزور حد عزيز علينا.الفكرة بقى أننا اكتشفنا من فترة أنهم فتحوا فى الكشك الألوميتال ده شباك ثاني جنبه وفيه ممكن تأخذ طلبات تيك أواي لساندويتشات شاورمة ولحوم وفراخ (مافيش مكان للجلوس كله ع الواقف أو فى عربيتك)، فيه يافطة حمراء كبيرة عند الشباك فيها أنواع ساندويتشات كثيرة بأسعارها اللى بـ تتراوح بين 4 للحجم الوسط و15 للحجم الكبير، لكن المفاجأة لما بصينا فى المنيو الورق لقينا أصناف كثيرة جدًا وأطباق فرنسية ومشهيات وطواجن وشوربات وأكلات شعبية زي شوربة الكوارع والفتة ولحمة الرأس وكمان طلبات بالكيلو، استغربنا جدًا إزاى الحاجات دى كلها بـ تجهز فى المكان الصغير ده، لكن حيرتنا راحت أول ما عرفنا أن لهم مطعم فوقهم فى الدور الثاني –بس مش واضح- فيه قعدة وممكن تطلب فيها الطلبات دي، يعني من الآخر الساندويتشات بـ تتجهز فى الكشك الصغير تحت والأطباق فوق.أسعار الساندويتشات والحلويات فى المنيو زي ما هى لكن لو طلبت من قائمة الأطباق بـ يتم إضافة 10% ضريبة مبيعات، طلبنا نجرسكو بالفراخ (12 جنيه) رغم أنها كانت فى الشيك بـ 13 جنيه، مش عارفين! شكل أسعار المنيو مش نهائية؛ فاسأل قبلها برضه احتياطى. وكمان أخذنا ساندويتش لارين (حجم وسط بـ 10 جنيه) وده عبارة عن تشيكن رول مع مايونيز وخس، وباكيت بطاطس (2.50 جنيه)، ومن الأطباق شدنا سكالوب ناتير بـ 35 جنيه (بعد إضافة الضريبة 38.50) وهو عبارة عن شرائح بتلو مع صوص المشروم، وفى الأطباق بـ تختار ينزل معاها ورق عنب ولا أرز ولا مكرونة ولا بطاطس فاختارنا ورق العنب، وللتحلية أخذنا أم على بـ 5 جنيه (قرع العسل والأرز باللبن والبودنج والكريم كراميل كلهم بنفس السعر).الأكل ما أخذش وقت كثير قوي فى التحضير، الساندويتش والبطاطس وأم على جاءوا أول حاجة وبعدها بشوية جاء لنا النجرسكو والسكالوب من المطعم اللى فوق. أخذنا الأكل وروحنا بيتنا والأكل مازال محتفظ بسخونته، النجرسكو كانت رائعة، البشاميل كان كريمي والفراخ مستوية كويس وسخنة ولقينا كمان مع الفراخ قطع مشروم بـ تقدم فى طبق ألومنيوم صغير، السكالوب ناتير كان مستوي كويس وكميته معقولة مع 8 أصابع ورق عنب، العيب الواضح في صوص السكالوب أنه كان مملح زيادة، أرز ورق العنب كان مستوي لكن الورق نفسه كان ناشف استعجلوا عليه شوية، ساندويتش التشيكن رول أو لارين كان حلو قوي، الرول كان مقطع حلقات وشكل الحشو من داخله يفتح النفس، الساندويتش كان حشوه كثير مع الخس الطازج، كان لطيف جدًا، البطاطس مقرمشة ولطيفة لكن العيب الأكبر اللى فى وجه المحل أنهم حطوا لنا أكياس كاتشب ملزقة بوظت لنا أيدينا ومش فاهمين من إيه، وشكل ده الطبيعي عندهم لأن وإحنا هناك كان الولد بـ يطلع زيهم من الكيس علشان يستعملهم، مش فاهمين إزاى كده!!أم على كانت على عكس ما إحنا متعودين باردة من الثلاجة مش ساخنة، بس سكرها كان مضبوط وكميتها كويسة، الخدمة مش محترفة قوي لكن الولد اللى حضر لنا الطلب لطيف ومهذب، ممكن بعد الأكلة الدسمة دي تقفل بآيس كريم من الشباك اللى جنبه، هـ تلاقى أصناف جامدة هـ يعجبك طعمها وسعرها، وخلى بالك فيه أماكن ثانية اسمها "لارين" بس المحل مالوش فروع ثانية.

...

فرانكو كوفى: كافيه محتاج تضبيط كثير فى الهرم
اصدرت في: 07/05/2012

بقالنا كثير ما تضايقناش كده من مكان جديد رحناه، بس مش مشكلة، مش كل التجارب لازم تكون زي بعضها، وزي ما بـ يقولوا "يوم لك ويوم عليك"، للأسف تجربتنا المرة دي أكدت لنا فكرة مقتنعين بها، "شارع الهرم مش مناسب للكافيهات والمطاعم"! في شارع ناصر الثورة وأمام مطعم "مؤمن" هـ تلاقى كافيه من دورين كبير زجاجه أسود واسمه بالإنجليزي كبير «فرانكو كوفى – Franco Coffee» وكمان مكتوب أنه "Luxury Coffee Lounge"، المهم دخلنا بعد ما عرفنا من ناس أنه مكان لطيف، لكن تجربتنا فى المكان كانت عكس كده تمامًا. المكان كئيب من الداخل، الدور اللى تحت مقسم لكذا قعدة، فى أجزاء كنب وترابيزات صغيرة وفى أجزاء ترابيزات وكراسي عالية، الدور اللى فوق صاخب أكثر شوية وفيه سماعات وأجهزة علشان اللى حابب يغني كاريوكي، المكان نفسه بـ يغلب عليه اللونين الأحمر والأسود مع الإضاءة الخفيفة ولد لنا الإحساس الكئيب اللى حسيناه. قعدنا على الترابيزات والكراسي الطويلة اللى فى مدخل الكافيه. المكان بـ يقدم بيتزا ومشروبات باردة وساخنة و4 أطباق رئيسية فقط وأطباق باستا وساندويتشات بأنواع عيش مختلفة وبـ ينزل معاها بطاطس، الجرسون اللى كان معانا لطيف ومتعاون وسألناه إيه أسرع حاجة ممكن نأكلها لأننا كنا جعانين قوي فـ رشح لنا البيتزا والساندويتشات والباستا وأسرعها ألفريدو (23.99 جنيه) وطلبنا معاها كمان تشيكن سيزار سلاد (25.99 جنيه). أول ما قعدنا نزلوا لنا زجاجة مياة صغيرة (3.99 جنيه)، وسط الجو الكئيب والموسيقى العالية جدًا مر علينا وقت طويل جدًا لدرجة الزهق عقبال ما جاءت لنا السلاطة الأول، عبارة عن خس مقطع وعلى أطراف الطبق حلقات خيار وفرع كرنب أحمر كبير على طرف من أطرافه للزينة مع زيتون وفلفل أخضر مقطع صغير وقطع فراخ صغيرة ومرشوش صوص سيزر خفيف من فوق، على الرغم أن الطبق كان شكله حلو إلا أن قطع الفراخ بلونها الغامق قفلنا شوية، الخس ما كانش فريش قوي عادي والفراخ كانت جامدة شوية وناقصها صوص السيزر اللى كان ممكن يخفف نشفان محتويات الطبق، الكمية كبيرة لكن الطعم مش قوي. بعد فترة طويلة برضه جاء لنا الباستا ألفريدو، الصوص الأبيض كان حلو قوي وقطع الفراخ البيضاء المقطعة بحجم صغير كانت مستوية بشكل كويس لكن المكرونة كانت محتاجة زيادة تسوية. ما قدرناش نطلب حاجة زيادة الصراحة لأننا كنا قفلنا.. انتظار طويل.. أكل محتاج تضبيط.. جو كئيب.. وكمان تعبنا فى آخر قعدتنا لأن الكراسي كانت طويلة بزيادة ورجلنا كانت متعلقة طول الوقت.. المكان يحسب له أنه غامر وفتح فى شارع الهرم وأن تكلفة الخدمة فيه مش عالية (6.48 جنيه)، لكن المغامرة محتاجة استعداد.. والمكان محتاج تضبيطات كثيرة.

...

باسكوتشي: قهوة وكيك في داندي مول
اصدرت في: 02/12/2011

هـ تلاقي «باسكوتشي Pascucci-» موجود في مكان اللي ممكن نسميه الاستقبال في داندي مول، «باسكوتشي» مش أكثر من أنه مكان نظيف فيه قعدة وكراسي حول مطبخ صغير، لو قدرت تستحمل صوت الناس وهي بـ تتسوق حولك فممكن تستمتع بالكراسي المريحة والخشب الغامق هناك. المنيو مليان أنواع مختلفة من الشاي والقهوة وأسماء حاجات غريبة شوية. فيه مثلاً فانيليا باس كويك بـ 18.75 وهو كوباية من الشوكولاتة الساخنة ومعها الكريمة المخفوقة وعلى الوش فانيليا والمارينج، طعم الشوكولاتة الساخنة نفسها قوي جدًا ومُر وهو أقرب طعم للشوكولاتة الساخنة بأسلوب تورينو اللي موجودة في «أيل كافي دي روما – Il Caffé di Roma» في التجمع الخامس. اللي كان على الوش كان كريمي ومسكر والنكهتين المختلفين ممكن تخلي فيه توازن في الطعم أو ممكن تخلي للطعم نكهة غريبة. فيه نوع ثاني من «باس كويك» مكون من «كونفوسو» المكون من الكريمة، صوص الكراميل وبسكويت أماريتي مقطع على الوش. رغم أن إحنا كنا عاوزين نطلب لاتيه عادي بـ 22.95 جنيه لكن الجرسون أصر أن إحنا نجربه بصوص البندق زيادة (5.25 جنيه). اللاتيه بـ يقدم في كوباية زجاج طويلة مع صوص البندق في قاع الكوباية سهل أنك تقلبه مع باقي اللاتيه. لكن القهوة كانت خفيفة عن ما كان الناقد بـ يفضلها، البندق أضاف نكهة خفيفة. طلبنا الفرابتشينو كراميل بـ 28.95 جنيه وده واحد من خلطات «باسكوتشي» الباردة، هو مكون من لبن، كريمة، صوص الكراميل علشان يوازن الطعم. والنتيجة كانت حاجة لطيفة مش مؤذية وممكن ييجي بنكهات زي الفستق والمانجو ونكهات ثانية. المطبخ في منتصف المكان ومكان عرض الحلويات مظلم شوية، إحنا جربنا من الحاجات المحدودة هناك كيك الشوكولاتة وتارت البلح بـ 21.93 كل واحدة. البلح مش من أكثر الفواكه المفضلة لنا لكن إحنا كنا متوقعين تارت أحلى من دي. لو كان فيه اختبار طعم من غير ما نبص كان هـ يكون صعب قوي أن الناقد يحدد طعم البلح اللي كان على الوش لأن كان طعمه ضعيف وكان أساسًا التارت مالوش طعم. لكن كيك الشوكولاتة كان طعمها حلو. رغم أنها كانت ناشفة من الداخل لكن صوص الشوكولاتة اللي كان على الوش أعطى لها طعم أحلى ونكهة رائعة. لو ما كانش داندي مول مليان كافيهات كنا ممكن قلنا أن القاهرة محتاجة النوع ده من الأماكن الصغيرة للناس اللي تحب تقعد في مكان وتشرب حاجة وتمشي. الحقيقة أن المكان عادي جدًا ومش لاقيين سبب يخلينا نفضله على أي منافس.

...

قهوة الحرية: قهوة دقة قديمة وعملية في الهرم
اصدرت في: 07/07/2011

علاقة مصر المجيدة بالقهاوي متأصلة جدًا في التاريخ من زمان، زيها زي توت عنخ آمون. سيبكم من السياحة، لمّا الشباب المصري يرجعوا يروحوا القهاوي القديمة دي، ساعتها البلد هـ تطلع من الأزمة الاقتصادية. سواء كنت في طريقك إلى زيارة أهرامات الجيزة، أو راجع بيتكم بعد ليلة في أحد ملاهي الهرم الليلية الراقية، عدّي على قهوة الحرية خلف فندق هوريزون الأهرام، ودي أكثر حاجة وطنية سلبية ممكن تعملها حاليًا. القهوة عاملة زي كهف صغير ومظلم، وفيه كراسي خشب وترابيزات موجودة في المكان أكثر ما مساحته تستحمل على الجانبين وتنتهى فى آخر الممر بـ ترابيزتين وده بـ يسيب مساحة صغيرة قوي للتحرك. المنيو فيه القائمة العادية للمشروبات الغازية، الشاي، القهوة التركي والسحلب كمان متوفرين علشان تستمتع بهم مع الشيشة، في الحقيقة هو ده المنيو كله، وللتوضيح.. هو مافيش منيو فعلاً. المكان مالكش أنك تختار فيه الأوردر بتاعك براحتك والجرسون واقف مستنيك بالنوتة والقلم علشان يأخذ طلباتك. وما تنتظرش منه أنه يجيلك يتأكد منك لو كل حاجة مظبوطة وعاجباك، أو حتى يبص لك في عينيك، هـ تلاقيه حاطط سيجارة كليوباترا وراء ودنه، لابس تي شيرت ماركة "Adidos"، والجينز بتاعه متشمر لفوق ركبته، تقريبًا علشان يبين شبشبه الجامد. المشروبات الغازية بـ تيجي في كانز من سوبر ماركت بجانب القهوة، وبـ تتقدم في كوباية بـ 2, 50 جنيه، وللأسف مش في الزجاجة المصنوعة من الزجاج زي العادة المصرية. الشيشة المعسل العادية هـ تكلفك 2 جنيه، والتفاح 5 جنيه. كوباية الشاي بـ 50, 1 جنيه، والقهوة التركي 2 جنيه. ممكن تعافر علشان تقدر تخلّي الجرسون يأخذ باله منك لو في يوم زحمة، بس هـ يجيلك على طول لو محتاجه، زي ما يكون قلبه بـ يحس بك لو عرف أن فيه كوباية فاضية أو شيشة محتاجة حجر. المشكلة في الأماكن زي «الحرية» أنك بـ تبقى عامل زي بطة قاعدة (فعلاً) للباعة المتجولين بالنظارات الشمسية، والساعات، وبراويز الصور التعبانة، وده ممكن يبقى إزعاج، خصوصًا وقت الليل، الموضوع مش بـ يبقى مُريح خالص لمّا بـ يصروا، بس لازم تديهم الوش التمام علشان يسيبوك في حالك. لو هـ نلخص القهوة دي في 3 كلمات تبقى: مصدية، متربة، وأكيد عافف عليها الزمن. «قهوة الحرية» مافيهاش هزار إما تأخذها بقرف أو بلا مبالاة مطلقة. في الحالتين هي لها طابع خاص، وكويسة لو عايز تهرب من القاهرة العصرية.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن