شرقي مطاعم in المعادي Cairo, Egypt

مطاعم

ست البيت: مطبخ شرقي مفاجأة في جراند مول المعادي
اصدرت في: 22/06/2014

إزاي ما شوفناش المكان ده قبل كده؟ يمكن لأن تصميم جراند مول بـ يخليك تدخل من البوابة على الدور الثاني مباشرة، ولازم تنزل دورين تحت الأرض بعد دخولك من البوابة الرئيسية علشان توصل للدور الأرضي اللي فيه مجموعة كبيرة من المطاعم والكافيهات، ولأن الطبيعي أنك بـ تدخل المول وتبدأ تكتشف محلاته وأنت طالع السلالم المتحركة، يبقى احتمالات أنك تشوف «ست البيت» هـ تبقى قليلة إلا لو فيه سبب معين يخليك تنزل الدور الأرضي مخصوص. المطعم موجود على مساحة صغيرة في وسط ما يشبه ساحة طعام مقسمة لعدد من الكافيهات والمطاعم، فيه حوالي 8 ترابيزات بس للجلوس، والقعدات كلاسيكية وبسيطة جدًا، ويكاد يكون مافيش معالم واضحة للمكان من حيث الديكور أو الطابع المميز، المكان مجرد قعدة تأخذ فيها وجبتك وتقوم بعدها على طول. شكل المطعم بشكل عام مش محمس أو مغري أنك تأكل فيه، لكن المنيو كان فيه اختيارات كثير وأكلات صعبة حبينا نجربها علشان ما نبقاش ظلمنا المكان بمجرد الشكل. فيه مطبخ مستقل بعيد عن صالة الطعام بـ يحضر وجبات ست البيت، ولمحنا فيه عدد لا بأس به من الشيفات وأواني التحضير، وده أمر ضروري لمطبخ شرقي أصيل بـ يحضر طواجن التورلي والفتة والبامية والمسقعة، والمشويات والحواوشي والممبار وغيرها من الأطباق الصعبة. لكن أول حاجة لفتت انتباهنا هو بوفيه السلاطات الرائع وأنواع السلاطات المتنوعة اللي فيه، وقبل أي حاجة اختارنا طبق السلاطات المتنوعة (14 جنيه) اللي فيه كوسة مسلوقة مخللة تحفة مش بـ نلاقيها في أي حتة، وباذنجان مسلوق بخلطة الثوم، مكونات فريش للكول سلو والحمص والبطاطس المسلوقة بالشبت والكزبرة. طبق السلاطة ده بالوجبة كلها. فيه هنا منيو إفطار فيه فول وطعمية وشكشوكة لكن بـ يشتغل لحد الساعة 1 ظهرًا بس، وفيه فطائر شرقية حلوة وحادقة، لكن إحنا كنا حابين نجرب المطبخ الشرقي في الصميم وطلبنا فتة باللحم البتلو والصلصة (55 جنيه) زي بتاعة العيد الكبير، وطبق مشويات مشكلة فيه كفتة وكباب وشيش طاووق (55 جنيه). الأكل نزل بسرعة غريبة، توقعنا وقت طويل لتحضير الفتة بالذات، لكن في أقل من 10 دقائق نزلت كل الأطباق، والميكس جريل نزل على شواية صغيرة علشان يحتفظ بحرارته، والفتة في طاجن فخار جميل. الفتة بالعيش المحمص والأرز المفلفل رائعة واللحم المسلوق معمول بحرفنة ولا أجدع ست بيت، الطبق ده ينفع يبقى علامات المكان المميزة. المشويات كانت محبطة شوية، حسينا أن الكفتة من اللحوم المجمدة مش لحم فريش، والشيش طاووق مش أحسن حاجة ممكنة، الكباب هو اللي كان معقول وتسويته وتتبيلته مضبوطين، وشوية الخضار المشوي اللي حول اللحوم على الشواية كانوا أحسن إضافة ممكنة للأرز الأبيض اللي نزل مع طبق الميكس جريل. عندهم عصائر فريش تجنن، جربنا اليوسفي (10 جنيه) وكان فيه قطع وفصوص صغيرة لذيذة، عصير طبيعي بحق وحقيقي. وحلينا بأرز باللبن بالمكسرات (13 جنيه) علشان تكتمل وجبتنا المصرية عند «ست البيت» ونتفاجئ بمستوى عالي جدًا من جودة المذاق وسرعة التقديم. ما تكسلش وانزل مخصوص للدور الأرضي في المول وهـ تلاقي أن الموضوع يستاهل، مطعم «ست البيت» بـ يقدم أطباق شرقية ومصرية بجودة ممتازة وأسعار مغرية، صحيح الخدمة ينقصها بعض الاحترافية، ومافيش غير حوض الأطباق داخل المحل اللي هـ تغسل فيه أيدك بعد زروطة الطواجن، لكن حبينا الأكل ودي أهم حاجة.

...

طواجن أبو حسين: دليـﭭري وكاترنج جديد في المعادي
اصدرت في: 11/03/2013

استمرارًا لهوجة التسمية بـ "أم فلان" وأبو فلان" في المطاعم المتخصصة في الأكل المصري اللي انتشرت بكثافة ملحوظة في السنتين اللي فاتوا، اكتشفنا مكان جديد في منطقة دجلة في المعادي بـ يعمل توصيل طلبات داخل المعادي فقط وبـ يعمل كاترنج وتجهيز لحفلات. «طواجن أبو حسين» واضح من اسمه أنه متخصص في الطواجن، لكنه بـ يعمل جنب الطواجن عدد من الأكلات المصرية زي الدولمة والمحاشي وورقة اللحمة والسمان المشوي وعدد من الشوربات والمقبلات. بـ يكون فاتح من 12 الظهر لحد 9 بالليل، بـ تعمل الأوردر بالتليفون وتوقع أنه يجيلك بعد ساعة ونصف أو أكثر، يعني لازم تعمل الأوردر قبل ميعاد الأكل بوقت كافي، مع أنه داخل المعادي فقط، إلا أنه بـ يتأخر برضه، يمكن علشان الأكل بـ يتعمل فريش، المهم تبقى عامل حسابك ومش مستعجل.منيو «طواجن أبوحسين» أحلى حاجة فيه الطواجن طبعًا؛ بامية وبطاطس وكوسة وبسلة وملوخية ومسقعة كله بقطع اللحم أو اللحم المفروم (30 جنيه) وفيه طواجن لحم بالبصل (40 جنيه) وعكاوي (55 جنيه) ودجاج أبو حسين (35 جنيه) ورقاق باللحم وكفتة داوود باشا وأرز معمر (35 جنيه). وفيه قائمة فيها وجبات خاصة زي ورقة اللحمة (75 جنيه) ودي تكفي فردين ولحم فلتو مشوي على الجريل (140 جنيه للكيلو) والسمان المشوي والدجاج الروستو (40 جنيه). وجبتنا كانت عبارة عن ورقة لحمة وطاجن أرز معمر بقطع اللحم مع طبق سجق مشوي (25 جنيه) من منيو المشهيات وطبق سلاطة "أبو حسين" (15 جنيه) والحلو أم علي باللوز (15 جنيه).الأكل وصل ساخن في طواجن فخار ومغلف بالورق الفويل، بس التغليف ماكانش محكم واتفتح في الطريق من عامل الدليـﭭري. المهم ابتدينا نستعرض الكميات اللي كانت معقولة جدًا في ورقة اللحمة وقليلة إلى حد ما في طاجن الأرز المعمر والمشهيات. سلاطة أبو حسين هي سلاطة تركي مكونة من الجرجير وشرائح التفاح والبرتقال عليهم دبس الرمان ومكسرات، فريش وطعمها لذيذ ومبتكر بس الكمية قليلة جدًا. السجق المشوي رائع وعليه خلطة متبلة من الفلفل والطماطم والبصل، بس برضه وحدات السجق قليلة. الأرز المعمر نفس الكلام؛ مخدوم قوي، وشوفنا بعنينا القشطة واللبن اللي مغرقينه، والوش المحمر اللي طعمه يجنن، إنما 35 جنيه كثير على طاجن أرز بالحجم ده حتى لو فيه قطع لحم محمرة. ورقة اللحمة كانت العكس تمامًا؛ الكمية كبيرة وتشبع فردين فعلًا وعليها خلطة غنية من قطع البطاطس والطماطم والبصل والكرفس والسبانخ، لكن اللحم نفسه كان لحم فيليه أشبه بالبفتيك، شرائح مستطيلة كبيرة مستوية كأنها صينية لحم في الفرن عادية جدًا، مش معمولة بطريقة ورقة اللحم اللي احنا عارفينها، ومش مستوية قوية زي ما المفروض تكون علشان تتشرب من كل التوابل والخلطة اللي حواليها، يعني تقريبًا أكلنا اللحمة لوحدها والخلطة لوحدها. أم علي معقولة بس بالعافية كنا بـ نلاقي وحدات مكسرات، بس كانت قفلة كويسة لوجبتنا من عند «طواجن أبو حسين» اللي شعاره المكتوب على المنيو "هـ تأكل مرتين". ممكن فعلًا نأكل مرة تانية بشرط أنهم يحطوا النقط اللي ذكرناها هنا في الإعتبار، التأخير والكميات بالنسبة للأسعار والتغليف. غير كدة «طواجن أبو حسين» ممتاز لو عايز أكل بيتي ومكسل تطبخ ومكسل تنزل.

...

الست أمينة: توصيل أكل بيتي لكل مكان في القاهرة
اصدرت في: 04/02/2013

واضح أن فكرة المطبخ البيتي وتوصيل الأكل للمنازل أصبحت فكرة رائجة اليومين دول وعدد المطابخ من النوع ده بـ يزيد كل يوم. وبما أنها بـ تزيد فهي أكيد عليها إقبال وبـ تحقق مكاسب معقولة، وتفسيرنا للموضوع ده حاجتين: أولها عدم رغبة الناس في النزول كثير مؤخرًا، وثاني حاجة الاستسهال في العزومات بدل وقفة المطبخ والنتائج غير المضمونة. المهم إحنا اكتشفنا «مطبخ الست أمينة» من خلال صفحتهم على الفيسبوك وتفرجنا على المنيو الشرقي المتكامل بتاعهم وعجبنا الأسعار قبل الأصناف، وقررنا نجربه في البيت.المطبخ نفسه موجود في المعادي الجديدة وبالتحديد في مدينة المعراج، لكن مش هـ تحتاج العنوان في حاجة لأنه بـ يوصل الطلبات بس ولأي مكان في القاهرة، هـ تحتاج ساعة أو ساعتين قبل طلب الأوردر بتاعك وده حسب حجمه، لكن لو عزومة أو وليمة "كاترنج" هـ تحتاج 24 ساعة قبلها علشان تحدد طلباتك.منيو كبير وهو موجود في صفحتهم على الفيسبوك فمش هـ نتكلم عليه كثير لأنكم تقدروا تشوفوه، لكن هـ نقول لكم على الأصناف اللي جربناها وحاولنا من خلالها نشوف جودة المطبخ وحرفية الست أمينة. جربنا دجاج رستو مدخن على صينية التورلي (60 جنيه) ودي كانت دجاجة كاملة مقطعة بطريقة الشيش ومش مخلية، طعمها وشكلها زي ما أي ست بيت شاطرة ممكن تعملها، والخضار تحتها بصلصة الطماطم والتوابل، وقبل أي حاجة شكل الطبق الفويل اللي وصلت لنا فيه بـ تدخن وريحتها تجنن تفتح النفس. طاجن فخار من السجق البلدي بـ 100 جنيه، فيه تقريبًا كيلو سجق مطبوخ بالصلصة والتسبيكة البيتي المعتبرة، لحم نظيف وفريش، لكن التوابل كانت قليلة شوية والسجق مش حراق زي المعتاد، بس مع الأرز بالشعرية (13 جنيه) والسلاطة الخضراء والطحينة (5 جنيه) هـ تعمل طبق محترم كأنك في عزومة أو غدوة بيتي كلاسيكية. الكميات في الطواجن والصواني معقولة جدًا، يعني لو طلبت أكثر من صنف بالأحجام الكبيرة ممكن تكفي من 5 لـ 6 أشخاص وكل واحد يملأ طبقه كأنه في بوفيه مفتوح ويأكل براحته. طبق محشي مشكل الست أمينة بـ 10 جنيه الحجم الصغير وفيه باذنجان وكوسة وفلفل محشي بالأرز واللحم المفروم، لذيذ بس الحبهان فيه كان مطحون وطعمه ظاهر قوي في الخلطة ودي حاجة مش ظريفة. السلاطات تجنن، وبعثوا لنا طبق بصارة بالتقلية هدية مع الوجبة وكان لذيذ بس مش زي ما محلات الأكل الشرقي الكبيرة بـ تعمله. والطلب بـ يوصل معاه حوالي 5 رغيف كبير عيش شامي، والتغليف وشكل التقديم كان أكثر من رائع ومحافظ على حرارة الأكل تمامًا ودي كانت أهم حاجة بالنسبة لنا في الطقس البارد ده، ومافيش أي سوائل اتدلقت من أي عبوة ودي حاجة تحسب لهم برضه. طاجن صغير أم علي (12 جنيه) بالزبيب والمكسرات كان حلو ومخدوم كويس، الحقيقة تجربتنا مع «الست أمينة» كانت جيدة جدًا من حيث جودة الطعام ونظافته وكمياته والتوصيل في الميعاد المتفق عليه، بس مبلغ التوصيل (15 جنيه) كان زيادة شوية عن المكتوب في المنيو. والمبلغ بـ يختلف من منطقة لمنطقة وفيه حد أدنى للطلبات لكل منطقة كمان. بس عرفنا أن «الست أمينة» ممكن تبقى شريك يعتمد عليه في العزومات والحفلات، وأسعاره كويسة خاصة في الأعداد الكبيرة والكاترنج. ادخل خذ فكرة عن المنيو بتاعهم على الفيسبوك وقول لنا رأيك بعد ما تجربه.

...

بيت جدي: أكلات شرقية ومشويات في المعادي الجديدة
اصدرت في: 15/07/2012

فيه مشكلة بـ تقع فيها أماكن كثير بـ تفتح جديد خاصة المطاعم والكافيهات وهي أن الشكل بـ يبقى غير المضمون، سواء من حيث أصناف المنيو اللي مالهاش علاقة باسم المحل أو نوع المطبخ المكتوب على اليافطة الخارجية، يعني مثلًا المطعم يبقى معروف أنه لبناني وتلاقيه بـ يقدم أكل إيطالي أوالعكس، وساعات الشكل بـ يختلف عن المضمون من حيث الجودة، يعني الشكل بـ يبقى جذاب جدًا من الخارج أو الداخل ويخلي الزائر عنده توقعات عالية من حيث الطعم اللي المفروض يبقى حلو زي شكل المكان، لكن بـ تبقى المفاجأة أن مستوى الأكل مالوش أي علاقة بشكل المكان الأنيق. طبعًا كل الكلام ده مهم وهو اللي بـ يميز مكان عن الثاني، بس لما يكون المكان استوفى أهم شرط وهو جودة المطبخ وطعم الأكل الحلو. لما شفنا مطعم «بيت جدي» من الخارج عجبنا شكل يافطة باللون الأحمر وعجبنا شكل المحل المكون من طابق واحد وهو مبنى مستقل بذاته موجود في ميدان الجزائر في المعادي الجديدة، مافيش أي كلام مكتوب على واجهة المحل بـ تدل على نوع الأكل اللي بـ يقدمه، لكن عرفنا لما شفنا المنيو أنه خليط من أكثر من مطبخ شرقي زي المصري والخليجي واللبناني وفيه مشويات وساندويتشات ومقبلات. المكان هادئ من الداخل وبـ يفكرنا بالمطاعم اللي بـ تبقى موجودة بالمدن الساحلية من حيث الروقان والمساحات الواسعة وكمان علشان كراسي البحر المستخدمة فيه، مريحة وشكلها جديد، وفيه شاشات تليفزيون والمكان كله مغلق ومكيف. المنيو زي ما قلنا فيه أصناف كثير من الأكلات الشرقية وممكن تطلب أي أكلة في هيئة طبق أو وجبة من المكون الرئيسي مع إضافة السلاطات والأرز والبطاطس المحمرة. بدأنا بشوربة كريمة الدجاج (6 جنيه) ودي كانت أحلى حاجة أكلناها في زيارتنا وكان قوامها ممتاز. بعد كده طلبنا طبق مشكل من المشهيات (25 جنيه) فيه ممبار وسمبوسك وثومية وطحينة وبابا غنوج وهنا بدأ المستوى يهبط لأن الممبار ما كانش طازج والثومية مالهاش أي علاقة بها وما جيناش جنبها، والطحينة صايصة وبالعافية أكلنا السمبوسك والبابا غنوج. طبق ميكس جريل (45 جنيه) فيه الكباب عبارة عن لحمة محمرة ما جاتش جنب الفحم، والكفتة كأنها معمولة في الفرن، والشيش طاووق كان معقول. ليه مطعم يقدم لحمة محمرة على أنها كباب؟ المهم.. طبق رئيسي ثاني هو ورقة اللحم مع الأرز المبهر (55 جنيه) واللي كنا متوقعينه يُقدم في ورق فويل مع البصل والبطاطس زي ما بـ نشوفه في كل حتة، لكن هنا هو اتقدم طبق عادي وسط الأرز والبطاطس وكان طعمه كأنه شاورما بصوص البصل مافيهوش نكهة التسوية على البخار المعروفة لورقة اللحم، وبكده يبقى المستوى تدرج في الهبوط لحد ما وصلنا لآخر طبق رئيسي علشان نكتشف أن «بيت جدي» عنده مشكلة حقيقية في المطبخ، مش في الشيف اللي بـ يعمل الأكل لكن في مدى الاهتمام بالعميل واحترام ذكائه، لأن اللي اتقدم لنا كان تقريبًا حاجة ثانية غير اللي إحنا طالبينها وعارفين طعمها. الخدمة جيدة رغم كل شيء والطلبات بـ تنزل بسرعة، نظافة صالة الطعام ملحوظة لكن الحمامات للأسف محتاجة شوية صيانة. المنيو فيه كبسة وبرياني وكباب هندي بالصلصة وحمام محشي وملوخية بالأرانب. وفيه مشروبات وعصائر وحلويات، لكن ما كانش فيه مبرر نجربها بعد ما الأكلات الرئيسية أحبطتنا. «بيت جدي» مكان شكله حلو واسمه حلو وموحي بحاجات كويسة كثير، لكن الاهتمام بالتفاصيل واحترام ذكاء ورغبات الضيوف وجودة الأكل لازم يكون على رأس الأولويات علشان يُكتب للمكان النجاح، وأي فقدان لأي واحد من العناصر دي يعتبر غير مقبول. ياريت في زيارتنا القادمة يكون تم الالتفات للنقاط دي. وزيارتنا الجاية بشكل شخصي هـ تكون في رمضان لأنه عامل منيو وبوفيه للأفطار والسحور وإحنا رغم كل حاجة لسه عاوزين نجربه.

...

الشيف سرحان: أكل بيتي رائع وتجهيز حفلات في المعادي
اصدرت في: 04/06/2012

لأ بجد الأكل هنا غير عادي، يعني قبل ما نتكلم عن موقع المحل والديكور والخدمة والأسعار لازم نقول لكم أن أي طبق هـ تطلبه من عند «الشيف سرحان» هـ يبقى أحلى من مكان ثاني بـ يعمل نفس الأطباق دي وهـ تحس أنك بـ تأكل أكل بيتي من أيد ست بيت ما حصلتش، أو طبعًا من أيد شيف محترف بـ يضبط مقاديره بالمللي. عرفنا أن «مطاعم التقوى» أو مطاعم «الشيف سرحان» لها 5 فروع في القاهرة في الرحاب ومدينة نصر ومصر الجديدة والمقطم والفرع اللي إحنا رحناه في المعادي. مش عارفين إزاي عمرنا ما لمحنا أي فرع له في المناطق دي قبل كده. مع أن الفرع اللي رحناه في المعادي كان كبير ومكون من طابقين وموجود في شارع واضح متفرع من الكورنيش خلف أكاديمية السادات وبجوار محلات «خير زمان» في أبراج بدر. دخلنا المطعم وكان جوه هادئ من الداخل وطلعنا الطابق العلوي لكن لقينا المساحة فوق ضيقة والقعدة مش مريحة فـ نزلنا تحت في الوسع وبدأنا نتفرج على المنيو اللي الصور اللي فيه تفتح النفس أصلًا وعرفنا أن المحل قائم أساسًا على الكاترنج وتجهيز الحفلات وتسوية الخروف والديك الرومي وتحضير (سفنديش) اللحوم والدجاج، والسفنديش هو الطبق الكبير اللي بـ يبقى موجود في البوفيه المفتوح. وبـ يجهز سرفيس الأرز والكبسة وطواجن الخضار باللحوم والمكرونات واللازانيا. الأسعار مكتوبة في المنيو ومكتوب كمان أنها قابلة للتغيير، وده طبعًا حسب أسعار السوق. لكن هـ نقول لكم أن الخروف الـ 55 كيلو بـ 2800 جنيه والديك الرومي 12 كيلو بـ 650 جنيه وسفنديش دجاج الكاري والبيكاتا وكباب الحلة بأسعار من 350 لـ 500 جنيه وسرفيس الأرز بـ 40 جنيه. دي نبذة عن أسعار تجهيز الحفلات والتفاصيل الأكثر ممكن تعرفوها بالتليفون. داخل المطعم طلبات الطعام محدودة مش زي التنوع الكبير في الكاترنج. وجبات لحوم ودجاج وبط وكبدة إسكندراني ولحم جدي ومندي وكبسة خليجي. وفيه مقبلات زي الكبيبة والسمبوسك وسلاطات وشوربة وأرز ومكرونة فرن ولازانيا. جربنا وجبة فيها نصف دجاجة مستوية بالبخار (مندي دجاج) معها أرز بسمتي وصوص الطماطم الخليجي الحار (اسمه دقوس) وسعرها كان 22 جنيه. وطلبنا وجبة ثانية هي الموزة البتلو مع الأرز وصوص دقوس الرهيب (30 جنيه) وطلبنا 4 وحدات سمبوسك (9 جنيه) وسلاطة الزبادي والسلاطة الخضراء (6 جنيه). أحلى طعم لحوم ودجاج ممكن تأكله خارج البيت! طعم بيتي ما حصلش وتوابل هندية وعربية خطيرة. الدجاج المستوي بالبخار اختراع في حد ذاته، وقطعة اللحمة البتلو كانت مستوية جدًا ومهرية ممكن تتقطع بمجرد ما تلمسها بالشوكة، وخلطة التوابل والبهارات اللي عليها ممكن تقعد تطاردها بالشوكة في الطبق بعد ما تخلص اللحم نفسه من لذاذتها. السلاطات مخدومة قوي وكمياتها كبيرة وفيها مزازة خطيرة، وصوص دقوس ده رغم أنه حار والمفروض أنك تضيفه للأرز والدجاج إلا أن من حلاوته كنا بـ نأكله بالملعقة من غير حاجة. والسمبوسك مقرمشة ومافيهاش غلطة. باختصار حسينا أن الشيف سرحان شخصيًا هو اللي عامل كل الأصناف بأيده، ورغم أن إحنا أصلاً مش عارفين مين هو الشيف سرحان إلا أننا احترمناه جدًا بعد الأكلة دي، وعرفنا أن له حق يعتز بنفسه لدرجة أنه يسمي المحلات بـ اسمه. الكميات في الأطباق مش كبيرة زي ما كنا متوقعين، والخدمة معقولة والطلبات نزلت أمامنا بسرعة. المكان نظيف والحمامات كذلك والأسعار معقولة بالمقارنة بالكميات، والتجربة كلها على بعضها كانت هائلة وإحنا مبسوطين أننا اكتشفنا مطعم أكلات عربية مميز زي «الشيف سرحان» ونفتكر هـ نستعين به بعد كده في حال تجهيز الحفلات والبوفيهات العملاقة.

...

أكل بيتي: اسم على مسمى في المعادي الجديدة
اصدرت في: 04/10/2011

على الرغم من أنه في المعادي الجديدة لكن ولا هـ تدوخ على مكان وركنة ولا هـ تشيل هم المشوار لهناك والموال ده كله لأن «أكل بيتي – Akl Beety» مطبخ لعمل أكل بيتي بدون مطعم لأنه بـ يعتمد على الطلبيات بالتليفون وخدمة التوصيل فقط. قائمة الطعام بتاعتهم موجودة على موقعهم (لو حابب اطلب القائمة المطبوعة تيجي لك مع الأكل)، وعملية الطلب بالتليفون بـ تأخذ وقت شوية خاصة لو بـ تطلب لأول مرة علشان يسجل بياناتك، الطلب بـ يستغرق وصوله ساعتين و45 دقيقة (منطقة العجوزة)، فلو هـ تطلب اطلب بدري الساعة 12 ظ مثلاً علشان يلحق ييجي لك على وقت الغذاء، وطبعًا كل منطقة لها توقيت توصيل مختلف. وهـ تلاقيهم كاتبين تكلفة التوصيل خارج المعادي قد إيه والحد الأدنى للطلبات لكل منطقة، لما طلبنا كان لازم ما يقلش الطلب عن 200 جنيه لكن حظنا كان كويس –أو حظهم- أن عددنا كان كبير. الطلب أخذ تقريبًا 3 ساعات، لكن أول ما جاء كان فرحة كبيرة جدًا وشوق أننا نتذوق الأكل خاصة أن الصور على الموقع شكلها مُغري، التغليف بتاعهم حلو قوي، الأكل في صناديق مقواة وكل أكلة محطوطة في عبوة خاصة بها وملفوفة بفويل وسوليفان شفاف، الأكل وصل سخن جدًا مولع ومافيش أي حاجة مدلوقة أو واقعة زي ما بـ يحصل مع مطاعم ثانية، خدمة نظيفة جدًا. كاتبين على الموقع أنهم بـ يعطوك طبق هدية كطريقة منهم أنهم يرحبوا بك ولكن ما وصلناش ده مع الطلب، جربنا من عندهم حاجات كثيرة قوي: الأرز بالمكسرات (لوز وزبيب) ممتاز، طعم القرفة فيه واضح جدًا والمكسرات طازجة، كمان كفتة داوود باشا بالبطاطس حلوة لكن الكمية مش كبيرة واللحم بلدي وبيتي بجد، كشك ألمظ كان جيد لكن ما كانش واضح فيها طعم الشوربة في مكوناتها لأن طعم الزبادي كان مغطي عليها، الكوسة بالبشاميل كانت تحفة ومليانة لحمة مفرومة والكمية مشبعة جدًا ووصلت سخنة مولعة، كفتة الأرز برضه كميتها كبيرة ولكن كان طعمها سادة وكان أشبه بطعم التوفو (البديل الصيني للحمة). في الشوربات جربنا شوربة الكريمة بالبسلة لكن للأسف كان طعمها زي شوربة الفراخ العادية، كريمة فقط مع طعم الفراخ وما كانش فيه أي طعم للبسلة، لكن اللي خلانا ننسى ده أنها جاءت سخنة ولما عصرنا عليها ليمون وأكلنا العيش الطازج بتاعهم كانت كمية كافية، أما شوربة الخضار كانت فيها قطع طازجة للخضار السوتية مقطعة قطع صغيرة لكن كمية الشوربة كانت أكبر من كمية الخضار نفسها فـ سيبنا شوية شوربة في الآخر والكمية كمان كبيرة لكن كانت حلوة. كمان الملوخية كان طعمها بيتي جدًا وجيدة لكن محتاج قوامها يكون أثقل شوية. في الفراخ جربنا "دجاج توب كابي" وهو فراخ محشوة أرز، الفراخ حلوة ومستوية كويس لكن ممكن تبقى أحلى لو فيه صوص عليها، والأرز المحشو جواها حلو جدًا جدًا. في اللحوم ذوقنا كمان طبق الكبدة البانية (تقدم مع البطاطس) وكانت الكبدة كويسة لكن كميتها كثيرة في حين أن البطاطس كانت طرية ومش كويسة، الحواوشي كان رغيف كبير بحاله مُقسم نصفين وفيه قطع لحم كثيرة وعليها صوص لكن مش بكمية كافية، الرغيف كان كمية كبيرة علينا أننا نكملها فـ تقدر تعتبره وجبة كاملة وأنت بـ تختار هـ تأكل إيه من عندهم. العيش اللي بـ ييجي مع الطلب (بدون ما تطلب) طازج وطري، ومن قسم السلاطات جربنا السلاطة الخضراء وكان لا غبار عليها، والثومية حلوة وقوامها متماسك لكن ملحها كان كثير قوي، سلطة الطحينة كان فيها زيت أكثر من الطحينة بشوية لكن كويسة، الكول سلو جيدة ولكن الطرشي كان عادي وممكن يكون أفضل من كده. في التحلية طلبنا أم علي وكانت شهية جدًا لكن ممكن يقل سكرها شوية. المنيو فيها أصناف أكثر بكثير من اللي جربناها، بجد الخدمة ممتازة وفريق العمل مهذب وشاطر، بعد ما خلصنا أكل بشوية لقيناهم بـ يكلمونا يعرفوا رأينا فيه، الأسعار كويسة جدًا والكميات كمان جيدة جدًا، التغليف والنظافة لا يعلى عليه، خاصة أن نادرًا ما ممكن تلاقي حد ممكن يجيب لك أكلك سخن مولع خصوصًا لو قادم من مكان بعيد، وده ممكن يكون اختيار مناسب لك لو معاك شلة أصحاب كبيرة وكل واحد له مزاج مختلف في الأكل علشان ترضى جميع الأذواق وتأكلوا أكل صحي ونظيف.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح