بيتزا مطاعم in المعادي Cairo, Egypt

مطاعم

لا فيه: بيتزا بنكهة الفطير الشرقي في المعادي
اصدرت في: 14/04/2014

أبراج بدر اللي في ظهر كارفور المعادي أصبحت منطقة حيوية مليانة محلات وكافيهات ومطاعم، وبقيت امتداد مهم للمعادي سيتي سنتر اللي الناس بـ تيجي له من كل المحافظات، وبقى سهل أن الناس تخرج من كافرور وتروح تتمشى في منطقة بدر وتقعد في كافيه أو تطلب وجبة سريعة أو تستسخدم أحد البنوك الموجودة في الأبراج، أو حتى يدخلوا فرع أديداس أوتلت الشهير اللي على مخرج الأبراج للطريق الدائري، واللي أصبح هو كمان من العلامات المميزة للمكان. كان فيه كافيه فتح من فترة في المكان وما حققش النجاح الكافي، فغير نشاطه أكثر من مرة لحد ما مؤخرًا استقر على فكرة وجود قعدة عادية أشبه بالقهوة أو الكافيتريا، وبجواره فرن صغير متخصص في الفطير والبيتزا الشرقي والإيطالي والباستا اسمه «لا فيه – La Vie». ممكن تقعد في الكافيه وتطلب الأكل اللي أنت عاوزه من الفطاطري، لكن علشان إحنا عارفين أن قعدة الكافيه لا تعبر عن الفطاطري تمامًا، فعملنا أوردر دليفري وجاء لنا لحد البيت. الأكل وصل بسرعة، في أقل من 30 دقيقة تقريبًا، ووصل بدون أي نواقص أو مشاكل، ودي كانت أهم حاجة بالنسبة لنا، لأن بقى العادي أن الأوردر ييجي لك فيه مشكلة. محل «لا فيه – La Vie» بـ يوصل في مناطق المعادي الجديدة وأبراج بدر والمعراج ونادي الصيد بالقطامية، ودي ميزة ثانية لأنه بـ يغطي منطقة مش أي محل بـ يحب يوصل طلبات فيها. طلبنا بيتزا سوبريم أو زي ما بـ يسموها هنا مشكل لحوم حجم كبير (45 جنيه)، وفطيرة شرقي محشوة بأنواع مختلفة من الجبن حجم صغير (25 جنيه) والحلو فطيرة شوكولاتة حجم صغير (18 جنيه). الأكل وصل ساخن وفي حالة جيدة، تغليف كويس وشكل الأكل يفتح النفس. بدأنا بالبيتزا اللي كانت شبه الفطير بشكل كبير من حيث الطعم، لأن السجق والبسطرمة هم اللي مسيطرين على الإضافات، مافيش ببيروني أو بيف عادي، والموتزاريلا كمان قليلة، الطعم حلو لكن مش مميز، وللأسف العجين كان سميك شوية، مش رفيع ومقرمش زي ما كنا متوقعين، لكن لو بـ تأكله وأنت مهيأ نفسك أنك بـ تأكل فطير شرقي عليه إضافات من فوق بدل الحشو، أكيد هـ تنبسط ومش هـ تحس بمشكلة، لكن هي بعيدة عن البيتزا اللي أنت عارفها ده أكيد. الفطيرة المحشوة بالجبن الرومي والكيري كانت لذيذة، بس كنا متوقعين كمية جبن أكثر من كده، واضح أن فيه ندرة في الموتزاريلا في المطعم ده. الفطيرة الحلوة كانت حلوة بجد، غرقانة في الشوكولاتة النوتيلا ومحشوة بالكريمة وعليها حبات كريز ومكسرات مبشورة، شكلها حجمها صغير لكن من كثر ما هي دسمة كانت تنفع وجبة لوحدها، وينفع يحلي بها 4 أفراد بعد وجبة حادقة عادية. فيه هنا باستا وسباجيتي بإضافات زي بتاعة البيتزا والفطير بالضبط، لحوم ودجاج وتونة وسي فوود ومشروم بأسعار من 15 لـ 25 جنيه. وفيه بطاطس محمرة (5 جنيه) وكانز بيبسي (6 جنيه). وفيه فطير مشلتت حسب الطلب، وزي ما قلنا المهم هنا أن التحضير سريع وخدمة التوصيل جيدة، مش فاضل غير أنهم يهتموا شوية بالمنتج نفسه من حيث المذاق والإضافات.

...

كراست: بيتزا على الحطب فى المعادى
اصدرت في: 25/02/2014

تعودنا من المطاعم الإيطالية فى القاهرة الوقوع ضحية لأمركة الأطباق؛ الحقيقة أن وصفة البيتزا الأصلية بـ تتكون من عجينة رفيعة وطبقة مناسبة من جبن الموتزاريلا، ومعظم المدعين بتقديم الشكل الأصلى من البيتزا بكل صراحة بـ يقولوا أى كلام. التزامًا بتقاليد البيتزا المتوارثة، بيتزا "كراست-Crust" بـ يوفر خدمة التوصيل، بغض النظر أن مافيش أحلى من تجربة الأكل فى المطعم. الديكور بسيط وشيك، بأفكار قعدة متنوعة؛ بعيدًا عن ترابيزات خشب البلوط المتينة بالكراسى المبطنة بنفس الشكل، كراست عنده مكان فى الهواء الطلق تقدر فيه تأكل وسط أشعة الشمس على ترابيزات ملحق بها دكك للجلوس. بالنسبة للناس اللى معاهم أطفال وعاوزين يفرحوهم ببيتزا على شكل أرنب (26جنيه) أو مينى سباجيتى (24جنيه) هـ يسعدهم وجود ساحة لعب يفرغوا فيها نشاطهم الزائد، خصوصًا لو كانوا جربوا الطاقة السكرية الناتجة من النوتيلا كالزون (23جنيه). الخدمة فى كراست سريعة بدون التضحية بجودة الأكل؛ فى الأوقات الهادئة نسبيًا، طلبك ممكن يوصل فى حوالى عشرين دقيقة. سلاطة الجرجير كانت روعة(31جنيه)، بمكوناتها من البصل المسكر، جبن الفيتا والبندق المُحلَى مع الخضروات الطازجة.صحيح مع وجود البندق والبصل ممكن الواحد يفترض أن السلاطة طعمها مسكر، لكن البهارات قدرت تعمل توازن، خصوصًا مع نكهة مكعبات الجبن الفيتا بملحها الخفيف والتتبيلة الفرنسية. كراست قدر يميز نفسه عن باقى مطاعم البيتزا باستخدامه لأفران خشبية. فكرة عدم تعرض العجينة لدرجات الحرارة العالية الموجودة فى النار المولدة بالغاز بـ يمنع نشفان العجينة. مع اختيار نوعية جبنة موتزاريلا كويسة، طعم البيتزا مش بس لذيذ، لكن قوامها كمان مميز. ما كانتش مفاجأة أن بيتزا السى فود (45جنيه)، المكونة من جمبرى، وكاليمارى وصلصة طماطم مخصوصة، قدموا سيمفونية رائعة من المأكولات البحرية. من بين قسم البيتزات الخاصة، عجبنا كمان طعم بيتزا بلانكو (36جنيه) مكونة من ثلاثة أنواع من الجبنة مع جرجير وبصل مسكر، ومغطاة بكمية كبيرة من صوص البيستو وصلصة الطماطم، صحيح أنها كانت مملحة شوية بالمقارنة ببيتزا السى فود، الصوص مع مزيج الجبنة العبقرى اتحدوا لتقديم خليط رائع. كراست بـ يقدم بيتزا إيطالية لذيذة بحق وحقيق بأحجام كبيرة، وده يخليها منافس قوى فى منافسات "أجمد بيتزا فى القاهرة" اللى دائمًا وأبدًابـ تعمل جدال عندنا فى المكتب.

...

فينيز: بيتزا وبس في شارع 9 في المعادي
اصدرت في: 13/07/2013

لقينا محل جديد في شارع 9 في المعادي، أه ده بجد! شارع 9 اللي المحلات فيه جنب بعض وفوق بعض وناقص تبقى جوه بعض، ولسه بـ يفتح فيه محلات جديدة، ده غير المحلات اللي بـ تغير نشاطها كل فترة وبـ تغير شكل الشارع. وهـ يفضل شارع 9 من أهم الشوارع التجارية والحيوية مش بس في المعادي لكن في القاهرة كلها. تحت كافيه «كوستا» شوفنا مطعم «ڤينيز – Vinny's» اللي لسه فاتح قريب من حوالي 4 شهور، بـ يقدم بيتزا وبس، وفيه بار سلاطات وعصائر فريش، المطعم بـ تنزل له بـ 3 سلالم كده وبـ تدخل تلاقيه صغير وفيه عدد قليل من الترابيزات، مرتب وأنيق والمزيكا اللي شغالة فيه حلوة قوي، هارد روك على أصوله، قديم وجديد، واضح أن أصحاب المكان مزاجهم عالي، ولاحظنا كمان أن كل العاملين شباب وواضح أن هم أصحاب المكان وده مشروعهم الشخصي، لأن كل حاجة في المحل تحس أنها معمولة بمجهودات ذاتية. حتى البيتزا لما جاءت لنا كانت كأنها بيتي ومخبوزة في فرن البيت، بس مش معنى كده أنها وحشة خالص، بالعكس البيتزا هنا إيطالية زي الكتاب ما بـ يقول، رقيقة جدًا ومتناثر على الخبيز الأبيض المقرمش حبات الدقيق اللي تفكرك بالعيش الشامي والفطير، يعني مش زي أي بيتزا ممكن تجيبها من أي حتة. المنيو فيه 3 أحجام للبيتزا، الصغير (35 جنيه) والوسط اللي المفروض يكفي فردين (من 52 لـ 57 جنيه)، والعائلي (من 69 لـ 78 جنيه)، وفيه بار سلاطات بحجمين بسعر 15 و 29 جنيه. وممكن تحلي بعد الأكل بيتزا فطيرة التفاح ( 18 جنيه) أو بيتزا الشوكولاتة والمارشمالو (23 جنيه)، يعني حتى الحلو بيتزا، بس ما كانش فيه فرصة نجربه لأننا شبعنا جدًا بسبب طبق السلاطة العملاق اللي عملناه من البار، وكان فيه باستا فوسيلي بالتونة وسط السلاطات، لذيذة جدًا فملينا منها طبق السلاطة وبقيت وجبة في حد ذاتها، وبشكل عام السلاطات فريش ومخدومة كويس قوي وممكن أي حد ييجي هنا مخصوص علشان يستمتع بطبق سلاطة بس ويمشي، كول سلو ومشروم فريش وبطاطس وسوتيه بالمايونيز وذرة حلوة وعنب وكابوتشا، بداية مبشرة جدًا. البيتزا زي ما قلنا، بيتي وإيطالي، رقيقة ومقرمشة وطلبنا عليها إضافات من الجبن والفلفل الرومي المشوي (8 جنيه) وكان عليها صلصلة طماطم خطيرة وقطع المشروم والزيتون الكالاماتا، طلبنا واحدة بالدجاج بصوص الباربيكيو وواحدة بالببيروني والهوت دوج، ما عندناش أي ملاحظات على الطعم ولا طريقة التقديم ولا النظافة، ومستوى الخدمة كان راقي ومهذب لكن ينقصه بعض الخبرة والاحترافية، بعد ما استمتعنا بوجبتنا وأجواء المكان المريحة للأعصاب أخذنا معانا باقي السلاطة "الرائعة" تيك آواي وشكرناهم على كل حاجة في التجربة وقررنا نقول لكم أن فيه مكان جامد جدًا وحديث جدًا في شارع 9 اسمه «ڤينيز» بـ يعمل بيتزا وبس، بس بيتزا ما حصلتش.

...

برونتو: تيك آواي وخدمة توصيل في زهراء المعادي
اصدرت في: 01/11/2012

"برونتو" يعني "بسرعة" باللغة الإيطالية، الكلمة دي مستخدمة على محلات كثير في مصر مع اختلاف نوع السلع أو الخدمات اللي بـ تقدمها. والمرة دي كان مطعم أكلات سريعة وفطائر وبيتزا، مافيهوش مكان للجلوس، كله تيك آواي أو توصيل. ونقدر نقول أن المقال ده متخصص شوية لأن المطعم اللي بـ نتكلم عنه موجود في مجمع "بيتشو أمريكان" السكني في منطقة زهراء المعادي وهو من أهم أماكن توصيل الطعام في المنطقة المحيطة الهادئة جدًا، وقليلة المحلات جدًا جدًا، وبـ يعتمد عليه السكان هناك في الأوقات المتأخرة لأنه شغال 24 ساعة، وكمان لأنه بـ يعمل كل أصناف المأكولات والوحيد من نوعه في الحي هادئ. وبـ نقول أن المقال متخصص لأنك مش هـ تعدي على «برونتو» أو تتصل به إلا لو كنت عايش هناك أو رايح لحد من أصدقائك في المربع ده لأن مافيش حاجة ثانية تتعمل هنا غير السكن والزيارات العائلية.المطعم صغير وتصميمه زي أي محل بيتزا أو فطاطري ممكن تشوفه، لكن الجديد هنا أنه بـ يعمل وجبات دجاج روستو وكباب حلة وبانيه وسمك فيليه مع الأرز بالخلطة والخضروات، بجانب الباستا والنجرسكو وأشكال مختلفة من المعجنات، وهـ تلاقي كل أنواع السلاطات والمقبلات والبيتزا الشرقي والإيطالي والفطائر الحلوة والحادقة وكريب وساندويتشات.جربنا خدمة التوصيل واتصلنا عملنا طلب لما كنا في بيت قريب من المجمع السكني اللي قولنا عليه وحسبنا الوقت اللي هـ يوصل لنا فيه وكان تقريبًا 45 دقيقة. بس ده لأن الطلب كان عبارة عن وجبة رول دجاج مخلي ومحشي (33 جنيه) مع الأرز بكبدة الدجاج، وفطيرة شرقي باللحوم حجم كبير (39 جنيه) وإسباجيتي بالجبنة الرومي (6 جنيه) وكريب بالشوكولاتة (13 جنيه) والمكسرات لزوم التحلية، طلب كبير وفيه شغل؛ فـ توقعنا بعض التأخير.الصنعة وشطارة الشيف ظاهرة في كل الأكلات، رول الدجاج أكلة مش سهلة ومع ذلك طلعت تحفة وبهاراتها تمام ومخدومة كويس قوي، والأرز بالخلطة كان لذيذ وكثير. الفطائر والمكرونات هي لعبة «برونتو» وما تفاجئناش لما لقيناها حلوة وغنية بالحشو والجبن السايح والمذاق الأصلي للفطيرة الشرقي. والسلاطات (الطماطم والطحينة) معقولة بس مش بجودة الأكلات الرئيسية. طبعًا فيه حجمين للبيتزا أو الفطير والمكرونات والساندويتشات، واللي تأكدنا منه في تجربتنا دي أن الشيف شاطر جدًا في كل المأكولات الحادقة والأطباق الرئيسية، لكن المأساة كانت في كريب النوتيلا بالمكسرات والموز اللي طلبناه وما قدرناش نأكل منه قضمتين. عجين سميك ومش مستوي خلانا مش قادرين نمضغ ولا فتفوتة، وتخلصنا منه كله رغم كل الشوكولاتة والمكسرات اللذيذة اللي عليه. «برونتو» حل سهل وسريع لما تتزنق في عزومة أو لما البيت يكون مافيهوش أكل أو الأكل اللي فيه مش على مزاجك، اتصل أو عدي عليهم لو كنت قريب وهـ تلاقي هنا كل ما لذ وطاب وبأسعار هينة ما تبوظش ميزانية الشهر. أكيد كل منطقة فيها واحد زي «برونتو»، هـ نحاول نعدي على كل حي ونكتشف لكم «برونتو» الخاص بها.

...

جينجر: كافيه شيك ومنيو سحور بسيط في المعادي
اصدرت في: 06/08/2012

كافيه صغير وأنيق قريب من كورنيش المعادي، قرر يعمل منيو خاص لرمضان علشان يكسب عدد من زبائن الفطور والسحور بعد ما خسر عدد لا بأس به من زبائن الكابوتشينو والسموزي في نهار رمضان والساعات القليلة اللي بعد المغرب لحد الفجر. «جينجر» عمل منيو إفطار بسعر ثابت هو 39 جنيه ما نعرفش مكوناته بالضبط، لأننا رحنا علشان نجرب منيو السحور اللي بـ 19 جنيه فقط، ومكوناته هي الفول بالزيت والأومليت وجبن أبيض بالخضروات وجبن رومي ونستو وعلبة زبادي. المكان واخد ركن أو ناصيتين واحدة منهم في طريق حلوان الزراعي والناصية الثانية على شارع هادئ جدًا بـ يستخدم كباركينج للسيارات. هـ تنزل كام درجة سلم علشان تدخل الكافيه، الجو ظريف والقعدات مريحة والديكورات بسيطة وفيه مزيكا حلوة في الخلفية والمسافات معقولة بين الترابيزات. المنيو العادي لـ «جينجر» فيه باستا وبيتزا وساندويتشات أطباق دجاج ولحوم، وكل مشروبات الكافيهات العادية. لكن وقت زيارتنا اللي كانت متأخرة طبعًا لأننا كنا رايحين على السحور كان أصناف كثيرة ناقصة من المنيو التقليدي للمكان اللي كنا عاوزين نجرب منه البرجر الأمريكي الضخم اللي قالوا لنا عليه في زيارة سابقة للمكان، لكن للأسف ما كانش فيه من الأصناف العادية غير البيتزا والدجاج المقلي وبعض أنواع الباستا. طلبنا منيو السحور اللي بـ 19 جنيه، ومعاه طبق بطاطس محمرة (5 جنيه) الفول المدمس حلو قوي ولا أجدع عربية فول في شبرا، عكس ما كنا متوقعين بما أنه كافيه غير متخصص، باقي الأصناف كلها أنواع جبن جاية من الثلاجة وطبق البيض الأومليت ما كانش له طعم للأسف. والبطاطس المحمرة خطيرة وعليها بهارات وزعتر، لذيذة قوي. يعني نقدر نقول أن منيو السحور ده مش مشبع قوي والكميات اللي فيه قليلة لكن القعدة الهادئة في المكان عوضت موضوع الكم ده شوية، ومافيش مانع أنك تطلب وجبتين سحور لو كنت جعان قوي. جربنا بيتزا هاواي الحارة (40 جنيه) بالدجاج والأناناس والجبن، حجمها وسط وكفاية لفرد واحد، سمكها ممتاز وقرمشتها حلوة والموتزاريلا فيها كثيرة، هي كانت غريبة شوية أننا نطلب بيتزا وسبايسي كمان وقت السحور، لكن كنا حابين نتعرف على مستوى الأكلات العادية في الكافيه، ونقدر نقول أن «جينجر» نجح بامتياز في اختبار البيتزا ولسه عاوزين نكتشف البرجر بتاعه في مرة ثانية. الأسعار بـ يضاف عليها 12% خدمة، والخدمة جيدة بس بطيئة شوية، والمكان نظيف ومكانه سهل وقريب من شركات وأماكن عمل كثير في المعادي، يعني ينفع يبقى مكان تقضي فيه فترة الراحة مع فنجان القهوة في الأيام العادية بعد رمضان. ومنيو السحور والإفطار فكرة كويسة بس كان لازم يشتغلوا عليها أكثر شوية، فيه أحسن من كده.

...

مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا