إكسسوارات تسوق in الدقي Cairo, Egypt

تسوق

بإيدي هوم ستور: إكسسوارات منزلية يدوية الصنع في المهندسين
اصدرت في: 28/09/2014

المقال كان من المفترض أنه يكون عن مجموعة من الإكسسوارات المميزة، واللي تحت اسم "زنوبيا". وبغض النظر عن أننا حاولنا نوصل للمحل في المرة الأولى بس ما عرفناش لأن العنوان كان موقعه غلط على الخريطة في صفحتهم على الفيسبوك- لما وصلنا أكتشفنا أن المحل اسمه بإيدي هوم ستور – B2eedy Home Store، وأنه بـ يبيع كمان مجموعة مميزة من الإكسسوارات المنزلية الخشبية والمصنوعة يدويًا. كان لازم ننبه أصحاب المكان أن مشكلة العنوان دي لازم تتحل، وضحوا أننا مش أول ناس تشتكي من الموضوع ده... فكر كام شخص ممكن يكون أتبع الخريطة وما وصلش فقرر أنه ما يروحش لهم ثاني. شخصيًا، لو ما كانش المرواح لهم ثاني من صميم شغلنا ما كناش حاولنا ثاني، وخصوصًا أنهم ما ردوش على التليفون في المرة الأولى علشان نستفسر عن العنوان. بس لازم نعترف أن المكان يستحق محاولتنا في الوصول إليه. أول حاجة بدأنا فيها كانت منتجات "زنوبيا"، وهي إكسسوارت حريمي فكرتها قائمة على الحنين لكل ما هو عتيق وكلاسيكي، ولكن في شكل حداثي بسيط وفكاهي في نفس الوقت. زي مثلًا ميداليات مفاتيح عليها لوجو ماركة المصاصات الشهيرة "Chupa Chupas" واللي عمله الفنان السيريالي سلفادور دالي (30 جنيه)، ومجموعة من السلاسل الطويلة منها واحدة عليها "أنا أحب أمي" (45 جنيه). ده غير مجموعة من العلب المعدنية اللي عليها صور ممثلين كلاسيكيين زي أحمد رمزي مثلًا (40 جنيه). المعروضات كثيرة ومتنوعة لازم تتشاف بالعين لأننا ممكن نقعد نحكي عنها للصبح، الجميل كمان أنك ممكن تعمل عندهم إكسسوار بصورة معينة عجباك. بقية المحل مليء بإكسسوارات المنزل، أول حاجة عجبتنا كان طقم فناجين قهوة من الزجاج الأبيض الشفاف المُطعم بالصدف بطريقة الأرابيسك (12 قطعة 850 جنيه)، كان فيه زيّه مجموعة من الكاسات (6 قطع 650 جنيه)، ولكن ما كانوش بجودة صنع الطقم الأول. بنفس تيمة الأرابيسك لقينا صواني خشبية قاعدتها مُطعمة بالصدف متوفرة في 3 أحجام: الصغير (180 جنيه)، الوسط (260 جنيه)، والكبير منها (350 جنيه). وعلشان تكمل الطقم، فيه مجموعة كبيرة من العلب الخشبية المُطعمة بالصدف أصغر حجم منها بحجم كف اليد (40 جنيه)، والوسط (135 جنيه) أما أكبر حجم (190 جنيه). ثاني ركن استكشفناه كان ركن مليء بأطقم الفوط المصنوعة من القطن، الحقيقة أنهم ما أبهروناش لأنك ممكن تلاقي زيهم بالضبط معروضين في أي معرض من معارض شركة العامرية للنسيج بسعر أقل، المهم أن الطقم منهم 3 قطع بمقاسات مختلفة (210 جنيه). الركن الثالث والأخير كان غالب عليه المنتجات الخشبية، واللي بـ تتنوع ما بين أطباق المكسرات متعددة الخانات بأشكال وأحجام مختلفة، منهم مثلًا واحد مربع الشكل ومكون من 5 أطباق قابلة للانفصال (225 جنيه)، ده غير الكوسترز Coasters للأكواب والأواني (80 جنيه)، وألواح التقطيع (85 جنيه). المنتجات كثيرة ومتوفرة بأشكال مختلفة صعب أننا نذكرها كلها هنا، إحنا حتى لاقينا كرسي Stool بدون ظهر من الخشب وقاعدتة من الشبك، صحيح حجمه صغير على سعره (500 جنيه) بس نعترف أن تصميمه عجبنا، آخر المعروضات المبتكرة اللي عجبتنا كانت مجموعة من الأباجورات المصنوعة من زجاجات قديمة الصغيرة (175 جنيه) والأكبر (200 جنيه). زي ما قلنا، لازم تروح تستكشف المكان بنفسك، وخصوصًا لو نفسك تهادي شخص اشترى بيت جديد، أو لو حتى نفسك تشتري لبيتك قطعة مميزة من وحي الطبيعة... وعلى فكرة مش هـ تتوه علشان توصل زيّنا، لأننا معلمين موقع المحل صح على خريطتنا.

...

 صبايا: ملابس حريمي في المهندسين
اصدرت في: 27/09/2014

نعترف أن المقال النقدي ده مكتوب بالصدفة البحتة. هي قصة طويلة ملخصها أننا كنا بـ ندوّر على مكان معيّن، بس منهم لله أصحاب المكان حاطين مكانهم على الخريطة غلط... نحاول نكلمهم على موبايل المحل مش بـ يردوا! فقررنا أننا نستخدم الخطة البديلة، وهي أننا نلاقي أي مكان ما كتبناش عنه قبل كده في المنطقة اللي إحنا فيها، فلاقينا صبايا للملابس الحريمي. كلنا عارفين أن أي محل ملابس مش بـ يقدم ماركة مشهورة، أو على الأقل موجود في مول، فرصته في المنافسة الأيام دي محدودة إن لم تكن شبه معدومة، إلا لو القطع اللي بـ يقدموها مختلفة ومميزة بدون الخروج عن إطار الموضة. كعادة المحلات دي، المعروضات عددها كبير ومتباين في الأذواق، علشان يقدروا يوصولوا لأكبر عدد من المشترين. أول مجموعة صادفتنا كانت عبارة عن بلوزات بسيطة وتفاصيلها بسيطة من الشيفون، قصيرة الطول والأكمام، ألوانها ما خرجتش عن الأبيض، الكريم والوردي الهادئ، أسعارها بـ تتراوح بين 185 و215 جنيه، نتصور أنهم ينفعوا لكتب كتاب صباحي مثلًا. أما اللي بـ يحبوا البلوزات تكون طويلة وبأكمام، لاقينا منهم واحدة أو اثنين منقوشين من الستان، نقشتهم بالنسبة لنا كانت زيادة عن اللزوم، سعر واحدة منهم (213 جنيه). من المعروضات الموجودة بكثرة الفساتين الصيفية الطويلة من الشيفون بنقوش مختلفة، لاحظنا أن كلها بلا حمالات، عجبنا منها واحد لونه سيمون (320 جنيه). فيه كمان عدد محدود من فساتين السهرة القصيرة من الستان، لاقينا منهم واحد سعره (280 جنيه). طبعًا الكلمة السحرية اللي ممكن تبسط أي مهووسة تسوق هي "تخفيضات"، صبايا عامل تخفيضات على مجموعة من التي شيرتات القطن واللي سعر الواحدة منهم بـ يتراوح ما بين (50 و70 جنيه) بعد ما كان سعرهم في حدود (185 جنيه). البنطلونات عددها محدود بالنسبة للقطع الأخرى ومعظمها غامقة وسادة تناسب سهرة أو خروجة مهمة لأن قماشتها لامعة، عدد البنطلونات الجينز قليل وسعرهم لا يقل عن (270 جنيه) للواحد. صبايا بـ يعرض مجموعة من الإكسسوارات اللي بـ تناسب كل أنواع الملابس، منها حلق فضي فيه أحجار زرقاء (50 جنيه)، وعقد طويل فيه دلاية هلالية الشكل (55 جنيه). ده بجانب الإيشاربات بخامتها وأشكالها المختلفة، لاقينا منها قطني مربع الشكل ومنقوش (75 جنيه). ما نقدرش نقول أن صبايا هو أول وجهة ننصح بها لأي مهووسة تسوق، ولكن ده ما يمنعش أنه يستحق الزيارة من آن لآخر يمكن تلاقي قطعة مميزة كده ولا كده.

...

توب تويز: لعب أطفال وهدايا في محل بروح الكريسماس بالدقي
اصدرت في: 22/12/2011

وأنت ماشي في شارع محيي الدين أبو العز ومتجه لنادي الصيد قبل ما تحصل مطعم «ماكدونالدز – MacDonald’s» هـ تلاقى على إيدك اليمين محل فاترينته زجاج كبيرة واسمه «توب تويز – Top Toys». أرانب وعرائس كبيرة لابسة لبس كريسماس، أراجوز ماشى على الحبل رايح جاي، شمسية بـ يطلع منها فوم أكنه ثلج بـ يقع من السماء، كل ده كان عنصر جذب ناجح فى فاترينة العرض، حتى الأطفال ماشيين مع مامتهم بـ يتسمروا أمامها وعلى وشهم ابتسامة عريضة وطبعًا "بـ يشبطوا" في اللعب اللى اكتشفنا بعد كده أنها مستوردة ومش للبيع! دي حركة من أصحاب المحل علشان يجروا بها رجل الأطفال وكل اللى ناوي يجيب هدايا في الكريسماس لعائلته وأصحابه. فاترينة المحل كبيرة على عكس حجم الباب الصغير جدًا اللى لما تفتحه ما تعرفش تدخل من كمية الميداليات الفرو والدباديب والحيوانات المحشوة الصغيرة اللى معلقة وراء الباب الزجاج، تدخل تلاقى نفسك دخلت عالم كبير وضخم من اللعب الموجودة في كل شبر من المحل، ده بجد! مش هـ تبقى عارف تبص على إيه ولا إيه، وهـ يبقى لسان حالك بـ يقول: "ابدأ منين؟"، المكان مبهر وبجد مش عارفين إحساس الأطفال هـ يكون عامل إزاي لو كانوا مكاننا لأننا كان عندنا إحساس أننا عايزين نشتري كل حاجة. المحل مكون من دورين، الدور اللى تحت للأطفال الكبار شوية ومستلزمات الكريسماس من شجر وزينة وجوارب هدايا بابا نويل وغيرها من حاجات لها شكل وروح احتفالات رأس السنة، والدور اللي فوق للأطفال الرضع ومستلزماتهم من عربيات وبيبرونة وسراير وغيرها. وأنت طالع على السلم مش هـ تلاقى غير مساحة صغيرة جدًا تمشي فيها لأن فيه أكوام صناديق لعب محطوطة في كل حتة على السلم. اللعب الموجودة فيها تنوع كبير جدًا، فيه البازل والمكعبات والعربيات وسي دى تعليمي وكارتون ولعب محشوة لشخصيات ديزنى العالمية زي Sponge Pop وSmurfs وبطوط وميكى وغيرها، والفرو والبلاستيك والباربي وتوك شعر وإكسسوارات أطفالي للبنات ولعب القتال والحرب والعربيات للأولاد. أكثر روح مسيطرة على المحل هو الكريسماس، فيه شجر أعياد الميلاد بألوان خضراء وبيضاء بأحجام مختلفة، البيضاء حجمها صغير وتحس أنها مافيهاش فروع كثيرة بـ 75 جنيه، الأكبر ولونها أخضر بـ 285 وفروعها جميلة وفيها "جليتر" كانت جذابة جدًا، وكل حاجة ممكن تتخيلها إما هـ تلاقي عليها بابا نويل أو شكل كرات الثلج أو الغزلان بتاعة الكريسماس. عند الكاشير فيه لعب وميداليات صغيرة وبرفانات حجمها صغير للبنات بحوالى 37 جنيه، وفيه برضه لعب مصنوعة من الخشب وبـ تتحرك لما تدوس عليها من تحت بـ 6 جنيه وأقلام جاف ورصاص عليها لعب من فوق، وكروت معايدة وبالونات هيليوم وتغليف هدايا. المحل بجد رائع وأسعاره معقولة لو حابب تجيب كمية هدايا لناس كثير والميزانية ما تخرمش معاك وتكون حققت المعادلة الصعبة بأنك تجيب هدايا جامدة ومش مكررة وجودتها كويسة وفي نفس الوقت سعرها معقول، لكن نصيحة ما تأخذش معاك أولادك المحل لأنهم هـ يخلوك تخرج بكل حاجة فيه، كفاية اللى أنت هـ تشبط فيه!

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن