ملابس حريمي تسوق in المعادي Cairo, Egypt

تسوق

بيرل بوتيك: محل أزياء وأكثر في زهراء المعادي
اصدرت في: 02/03/2015

شارع زهراء المعادي تحول في البداية من أنه منطقة صحراوية، لمنطقة سكنية، ودلوقت بقى منطقة تجارية، فيه محلات لبس كثيرة ومحلات ديكور (أثاث منزلي)، وكل اللي تحتاجه، بس في الفترة الأخيرة فتح أكثر من محل أزياء خاص بملابس السهرة والمناسبات الخاصة، فأشعل المنافسة على المحل اللي روحناه ولسه فاتح من شهر "بيرل -Pearl ". أول ما بـ تدخل بـ تلاقي صاحبة المحل بنفسها معاك لو محتاج تسأل عن أي أسعار، أو لو عاوز تشوف صور موديلات مختلفة وتختار الموديل اللي تحبه، لأنهم بـ يفصَلوا ودي في حد ذاتها ميزة. الجميل أن المحل مافيهوش فساتين بس، لأ ده فيه كل حاجة ممكن تحتاجها سواء جاكيت أو جيبة أو تايير، كل قطعة لوحدها عادي. عجبنا تايير مكون من توب بيج كات وجيبة أبيض شفافة في بيج مخططة بالعرض بس طبعًا محتاج البطانة بتاعته تطول شوية للمحجبات، كمان كان فيه توب أسود عليه دوائر صغيرة مرصعة ذهبي على الأيد ومن تحت لحد أول البطن بـ 550 جنيه، وتوب ثاني سادة عليه دوائر زيها أخف ولونها فضي بـ 350 جنيه، ولو عاوزة جيبة بس كان فيه جيبة بيج مشجرة (Fleurie) برضه كانت حلوة قوي وبـ 450 جنيه. أما عن الموديلات الغريبة فكان فيه فستان أسود عادي بأكمام طويلة وكل حاجة، لكن من فوق بعد الصدر بحاجة بسيطة عليه دانتيل شفاف مسافة كبيرة وبعدين مكمل بالقماش الأسود، وقبل الركبة بحاجة بسيطة عليه برضه مسافة كف أيد كده دانتيل شفاف أسود، فى الحقيقة إحنا نتمنى أنهم ما ينسوش البطانة وإلا.. يعنى كل واحد حر بقى، وهو بـ 1800 جنيه عامة. أما آخر فستان فكان أسود وواخد موديل مضبوط من فوق ومن تحت على شكل سمكة ومن الجانبين البطانة لونها بيج وفوقها دانيل أسود والحقيقة أنه كان حلو برضه بـ 1700 جنيه. كان فيه موديلات كثيرة جدًا باختلاف الأذواق، فيه اللي تلاقي فيه ترتر كثير أو دبابيس بـ تلمع من عند الصدر بشكل مبالغ فيه، كل واحد وذوقه، بس الأهم أنك تلاقي حاجة حلوة بسعر مناسب، وإن كان فيه بعض القطع مبالغ في أسعارها إلا أنه بالمقارنة بأماكن ثانية أسعارهم معقولة.

...

ترندي: أذواق مختلفة وأسعار قليلة في المعادى
اصدرت في: 21/01/2015

طبعًا معروف رغبة البنات وهي بـ تتسوق في أي مكان أن هي بـ تشعر بسعادة وبهجة لا نهائية لما تلاقي قطعة فنية عجبتها وسط حاجات كثير ممكن ما تكونش حلوة لمجرد أن شكلها عجبها وسعرها مناسب، وتقول لك: "دي لُقطة".. وده اللي حصل لنا لما رحنا "ترندي – Trendy" المحل المستقل جنب سلسلة محلات متنوعة في شارع زهراء المعادي. أول ما دخلنا المحل لفت انتباهنا تنوع ملابس الأطفال وأحجامهم، وتنوع القسم الرجالي كمان، بس طبعًا إحنا اهتمامنا بالقسم النسائي. أول حاجة لفتت انتباهنا هي مجموعة مختلفة من البنطلونات اللي رجلها واسعة كأنها جيبة من الستان المناسب للخروج بالليل، وكان فيه منه ستان سادة وستان عليه طبقة ثانية نفس لون القماش بس مفرغة والواحد بـ 215 جنيه، كمان كان عنده مجموعة كبيرة من الجاكيت الخفيف القطن بكل الألوان بـ 70 جنيه. ده غير مجموعة الجاكيتات الكبيرة manteau، كان فيه جاكيت أسود سادة بـ جيبوب من الجنب، كان حلو جدًا لولا الفرو اللي في الياقة واللي المفروض أنه ممكن يتشال بـ 350 جنيه، أما الجاكيت اللي كان حلو فعلًا، جاكيت قماشته جلد وعليه خياطة كاروهات (نوع الجلد نفسه) العيب الوحيد فيه أنه كان لونه نبيتي، وما كانش فيه ألوان ثانية وكان بـ 250 جنيه بس. كان فيه مجموعة أخرى من الجاكيتات وأسعارها مش أكثر من 400 جنيه. الحقيقة أنه كان عنده مجموعة من السويت شيرت المتميزة واللي تنفع للبيت أو للنادي والتمارين الرياضية، عجبنا واحد أبيض سادة خالص عليه بس رسمة وش ميكي ماوس على جنب صغيرة من فوق وعلى الزاوية المقابلة لها على الجنب برضه واحدة ثانية وكان بـ 135 جنيه، وواحد ثاني نفس الخامة عليه رسمة كذا حذاء باليرينا ومكتوب عليهLove Girls وكان بنفس السعر، غير سويت شيرت خامتها أثقل ومرسوم عليها دباديب ملونة بـ 165 جنيه. هـ تلاقي كمان جنبهم مجموعة فساتين سواريه أو تنفع للخروج مساءً، عجبنا واحد فيهم بحمالات خفيف روز من فوق والباقي أسود بـ 290 جنيه، فيه فساتين ستان كثير منها المشجر ومنها الستان المفرغ، وأسعارهم مش أكثر من 300 جنيه. ده غير مجموعة البنطالونات الجينز بأشكالها المتنوعة بـ 180 جنيه، وبنطالونات قطن كمان للخروج مش للتمرين بنفس السعر وفيها كل الألوان اللي تناسب ذوقك. وآخر حاجة لفتت نظرنا على الباب مجموعة كوفيات سادة صوف كل الألوان، الواحدة بـ 35 جنيه، القسم الرجالي كمان كان متنوع ما بين السويت شيرت والجاكيتات والبنطلونات، ولبس البيت. "ترندي" أسعاره مناسبة وفيه احتياجات كل أفراد الأسرة المصرية، بالذات لو الأطفال صغيرين أقل من 6 سنين وإلا مش هـ يلاقوا مقاسهم.

...

أور: بداية موسم التخفيضات وملابس متنوعة ومريحة في المعادي
اصدرت في: 27/12/2014

مع بداية فصل الشتاء ومواسم الأعياد، تبدأ تخفيضات الأسعار اللي بـ تغري المتسوقين جدًا، بالذات لما بـ تبقى على مشتريات تستاهل. محل "أور –OR " لفت انتباهنا أنه عامل تخفيض بعد ما بـ تشتري مشتريات بألف جنيه يعطيك 200 جنيه هدية تشتري بها اللي أنت عاوزه، والحقيقة أن المجموعة اللي كان عارضها في قسم السيدات متميزة ومريحة. أول حاجة لفتت انتباهنا بلوزة مشجرة بورد صغير خالص، رقيقة جدًا بـ 160 جنيه، وجاكيت خفيف مشجر بس مش باين لأن لونه أسود وفيه منه الأزرق بنفس السعر، كمان كان فيه تي شيرت سادة فيها مربعات خفيفة وفيه منها الأزرق والروز بـ 180 جنيه. وبلوزة طويلة لحد الركبة فيها رسمة في النصف بورد مبهج متدرج ما بين الأصفر والأحمر، وعلى الجنب أسود يعني الرسمة كانت مربعة والأسود عامل زي حرف الـ U، وكانت بـ 300 جنيه. أما أكثر حاجة أبهجتنا هي مجموعة السويت شيرت اللي كانت عنده لأنه كان بـ يتميز بأنه عنده كل أنواعها وأشكالها وأحجامها طويل أو قصير، وشدنا جدًا أن كان فيه سويت شيرت طويلة لحد الركبة برضه ولونها أحمر ومكتوب عليها كلمة بسيطة تحت الياقة بس وبـ 300 جنيه. كان عنده مجموعة سويت شيرت متوفر منها اللون الأسود والرمادي والأزرق الغامق مكتوب عليها جملة: "I'm not a drama queen" أو "Don't talk to me on Sunday" وكانت بـ 330 جنيه. وسويت شيرت "it's finally winter" كان بـ 280 جنيه ولونه رمادي، وكان فيه واحدة سادة خالص لونها روز وفيها مربعات بسيطة ما تبانش إلا لما تدقق لأنها من نفس اللون بـ 330 جنيه برضه. كمان كان عنده مجموعة جاكيتات متميزة منها واحد صوف كبير مفتوح وواسع لونه رمادي وفيه منه الأحمر وكان بـ 360 جنيه، والحقيقة أنه كان شكله مغري جدًا ويشعرك بالدفء، لكنه ما يناسبش كل الأجسام لأن اللبس الواسع الكبير في الشتاء بـ يظهرك بمظهر أكبر بكثير من الحقيقة. ولو بـ تدوري على حاجة تنفع لمناسبة بعد الظهر كان عنده بلوزة أسود دانتيل فيها رسومات بسيطة بين المربعات والورود تنفع تتلبس تحت جاكيت وكان فيه منها ألوان مختلفة غير الأسود بـ 200 جنيه. كمان كان فيه جاكيتات فورمال عادية وطويلة بألوان مختلفة وأقمشة مختلفة، ما قدرناش نمشي قبل ما نبص على القسم الرجالي اللي كان فيه مجموعة سويت شيرت متعددة ومتميزة وبنطلونات رياضية مريحة وجاكيتات رياضية كمان. محل "أور" يتميز أنه فيه كل حاجة، تقدر فعلًا تشتري بالألف جنيه حاجات مفيدة ومتنوعة. وهـ ينزل الأسبوع الجاي حاجات ثانية جديدة للي حابب يروح يشوفها.

...

ستوك زون: ملابس بجودة عالية وأسعار مناسبة في المعادي
اصدرت في: 15/12/2014

معروف أن محلات الستوك بـ تبقى أسعارها أرخص من المحلات العادية لأنها بـ تبيع الملابس بواقي التصدير، بس الحقيقة أن "ستوك زون – Stock Zone" قدر يوفق بين جودة الملابس وبين أسعارها المناسبة. أول ما تدخل بـ تلاحظ أن المكان مقسم لثلاثة أقسام: قسم خاص بملابس الأطفال وفيه كل احتياجاتهم ولكل الأعمار من أول 0: شهرين لحد 6 سنين، وقسم رجالي، وقسم للسيدات. دخلنا القسم الخاص بالسيدات، واللي كان متنوع جدًا الحقيقة، أول حاجة لاحظناها كان جاكيت خفيف سادة مفتوح من الظهر على شكل ثمانية وتحته قماشة خفيفة من نفس لون الجاكيت بحوالي 170 جنيه، وجاكيت ثاني سادة خالص برضه فيه منه كل الألوان بنفس السعر، وفيه كمان نفس النوع بس منقط أو عليه رسومات فراشات صغيرة ملونة. أكثر حاجة عجبتنا أنه عنده تنوع في أشكال وألوان البنطلون الجينز بطريقة عجيبة، يعني ممكن تلاقي كل أشكال وأحجام وألوان الجينز وبحوالي 150 جنيه بس. عجبنا بنطلون جينز سادة خالص لونه أزرق فاتح وأجمل حاجة أنه مش Slim، لا كان عادي، كمان كان فيه بنطلون جينز فيه خيوط بيضاء عند الركبة بنفس السعر 150 جنيه. كمان كان عنده جاكيت جلد بسوستة على الجيب اليمين والشمال شكله لطيف وفيه منه الأسود والبني والبيج، وبحوالي 460 جنيه. كمان عنده قسم بيجامات وملابس مريحة للتمرين، عجبنا أكثر حاجة السويت شيرت بتاعته، علشان فيها أحجام متنوعة وأشكال بسيطة، كان فيه شكل وجه بـ يضحك وأسنانه باينة والأسنان فيها سوستة بـ تتقفل وتتفتح وخارجة لبره، السويت شيرت كأن الأسنان هي اللي خارجة بره وبـ يعطي مساحة أكبر لك. كان فيه شكل سويت شيرت سادة خالص ومجرد ورد صغير جدًا من فوق بس، وكان فيه سويت شيرت قماشتها أخف كلها عليها رسومات فراشات بـ 174 جنيه. كان فيه كمان بلوزات هاي كول عادية سادة خالص فيها كل الألوان اللي شبه الكارينة دي مع الاختلاف أنها واسعة ومريحة وقماشتها شتوي بـ تدفى وبحوالي 65 جنيه. أما عن قسم الأطفال، فالحقيقة أنه عجبنا جدًا، لأنه مهتم بالطفل من أول يوم ولادة بالشرابات الصغنونة بتاعته والفانلات والسلوبيت والقمصان والبنطلونات وفساتين للبنات، كل حاجة الطفل بـ يحتاجها وبأسعار معقولة جدًا. أهم حاجة أنه بـ يوفر لك الأساسيات بأسعار مناسبة والخدمة هناك ممتازة.

...

جس: ماركة الإكسسوارات المميزة فى معادى سيتى سنتر
اصدرت في: 12/07/2014

مع زحف عدد كبير من الأسماء المشهورة على مشهد التسوق فى القاهرة يوم بعد يوم، أحيانًا ماركات أكثر شهرة بـ تغطى علي "جس – Guess". بعد افتتاحه لأول مرة فى مدينة النجوم بيفرلى هيلز فى أمريكا، شهرة جس سببها فى الأول كانت تصميماته المميزة من الجينزات. من ساعتها، قدر الاسم الشهير يتوسع فى إنتاج العطور، والساعات، والملابس والإكسسوارات رجالى وحريمى. مع امتلاكه لعدد من الفروع فى العاصمة، وأوكازيونات كثيرة فى كل المواسم، قررنا نروح فرعهم فى معادى سيتى سنتر. مكانه مميز أمام بوابة كارفور، بواجهة زجاجية حول ركن، معروض فيها مجموعة من شنط اليد والساعات يحتلوا الواجهة الزجاجية اللامعة. الأحسن أنك تتفرج من الخارج، ثلاث كبائن من الزجاج فيهم ساعات حريمى ورجالى، منهم حاجات أحلى من حاجات. المعروضات مختلفة، منها الأنيق الجذاب، ومنها الروش -ومنهم حاجات عليها قطع ألماس تقليد– ولاحظنا أسعار تزيد على 1500 جنيه. ساعة قوية ذهبى فى أسود لفتت انتباهنا سعرها كان 2160 جنيه. مع هيكل العرض الضعيف، ممكن تشعر أن المجموعة المعروضة مش مريحة؛ فى وجود الموظف الهادئ، جس يعتبر مكان مناسب للفرجة براحتك. صحيح أن موجود ساعات رجالى، باقى المحل بـ يركز على الحريمى، بس مافيش أى ملابس، إكسسوارات فقط. وقت زيارتنا، كان معلق على حائطين مجموعة شنط يد عليهم تخفيض، أما المجموعة الجديدة كانت موجودة برضه؛ على موضة "جس" الخاصة، معظم المعروضات يزينها طباعة على شكل حرف G الشهير، سحّاب على شكل حرف G، وطبعًا فيهم درجة من البريق واللمعان. المحافظ موجود منها كل الأشكال والأحجام، أسعارها تبدأ من حوالى 400 جنيه، شنط كلاتش بحوالى 700 جنيه، شنط سفر وكتف تبدأ من 1500 جنيه. من الأوكازيون، لاحظنا شنطة يد بأبزيم لونها صخرى من مجموعة باليرمو سعرها نزل من 1000 جنيه لغاية 732 جنيه. معروض كمان مجموعة صغيرة من الأحذية خارج الأوكازيون، منها أحذية باليرينا سوداء وعنابى، وزوج حذاء رمادى من الجلد السويدى (700 جنيه) كانوا أبرز المعروض من القطع اللى عليها إقبال. مجموعة أكبر من الأحذية داخلة فى الأوكازيون منها شباشب شيك، وصنادل وأحذية بكعب، كلهم عليهم 50% خصم. أسعار الحلىّ تبدأ من 200 جنيه، مع سلسلة مفاتيح روشة (165 جنيه)، وعطور، وأحزمة جلد وجلد ماعز (+400 جنيه) كلهم متوفرين. رغم أنه غير مناسب لكل الأذواق، لكل السيدات المهتمات بالماركات، جس أسعاره معقولة عن كثير من الماركات الثانية فى القاهرة. فرع المعادى أثبت أنه يملك تشكيلة كبيرة من الإكسسوارات، خصوصًا شنط اليد، والساعات والأحذية.

...

مونسون: موضة جديرة بالثقة فى المعادي سيتي سنتر
اصدرت في: 26/11/2012

تغيير المواسم ومجموعات الملابس الجديدة اللى بـ تنزل هنا وهناك بـ يتيحوا للمتسوقين فى القاهرة نظرة شاملة على المحلات المتميزة. الماركة الإنجليزية «مونسون – Monsoon» لها فرعين فى القاهرة، واحد منهم موجود فى المعادى سيتى سنتر. الفرع ده واسع ومريح، خالى من الموسيقى المزعجة ودوشة الزحام. لما شوفنا أرفف المعروضات لاقينا شوية حاجات تستحق الشراء.نبدأ بالحاجات الأساسية، "مونسون" عنده تي شيرتات قطن طرية بكم طويل سعرها 165 جنيه ومجموعة لطيفة من البنطلونات الجينز بألوان الشتاء الرقيقة زى الأسود، والبنفسجى والأحمر الغامق (400 جنيه). بلوفرات قطن مفتوحة سعرها 390 جنيه، فى حين أن تي شيرت أسود بسيط بدون أكمام ممكن ينفع للخروج بالليل سعره 260 جنيه. اختيارات كثيرة من بين الفساتين القصيرة المريحة منها فساتين تريكو ناعمة باللون البرتقالى سعرها 620 جنيه وواحد أكمامه قصيرة سعره 515 جنيه. لو بـ تفكرى فى حاجة مزخرفة أكثر، فستان باللون الأزرق الغامق بـ 620 جنيه عليه رسم قبائلى مكرر.لفت انتباهنا سترة رمادى تقفيلها مهترئ عن قصد سعرها 620 جنيه، وكمان السويترات التريكو اللى عليها شكل بلورات الثلج snowflake الشتوية المعتادة (565 جنيه). ممكن كمان تلاقى بنطلونات صوف عند مونسون سعرها 670 جنيه، وبالطو قطيفة (820 جنيه) لونه قريب من الأزرق السماوى.فى الناحية الثانية من المكان فيه اختيارات أكثر من الفساتين. أشكال كثير موجودة من توبّات سهرة مزينة بالترتر والخرز سعرها بين 400: 500 جنيه. هـ تلاقى كمان قمصان شفافة تصميماتها جذابة وفيه منها حرير (565 جنيه). بعد كده فيه الفساتين، وكانت مش مبالغ فيها قوى، تقدري تلاقى فساتين بألوان سادة منها الوردى، أو حتى ألوان ثانية مبهجة أكثر. فيه كمان فساتين سوداء متعددة الاستخدامات عليها أشكال كروشيه. أسعار الفساتين بـ تبدأ من 800 جنيه لزيادة شوية عن 1000 جنيه.مونسون بـ يقدم كمان إكسسوارات مع أحذية سوداء كعب عالى سعرها 670 جنيه وأحذية فلات لونها أزرق بـ 330 جنيه. كمان فيه مجموعة بسيطة من الشنط، منهم واحدة على شكل قوس برباط سعرها 330 جنيه.لازم كمان نشير لقسم الأطفال الموجود داخل المحل وتشكيلته من ملابس الباليرينات. مع الفساتين المنفوخة المزينة بخامة شفافة وخرز بـ يلمع، وألوان جميلة زى الوردى الفاتح، والرمادى المائل للفضى والأبيض، من الآخر ده حلم كل بنت صغيرة. الفساتين أسعارها حوالى 400 جنيه وأحذية الباليرينا 200 جنيه. عندهم كمان قفازات بدون أصابع (85 جنيه)، وكوفيات بـ 125جنيه، وقبعات صوف وملابس داخلية للأطفال. رغم أن بعض الأسعار ممكن تسبب مشكلة فى الميزانية، لكن جودة المنتجات تستاهل المبالغ المدفوعة وبـ ننصح أى حد عاوز يتسوق فى القاهرة أنه يروح "مونسون".

...

سبرينجفيلد: ملابس كاجوال رجالي وحريمي في المعادي
اصدرت في: 12/11/2012

أول معرفتنا بمحلات «سبرينجفيلد - Springfield» كانت من خلال الفرع الموجود في سيتي ستارز، وبدأنا نتردد عليه من وقت للثاني ورغم أن فيه موديلات بـ تعجبنا إلا أن كثير كنا بـ نلاحظ أن فيه أسعار مبالغ فيها وما فكرناش نقضي وقت أطول في المحل علشان نتفرج على كل حاجة فيه.لكن المغري في فرع المعادي سيتي سنتر (كارفور) اللي بـ نتكلم عنه النهارده أنه حاطط لافتات كبيرة عند كل المعروضات وعليها أسعار مغرية. صحيح لما دخلنا اكتشفنا أن الرقم المكتوب على اللافتة معناه أن "الأسعار تبدأ من" لكن برضه كانت الأسعار معقولة خاصة في الموديلات الصيفي والخريفي اللي عليها تخفيضات كبيرة. وكمان الموديلات الشتوي الجديدة فيها أسعار هينة تغريك بأنك تجرب جاكيت ولا اثنين.المحل في الممر الرئيسي للمحلات في سيتي سنتر على الصف المواجهة للهايبر ماركت أو كارفور نفسه. مساحته كبيرة بالمقارنة بباقي المحلات اللي حوله. إضاءة هادئة ومزيكا هاوس عالية وديكورات بألوان وبوسترات مبهرة وجو عام ظريف، لكن مريح في التسوق أو لأ دي حاجة ترجع لطبيعة "المتسوق" نفسه. القسم الرجالي واضح أنه أغنى من القسم الحريمي في عدد المعروضات اللي واخدة مساحة أكبر في المحل، وفي شكل الموديلات اللي فيها تنوع أكبر منها في الحريمي. تقريبًا أكثر حاجة إحنا شايفينها مميزة في «سبرينجفيلد» هي القمصان بكل أشكالها. أسعارها بـ تبدأ من 299 جنيه وبـ توصل لـ 350 جنيه، وهـ تلاقي كل النقشات من الأقلام الرفيعة والكاروهات والسادة، لكن الأكيد أنها هـ تعجبك وهـ تلاقي مقاسك دائمًا، ده غير أن عندهم قمصان Smart Size العجيبة اللي بـ تليق على أي جسم بقصاتها الفريدة. الجينز هنا بـ يبدأ من 300 جنيه، وفيه موديلات الجبردين بالألوان الفاقعة زي الأحمر والأصفر (اللي زي المسطردة) والأزرق وغيره ودي بـ 349 جنيه، وفيه موديلات جينز عادية تنفع كلاسيك أكثر. فيه سويت شيرت بكل الألوان والموديلات بأسعار تبدأ من 200 جنيه، وخامتها ثقيلة ومناسبة لبرد الشتاء. البول أوﭭر والجاكيت منتهى الأناقة في «سبرينجفيلد» بأسعار من 250 لـ 1000 جنيه، بس تأكد أن كل موديل هـ تشوفه هنا مش هـ تلاقي شبهه في مكان ثاني. وفيه عدد من موديلات البول أوﭭر بألوان مجنونة ورقبة عالية وألوان زاهية شبه اللي كانت موجودة في السبعينيات، تقريبًا دي أكثر حاجة عجبتنا في المحل. وجربناها في اللبس وكان شكلها غير عادي. بس عاوزة جرأة مافيش كلام. «سبرينجفيلد» مشهور بالتي شيرت الـ Basic السادة بكل الألوان بأسعار من 99 لـ 120 جنيه. تفصيلته خطيرة وألوانه متينة ومش بـ تطلع في الغسيل مع الوقت عن تجربة.الركن البناتي هادئ وكل حاجة فيه لها شبيه في القسم الرجالي تقريبًا، والألوان نفسها وقورة ورجالي بزيادة إلا فيما ندر. أسعار التوب من أي موديل بـ تبقى بـ 199 جنيه والجينز بـ 300 جنيه. ومش هـ نخوض كثير في القسم الحريمي لأن ده محتاج زيارة بناتي متخصصة أكثر. الخدمة معقولة وإن كان بعض العاملين ينقصهم بعض الخبرة و"مخضوضين" شوية مش عارفين ليه! لكن هـ تحس أنك براحتك وأنت بـ تتمشى بين الأرفف وممكن تجرب زي ما أنت عاوز بمساعدة الموظف اللي معاك. اعمل زيارة لسبرينجفيلد في فرع سيتي سنتر المعادي بس املأ محفظتك أو عمَّر كريديت كاردك، بس المهم أنك هـ تنبسط.

...

ثيودورز: أثاث عملى تحفة فى المعادى
اصدرت في: 21/08/2012

مافيش شك أن مشهد التسوق فى القاهرة بـ يشهد مؤخرًا انتشار كبير لسوق الأثاث والتحف إلى حد كبير، وبقت حاجة طبيعية أنك تلاقى محل تحف فى أى مكان قريب منك. الشعبية المتزايدة للموضوع ده بـ يتركز أكثر فى مناطق الزمالك والمعادى، وعلشان ثيودورز واحد من الأسماء المشهورة فى المجال، قررنا نأخذ فكرة. المحل مخفى شوية فى منطقة منعزلة فى المعادى، ومظلل نتيجة وجود شمسية مخططة فوقه، وطبعًا الظل أكيد حاجة كويسة فى وسط شمس الصيف الحارقة. يافطة المحل الكبيرة ولون المكان الأزرق من بره اللى يخطفوا العين هما مصدر الألوان الوحيد وسط المكان الهادئ. زجاج العرض الخاص بالمحل بـ يقدم كمان ألوان مع مجموعة من الترابيزات بألوان زاهية، بالإضافة لمجموعة كراسى لونها بنى غامق، القطع المعروضة مشوقة وبـ تحمس الناس أنهم يدخلوا ويشوفوا المحل بـ يقدم إيه ثانى. رغم أن المكان من الداخل مكيف الهواء، لكنه صغير شوية وضيق. موسيقى الـ Oldies كانت طالعة من السماعات فى وقت زيارتنا، وده حسسنا أننا رجعنا لفترة السبعينيات. معظم مساحة المحل معروض فيها ترابيزات طعام مصممة على الطراز الفيكتورى الرائع ومصنوعة من خشب البلوط الأبيض سعرها 12.000 جنيه. سرير كبير بأربعة أعمدة يحتل ركن كامل من المحل، مزين بمجموعة من الملايات وتشكيلة من مستلزمات غرفة النوم. كمان غرفة نوم ضخمة موجودة فى جزء ثانى من المكان، ومعها إطار بداخله مرآة كبيرة وتشكيلة من اللوحات على الطراز بـ تحيط بإطارها الغامق الملون. من أغرب الحاجات فى المحل هى أن مافيش أى مساعدة محترفة، ومعظم المنتجات غير مسعّرة ومافيش أى واحد تقدر تسأله، الموضوع كان مزعج نوعًا ما. رغم كده، البضاعة اللى سعرها موجود كانت تحفة. مجموعة من الكؤوس القديمة المنقوشة سعرها 850 جنيه، وطقم كبايات شاى صينى مزين بنقوش صينية وصور سعره 1250 جنيه. بعض الناس ممكن يحسّوا أن أسعار المنتجات المعروضة سعرها غالي، لكن لو بصينا أنها تعتبر تحف، فالأسعار المطلوبة متوقع أنها تكون فى مستوى السعر ده. بوجه عام، المحل يعتبر تجربة لطيفة قوى والقطع الموجودة أكيد هـ تثير حماس أى مصمم ديكور أو أى اثنين متزوجين جديد وبـ يحبوا التحف.

...

بنيتون أوتلت: منفذ بيع ملابس كاجوال بالمعادي الجديدة
اصدرت في: 29/05/2012

في شارع النصر في المعادي الجديدة وعلى الصف المقابل لمطاعم «مؤمن» و«جاد» فيه مبنى صغير مكون من 3 أدوار باللون الأبيض عليه من الخارج شعار «يونايتد كلرز أوف بنيتون» المعروف وكل لما كنا بـ نعدي من هناك كنا بـ نبقى فاكرينه مجرد فرع عادي من فروع بنيتون المنتشرة في أحياء ومولات القاهرة. لكن لما دخلنا المحل لأول مرة عرفنا أنه منفذ بيع لعدد من ماركات الملابس العالمية. وأنت أمام المبنى هـ تشوف في الدور الثاني ملابس وأدوات رياضية خاصة بالنادي الأهلي، أو (الأهلي ستورز) لكن لما دخلنا المحل عرفنا أن الأهلي ستورز أغلق أبوابه للأبد في المكان ده، وأصبحت كل المعروضات موجودة في الدور الأرضي فقط. منفذ البيع ده عنده مجموعة محدودة جدًا من التي شيرتات من ماركة Benetton كانت على ستاند على يمينك أول ما تدخل المحل، كلها باللون الرصاصي وعليهات طبعات ورسوم بسيطة من الأمام وبأسعار من 120 لـ 130 جنيه. أغلب المعروض بالمحل هو تي شيرتات ماركة US Polo باللون الأبيض طبعًا، وفيه بعض موديلات بألوان مختلفة وبأقلام رفيعة بالعرض، لكن الأساسي هو اللون الأبيض وعليه اللوجو الشهير للبولو شيرت من على الصدر. كل التي شيرتات هناك أصلية وهي نفس التشكيلة الجديدة تقريبًا الموجودة في فروع US Polo في سيتي ستارز وغيرها، لكن الفرق في السعر بـ يبقى كبير، يعني اللي هـ تلاقيه في الفرع الرئيسي بـ 800 جنيه، هنا ممكن تلاقيه بأسعار من 400 لـ 500 جنيه. هو في الحالتين غالي طبعًا، بس غالي عن غالي قوي يفرق. والأسعار هنا قليلة كده لأن المفروض أن ده زي منفذ البيع بسعر الجملة أو سعر المصنع، مش عارفين بالضبط، بس اللي متأكدين منه أن الخامات ممتازة والتصميمات شيك جدًا، وأن كل المقاسات موجودة. فيه معروضات قليلة من ماركة Zara وهي عبارة عن بنطلون جبردين بلون غريب جدًا هو خليط بين البرتقالي والبني، وعرفنا أن ده الـ New Collection الصيف ده، وسعره 250 جنيه بدل 500 في زارا. وفيه مجموعة قمصان بولو ومجموعة صغيرة من تي شيرتات Massimo Dutti بسعر 240 جنيه. الأسعار اللي هنا كلها ممكن تنزل لحد 50 % لو رحت وقت العروض والتخفيضات، بس مافيش غير عروض بسيطة على الملابس دلوقتي زي أنك تشتري 2 تي شيرت بولو وتأخذ خصم 10 % أو تشتري 5 تي شيرت وتأخذ واحد هدية. فيه بعض إكسسوارات وشنط سفر بأحجام كبيرة بسعر 650 جنيه بعد الخصم، وفيه كوتشي ماركة Crocs بأسعار من 300 لـ 400 جنيه وموجود بكل الألوان. وفيه صنادل وأحذية بناتي بأسعار 200 جنيه بعد الخصومات برضه. في قسم البنات هـ تلاقي نفس تشكيلة التي شيرتات الموجودة في القسم الرجالي وبنفس الأسعار ويمكن أقل شوية. وفيه مايوهات وملابس رياضية ورغم أن المعروضات في القسم ده قليلة إلا أنها جذابة وأنيقة جدًا. في نهاية المحل فيه قسم للأطفال ومعظم معروضاته من Benetton والأسعار معقولة جدًا. يعني ممكن تجيب أي بنطلون أو شورت بـ 70 جنيه، والتي شيرت والكوتشي من 50 لـ 150 جنيه. يعني في القسم ده بس هـ تحس أنك في منفذ بيع بأسعار خيالية مش في فرع عادي للماركات اللي ذكرناها اللي أسعارها غير عادية. منفذ بيع «بينيتون» عجبنا فيه التنوع في المعروضات والخدمة والحرية في الفرجة وتجربة الملابس، رائق ونادرًا لما تلاقي زحمة. المكان يستاهل زيارة.

...

سنتر بوينت: مول داخل مول سيتي سنتر المعادي
اصدرت في: 04/03/2012

تعودنا مؤخرًا نلاقي ماركات عالمية مش موجودة في أي حتة داخل مبنى معادي سيتي سنتر العملاق الشهير بـ «كارفور». آخر اكتشافاتنا كان مول داخل المول. «سنتر بوينت – Centerpoint» سلسلة محلات لها فروع في كل عدد من دول الخليج والشرق الأوسط، وأخيرًا بقى لها فرعين في مصر، واحد في الإسكندرية والفرع الوحيد في القاهرة موجود في كارفور المعادي. البداية كانت بفرع صغير في البحرين من حوالي 40 سنة وكان فيه ماركة واحدة بـ تُباع في المول وهي «بيبي شوب» بعدها بدأ في التوسع تدريجيًا لحد ما وصل للشكل اللي هو عليه دلوقتي وهو عبارة عن مول مكون من طابقين، بـ يضم 4 ماركات كل منها متخصص في نوع معين من الملابس والأدوات، والماركات الموجودة هي «بيبي شوب - Babyshop» لملابس الأطفال وأدواتهم و«سبلاش – Splash» للملابس الرجالي و«شو مارت – Shoe Mart» للأحذية الرجالي والحريمي والكوتشي و«لايف ستايل – Lifestyle» للتحف والإكسسوارات المنزلية. «سنتربوينت» فتح مكان «زارا - Zara» اللي كان موجود في نفس المكان قبل ما يقفل فرعه، المحل مساحته كبيرة وفيه الدور الأرضي مخصص للملابس والأحذية والدور العلوي فيه أدوات منزلية وأدوات أطفال. الـ 4 ماركات اللي ذكرناهم موزعين بشكل واضح في أركان المول وهـ تلاقي كل ماركة عاملة عروض وتخفيضات خاصة بها بشكل مستقل عن مظلة «سنتربوينت». فيه بعض ماركات ثانية واخدة أركان في المحل زي «دي إن إم – DNM» للأحذية والإكسسوارات و«أديداس» و«بوما». المكان هـ يفكرك كثير بمحلات «إتش & إم – H&M» و«ماكس – Max» اللي سبق وكتبنا عنهم في كايرو360، نفس موديلات الملابس والأسعار وحتى طريقة توزيع المعروضات وطريقة تعامل موظفين البيع. وفيه سمة مميزة للمكان هي أن غالب عليه الطابع الخليجي في بعض موديلات الملابس، لكن في نفس الوقت هـ تلاقي كل التصميمات والأذواق بس هـ تتعب شوية في البحث لأن الأرفف والأركان كثير فعلًا. عجبنا بشكل خاص موديلات «سبلاش» الرجالي الكاجوال (مافيش في المول ملابس كلاسيك) والأسعار كانت مغرية جدًا. بول أوﭭر صوف خفيف بألوان مختلفة بسعر 250 جنيه، والجينز بأسعار من 200 لـ 350 جنيه، وفيه قسم للملابس الداخلية والإكسسوارات الرجالي من «سبلاش» وبما أنه عامل تخفيضات بـ توصل لـ 50 % بـ نرشح لكم زيارة القسم ده لأن الموديلات حلوة والأسعار ممتازة. في «بيبي شوب» في الدور العلوي هـ تلاقي بجانب الملابس وأدوات الأطفال الأساسية فيه أثاثات وتجهيزات الحضانات ونوادي الأطفال، وبرضه فيه خصومات كبيرة يا ريت تلحقوها. «لايف ستايل» فيه ديكورات منزلية وفواحات وشموع شيك جدًا وإكسسوارات وتابلوهات وشنط هدايا ومكياج هدايا لكل الأعمار خاصة من سن 16 لـ 21 سنة. مش هـ ينفع نتكلم عن أسعار كل حاجة في «سنتربوينت» العملاق، لكن يكفي أننا نقول أنك ممكن تعمل جولة تسوق كاملة داخل المكان وما تحتاجش تروح أي محل ثاني، وأي كانت ميزانيتك ممكن تلاقي حاجات على قدها. هـ يلفت نظرك في المكان كمية اللافتات اللي عليها كلمة (Sale) باللون الأحمر، وكأن المكان فتح بس علشان يعمل تخفيضات. لكن ده طبعًا في صالح المستهلك في النهاية. «سنتربوينت» دلوقتي في كايرو، إضافة جديدة لسلاسل المتاجر العملاقة في العاصمة، منتظرين فروع أكثر في المستقبل، وبـ نقول لكم أن المكان بجد يستحق الزيارة.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن