دليل أحداث نهاية الأسبوع: ندوة العريفي وفرقة وسط البلد وبحيرة البجع وبن 10 - الحياة في كايرو Feature - كايرو 360
 







دليل أحداث نهاية الأسبوع: ندوة العريفي وفرقة وسط البلد وبحيرة البجع وبن 10
دليل أحداث نهاية الأسبوع: ندوة العريفي وفرقة وسط البلد وبحيرة البجع وبن 10
اصدرت في: 21/02/2013
ويك إند جديد، جاء بسرعة المرة دي ولا إحنا بس اللي حاسين بكده؟! المهم أن النهارده الخميس وبكرة وبعده أجازة والجو جميل ومشجع على الخروج الصباحي والمسائي، ولقينا أكثر من حاجة نعملها بالنهار الأسبوع ده وده على غير العادة. زي مهرجانات التسوق وكرنفالات الأطفال وعدد من الندوات الصباحية. هـ ندخل في الموضوع على طول.
النهارده في تمام الواحدة ظهرًا هـ يبقى فيه لقاء مفتوح مع الشيخ محمد العريفي في قاعة النهر بساقية الصاوي، الشيخ العريفي أثار جدل بعد زيارته لمصر مؤخرًا وبعد خطبته المؤثرة عن فضل مصر اللي انتشرت بشكل كبير على وسائل الإعلام. الندوة مستمرة لحد الساعة 3 العصر لو حد لسه بـ يقرأ المقال حالًا وعاوز يلحق يروح.
في نفس القاعة لكن بالليل هـ يكون فيه حفل لفرقة وسط البلد بعد فترة غياب عن ساقية الصاوي. الحفل هـ يبدأ الساعة 8:30 مساءً والتذاكر بـ 35 جنيه و30 جنيه لأعضاء الساقية. والحفل بمناسبة مرور 10 سنوات على تأسيس ساقية الصاوي نفسها.
على المسرح الصغير بدار الأوبرا المصرية يعود الفنان وعازف الدرامز يحيى خليل بحفل موسيقي بمصاحبة فرقته وهـ يقدم عدد من أشهر مؤلفاته. التذاكر متوفرة بشباك الحجز.
وعلى المسرح الكبير بدار الأوبرا تقدم فرقة باليه أوبرا القاهرة بمشاركة أوركسترا أوبرا القاهرة الباليه العالمي بحيرة البجع للموسيقار تشايكوفسكي بقيادة المايسترو ناير ناجي وإخراج فني أرمينيا كامل. يعتبر الباليه من الروائع اللي ألفها تشايكوفسكي عام 1887 وعُرضت لأول مرة على مسرح البولشوي في موسكو عام 1887، التذاكر متاحة لدى شباك الحجز.
وعن المعارض الفنية، تم افتتاح عدد من المعارض المهمة الأسبوع ده منها الموجود في جاليري كالا للفنون في الزمالك اللي بـ يستضيف الفنان محمد تمام وبـ يعرض أعماله في معرض بعنوان خلف الحوائط.
من النهارده ولمدة 3 أيام استمتعوا بوحوش الأومتريكس مع البطل الشهير بن 10، اللي هـ يكون معاكم في دار أوبرا جامعة مصر للعلوم والتكنولوجيا MUST، لمزيد من المعلومات عن مواعيد العروض والحجز زوروا رابط الحدث على الفيسبوك.
في مركز درب 17 18 الثقافي الليلة دي هـ يكون فيه حفلة لفرقة المغنى خانة اللي تأسست على يد محمد فايد ونور الدين جمال وناشد الأنصاري. الفرقة بـ تقوم بأداء الأغاني بالطابع الشعبي المعبر، سعر التذكرة 20 جنيه والدخول الساعة 7 مساءً.
ضمن فعاليات الدورة السادسة لملتقى الرسوم المتحركة تم افتتاح معرض أفلام الرسوم المتحركة بمركز طلعت حرب الثقافي بوسط العاصمة واللي بـ يتضمن أعمال رسوم متحركة متنوعة لفناني وطلبة كليات الفنون الجميلة والتطبيقية والمعهد العالي للسينما وشركات الإنتاج بالإضافة لمقتنيات الفنان د. ستالين الرملي. المعرض مناسب للأطفال وللكبار.
بكرة الجمعة يقيم مسرح الساقية للعرائس عرض لفرقة The Beatles يضم مجموعة من أغانيهم في قاعة الحكمة بساقية الصاوي. سعر التذكرة 10 جنيه لأعضاء الساقية و15 جنيه لغير الأعضاء.
ويوم السبت تستضيف القرية الذكية بطريق القاهرة/ الإسكندرية الصحراوي مهرجان اللياقة البدنية El FIT لأول مرة في مصر اللي هـ يجيب لكم يوم مليان بالرياضة والمرح، مع أنشطة مختلفة زي أول ماراثون زومبا في مصر وكمان أنشطة ثانية تناسب جميع الأعمار والرجال والسيدات. تجربة جديدة وفي توقيت مناسب جدًا من حيث الطقس. ادخلوا على صفحة الحدث واعرفوا تفاصيل أكثر.
فيه عدد من الحفلات والمعارض وعروض السينما وحلقات النقاش وعروض فلكلورية، كله على أجندة الموقع لو عاوز تعرف التفاصيل. بس المهم نخرج وننطلق في الشوارع طول ما الظروف تسمح بكده.. أو حتى لو ما تسمحش!
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
21/02/2013
-