ألبان وآيس كريم كافيهات in مصر الجديدة Cairo, Egypt

كافيهات

بينك بيري: آيس كريم الزبادي اللذيذ والصحى فى صن سيتي مول
اصدرت في: 24/02/2015

من ساعة ما اختراع الزبادي المثلج Frozen Yoghurt ظهر على الساحة فى القاهرة وإحنا بـ نعشقه، إحنا رحنا أول فرع فتح له بتاع سيتي ستارز وكتبنا عنه مقال نقدي، وبالتالى أثناء تجولنا فى صن سيتي مول وعيوننا وقعت عليه كان لازم نروح ناخده بالحضن. آيس كريم الزبادي بـ يكون صحى وخفيف على عكس النوع الثاني المعروف، وبـ يكون فيه "مذاذة" كده حلوة تخليك تدمنه، خاصة لو شربته كمان فى "Shakes"، المكان وقت زيارتنا كان فاضى (المول كله عامة ما كانش زحمة)، أحلى حاجة فى ديكور المكان هى الكراسي، رائعة بلونها الأخضر والأبيض، المكان كله بـ يبعث راحة نفسية جميلة بلونه الأبيض المقتبس من لون آيس كريم الزبادي. الموضوع بكل بساطة عبارة عن خطوات: تختار الحجم اللى عاوزه "الأصلى" (كبير بـ 40، وسط بـ 26، صغير بـ 20)، وفيه Options "الأصلى مع إضافات"، "نكهات"، و"نكهات مع إضافات" أسعارها بـ تختلف، وبعدين بـ تختار يا إما الطعم الأصلى اللى هو الزبادى العادى أو بنكهات: الرمان، الكراميل، المانجو، الفراولة، الباشن فروت، الشوكولاتة أو ممكن تمزج اثنين منهم سوا، وتيجي بعدها مرحلة الإضافات، كل إضافة بـ 5 جنيه، لكن لو اختارت 4 إضافات بـ 12 جنيه. غير الآيس كريم فيه عندهم سموزي وShakes وفيه كمان عبوات للتيك أواى. عامة الحجم الصغير بنكهة الزبادي العادي بـ ييجي مع أربع إضافات، وحجم الوسط والكبير بـ ييجي مع ستة إضافات اللى عبارة عن اختيارات كثيرة من الفاكهة: التوت، البلوبيري، البلاك بيري، الأناناس، الكيوي والموز، أو من الشوكولاتة أو المكسرات. طلبنا الحجم الصغير (وهو كافى الصراحة وأكثر لشخص واحد) بطعم الزبادي الأصلى معمول ميكس مع طعم الفراولة، وده الشخص المهذب جدًا اللى كان معانا هو اللى رشحه لنا (ممكن تذوق قبل ما تأخد طلبك) وحطينا عليه بلوبيري مع قطع جرانولا، والثانى طلبناه بالشوكولاتة ممزوج بالطعم الأصلى عليه قطع شوكولاتة كريسبي، الاختيار الأول كان بالنسبة لنا أفضل كثير، طعم الفراولة مع الفانيليا كان أكثر من رائع، بس حسينا كان فيه حاجة ناقصة محتاجة تربط البلوبيري بالجرانولا، صوص مثلًا، بس المكونات كلها فريش وخفيفة ومنعشة، فى حين الشوكولاتة كانت حلوة برضه بس ثقيلة جدًا وما حسيناش فيها بطعم الزبادي المميز، حسينا أنها أقرب للآيس كريم العادى، واللى زود ثقلها اختيارنا لكريسبي الشوكولاتة، كان الأفضل اختارنا إضافة ثانية. كل اللى نقدر نقوله أن ده أفضل زبادى آيس كريم مثلج ممكن تذوقه، وأحلى حاجة هنا أن الموضوع مش بالوزن زي فى أماكن ثانية، لأن الواحد أيده بـ تأكله وبـ يحط حاجات كثيرة وفى الآخر بـ يتفاجئ بالفاتورة، بس هنا الموضوع تحت سيطرتنا، الحاجة الوحيدة اللى مش تحت سيطرتنا هو حبنا للآيس كريم المجمد اللذيذ فى بينك بيري.

...

جيلاتيريا روما: مملكة من الآيس كريم فى صن سيتى مول
اصدرت في: 18/11/2013

مع التوسع المستمر للسلاسل العالمية سواء فى المحلات، المطاعم أو الكافيهات فى القاهرة، الاشتياق للاسم الإيطالى بالفعل ظهر فى كثير من المولات الشهيرة الموجودة فى أنحاء المدينة. "جيلاتيريا روما - Gelateria Roma" الموجود فى الدور الثانى، أسفل السلالم الكهربائية فى صن سيتى مول هليوبوليس، هو المكان الأمثل لإشباع رغبتك فى الاستمتاع بمشروب مثلج أو بولة من الآيس كريم اللذيذ. تخصصهم الحقيقى فى الحلويات المثلجة، خصوصًا أن منتجاتهم بمذاقها الطبيعى يعتبر بديل مميز عند المقارنة مع منافسيهم أصحاب الطعم الصناعى. تصميم الكشك يخطف الأنظار بألوانه الوردى مع الأبيض، مع تقديمهم لترابيزتين صغيرين لإراحة الأقدام المرهقة بعد رحلة تسوق طويلة. المكان الصغير مش بـ يقدم المجموعة الكاملة من المنتجات الموجودة فى فروعهم الكبيرة، لكن فى الوقت نفسه عنده كل المشتهيات المثلجة الضرورية. 12 نكهة من نكهات الآيس كريم، مع توفر الصوص والجرانيتا، منهم فراولة، ليمون، أناناس، شوكولاتة، مستكة، فستق، كراميل، فانيليا، مانجو وحاجات ثانية. بـ يقدموا كمان مزيج من النكهات زى التيراميسو مع الفانيليا/ الكراميل. سعر البولة 8 جنيه سواء فى كوب أو كونو بسكويت. عصائر مثلجة بطعم الليمون، التوت، المانجو أو الفراولة (10 جنيه) دائمًا بـ يدوروا فى ماكينات العصائر، ويتم تقديمهم فى أكواب بلاستيكية متوسطة الحجم بغطاء مقبب. قررنا نجرب بولة من آيس كريم كراميل مع الفانيليا مع كوب من الليمون المثلج. العصير كان منعش جدًا، مع نكهة الليمون اللاذعة، وطبعًا طعمه طبيعى. من حظنا أن الثلج كان مجروش كويس بحيث يقلل من تخفيف طعم العصير. آيس كريم الكراميل والفانيليا اختراع جامد بـ يحتوى على حبيبات كراميل أضافت له قوام رملى مختلف. بالنسبة للآيس كريم نفسه كان خفيف وغنى بالكريمة بشكل ممتاز بدون كثافة أو ثقل. أكثر حاجة أبهرتنا هو قدرة الشركة العالمية على مزج نكهات الآيس كريم بشكل يحافظ على هيئة الحلويات التقليدية المحلية. رغم أنه من الصعب التفرقة بين أماكن الحلويات المختلفة، جيلاتيريا روما قدر يخلق نكهات فريدة بشكل بسيط، بحيث يحقق تجربة ممتعة.

...

يوجيز: زبادي مجمد وكوكتيلات في سيتي ستارز
اصدرت في: 29/09/2013

نادرًا لما بـ نشوف محل بـ يقدم زبادي مثلج خارج المراكز التجارية، وكأن الأكلة دي مرتبطة بجولات التسوق والتمشية بين جدران المولات. بعد نجاح التجربة في مول العرب بدأت مرحلة الانتشار لمحلات «يوجيز – Yoggy's» للزبادي والكوكتيلات والسموزي والبارفيه وفتح أول فرع له في مصر الجديدة في سيتي ستارز. فرع «يوجيز» هنا مكانه متميز جدًا، في الدور الأرضي من المرحلة الأولى بالقرب من محلات سبينيز وفدركرز، والأهم أنه بـ يطل مباشرة على الساحة اللي بـ يتعمل فيها عروض الموسيقى الحية والحفلات في سيتي ستارز،و هـ تبقى شايف المسرح اللي عليه الفرق أو المطربين وأنت قاعد داخل المحل مستمتع بالزبادي بتاعك، وهـ تحس ببعض الخصوصية وأنت عايش جو الحفلة اللي بره. "زيرو فات" أو "صفر دهون" هي الكلمة اللي هـ تقابلها بكثرة أثناء زيارتك للمكان، مكتوبة على اللافتات وموظف البيع هـ يقولها لك كل شوية علشان يأكد على فكرة أن الزبادي صحي تمامًا والسعرات فيه تكاد تكون معدومة علشان لو حد بـ يعمل دايت، بس إحنا عارفين وحضراتكم كمان أن المشكلة عمرها ما هـ تبقى في الزبادي، لكن هـ تبقى في الإضافات اللي على الزبادي من فواكة ومكسرات وشوكولاتة، ومع ذلك أنت ممكن تأخذ الزبادي plain بدون أي إضافات علشان تحقق أقصى استفادة بالتجربة الصحية اللذيذة. هنا هـ تخدم نفسك بنفسك، خذ علبة بلاستيكية من الحجمين المتوفرين وعدي على الماكينات اللي بـ تنزل الزبادي المثلج اللي شبه الآيس كريم وعدي على الكاونتر اللي عليه كل الإضافات واملأ علبتك زي ما أنت عاوز من كل الأصناف، وبعد كده بـ تروح للكاشير علشان يوزن العلبة وكل 100 جرام بـ 19 جنيه. فيه 5 مذاقات لمعجون الزبادي نفسه، البلوبيري والشوكولاتة والفراولة والكاسترد والكلاسيك العادي، وفيه أكثر من 20 إضافة ممكن تزودها على علبتك، فاكهة فريش زي البطيخ والمانجو والرمان والبلوبيري والأناناس، وصوصات الفراولة والكراميل والنوتيلا، وحبات الكريسب والجيلي والـ m&m's والكيت كات، ومكسرات متنوعة وجرانولا وجوز الهند. تجربة أنك تعمل طبقك بنفسك دي على قد ما هي ممتعة على قد ما هي خطرة، هـ تلاقي نفسك مش قادر تقاوم أنك تجرب أكبر عدد من الإضافات ومذاقات الزبادي، وفي الآخر تعمل علبة كيلو إلا ربع مثلًا بـ 150 جنيه! فـ خلي بالك وأنت بـ تملأ علبتك. عملنا علبتين فيهم كل الأصناف الموجودة من غير ما نكرر حاجة في الاثنين، وزن كل واحدة كان 350 جرام تقريبًا، وده متوسط العلبة اللي هـ تعملها بعد ما تحط كل ما لذ وطاب ونوعدك أنها هـ تكفيك وزيادة. الطعم مضبوط جدًا خاصة قوام الزبادي ونسبة السكريات فيه، باستثناء طعم البلوبيري اللي كان شبه الكلاسيك جدًا وكان ناقص نكهة التوت القوية والطعم المزز اللي بـ نأكل زبادي مخصوص علشانها. غير كده كل الإضافات رائعة وبالذات الجيلي والرمان وصوصات الفراولة والشوكولاتة، وكانت تجربة مثالية من حيث الانتعاش ولذاذة الطعم، إحنا بجد بـ نحيي مخترع الزبادي المثلج أو الـ Frozen Yogurt لأنه البديل الأخف والأطعم والصحي أكثر. «يوجيز» بـ يعمل سموزي الزبادي بحجم واحد بـ 30 جنيه وبـ يبقى بالفراولة أو كوكتيل التوت أو النوتيلا، وبـ يعمل بارفيه Parfait الزبادي والشوكولاتة بنفس السعر، وفيه كوكتيلات باردة عادية بـ 23 جنيه، والمشروبات الساخنة زي الأسبريسو واللاتيه والموكا بأسعار من 12 لـ 22 جنيه. تجربة رائعة بس مكلفة شوية في فرع «يوجيز» الجديد في سيتي ستارز، ومكانه خارج الفوود كورت كان إضافة قوية في رأينا.

...

ديبى دو: فواكة وفوندو أسطورية فى هليوبوليس
اصدرت في: 27/08/2013

مصر شهيرة بفواكهها اللذيذة اللى تعتبر من السلع الأساسية مش مجرد رفاهيات. "ديبى دو - Dippie Doo" الموجود فى شارع أنقرة فى هليوبولس بـ يحتفل بالفواكه الرائعة وبـ يقدم مجموعة ممتعة من ابتكارات العصير اللذيذة. "كافيه الفواكة" صغير حجمًا بس فى نفس الوقت متسع، بديكورات ألوانها ظريفة متدرجة بين الأخضر الفاتح، والأصفر والأحمر مع ترابيزات متجانسة وكراسى صغيرة للناس اللى تحب تقعد فى المحل. مكان تحضير الطلبات ومكان الأكل الاثنين فى منتهى النظافة ورغم أن العصائر مغطاة علشان تحافظ على نضارتها، الموظفين برضه كانوا لابسين قفازات لضمان أكبر قدر من معايير النظافة. بجانب المشروبات الخفيفة من الفواكة والزبادى منخفض السعرات، الحلويات المسكرة تشمل وافلز (15: 25 جنيه)، شيش فواكة مغطى بالشوكولاتة (8.99 جنيه) وشوكليت فوندو (19.99 جنيه: 23.99 جنيه). كمان الآيس كريم (14.99: 21.99 جنيه) والزبادى المثلج (15.99 جنيه: 22.99 جنيه) بـ يتقدموا مع مجموعة كبيرة من الإضافات، من قطع الشوكولاتة، الجرانولا والويفر لغاية الفواكة الطازجة. مجموعة متنوعة من الصودا، والعصائر الفريش، مشروبات الزبادى والمياه المحلاة بالفواكة كلها متوفرة فى ديبى دو. عصير البلاك بيرى الطبيعى (19.99 جنيه) كان قليل جدًا لكن طعمه طازج، لاذع وطبعًا زى أى بلاك بيرى، مسكر بزيادة. ما قدرناش نقاوم شكل كوب choc o' doo بشوكولاتة البندق (24.99 جنيه)، مع اختيارك من الكنتلوب، الكيوى، الموز والعنب الأخضر. الكوب البلاسيتك الكبير كان مليان صوص ثقيل من الشوكولاتة بالبندق وقطع أوريو مقرمشة وفى القاع شوكولاتة بيضاء. كان من الصعب نخلص الكوب بسبب دسامته، مهما حاولنا. بعدها، طلبنا وعاء صغير من الزبادى المثلج مع ثلاث إضافات (18.99 جنيه)؛ قطع شوكولاتة بالزبدة، قطع مانجو وجرانولا مقرمشة. الزبادى المثلج الطبيعى كان لذيذ وغنى، لكن الواضح فى الموضوع أن كمية الزبادى كانت أكثر بكثير من الإضافات. "ديبى دو" بـ يجمع بين فواكة مصر الشهيرة بطعمها الصحي اللذيذ مع الحلويات الرائعة زى الشوكولاتة وغيرها، والنتيجة هى سناكس جميلة شهية.

...

كافيه سوبريم: عيش جو ثاني فى الكوربة
اصدرت في: 20/03/2013

لأن زيارتنا الأخيرة لفرع "كافيه سوبريم" فى مول العرب من فترة كانت استثنائية وكنا مبسوطين فيها جدًا من جودة الأكل، والمكان وحاجات كثير ذكرناها، وبالتالى كنا في قمة السعادة لما شفنا فرع ثاني له فى الكوربة وإحنا ماشيين بالصدفة، أول حاجة عملناها بدون تفكير. ركننا العربية ونزلنا قعدنا فيه. في "كافيه سوبريم - Café Supreme" أول حاجة هـ تشدك المنطقة الخارجية الواسعة والمليانة شمسيات وناس بـ تشرب شيشة أو قهوة أو بـ تستمتع بأكلة خفيفة مع أصدقائها، غالب عليه اللون البني المحروق لكنه على عكس الانطباع الأول اللى ممكن يوصلكم شيك جدًا باللوجو المميز له بحجم كبير. فيه منطقة خارجية مفتوحة دي فيها تدخين، ومنطقة بالداخل فيه منها للمدخنين وغيرها لغير المدخنين، الأماكن مفتوحة على بعض من خلال فتحات فى الحوائط أو فواصل زجاج، ده غير أن فيه نواحي من المكان واجهتها زجاج، ثلاجة العرض موجودة جوه على الشمال. ولأننا لنا سابق خبرة مع المنيو أخذنا المرة دي أصناف ما جربناهاش فى الفرع الأول، طلبنا سوبريم بيتزا (39 جنيه)، وسموكد تركي ساندويتش "بانيني" (43 جنيه) ونزل معاها شوربة مشروم (أو سلاطة على حسب اختيارك)، وكاليفورنيا سلاد (36 جنيه) فيها خس وجرجير وخرشوف وعيش محمص مكعبات وبرضه مكعبات جبنة بيضاء، وزجاجة المياه الصغيرة بـ 6.75 جنيه. مافيش كلام على المكونات كلها، طازجة وخفيفة والمزج بينها له طعم ثاني هنا، السلاطة كانت عالمية ومختلفة، الشوربة كمان كانت جيدة وفيها قطع مشروم صغيرة، السموكد تركي كان حلو ومكوناته كثيرة وبرضه طازجة، إلى جانب المنيو العادية فيه منيو للسوشي فيها اختيارات أكيد هـ تشدك أنك تجربها لأنها مش موجودة فى أماكن أخرى.. بس إحنا لنا زيارة ثانية علشان نجربها. فى المشروبات جربنا هوت شوكليت (Dark) (23 جنيه) وفيه بالشوكولاتة البيضاء كمان، وأسبريسو كراميل سوبريمو (حجم M بـ 28 جنيه)، الهوت شوكولات كان لطيف بس فيه اللى ذقناه أفضل منه، والأسبريسو كان لطيف برضه بس كان فيه حاجة غريبة أن قطع أسبريسو مش مطحونة فيه كنا حاسينها فى فمنا! للأسف وقتنا كان ضيق وكان لازم نمشي فى الوقت اللى أصحابنا كانوا بـ يشدونا من أمام ثلاجة عرض الحلويات المغرية بأنواع كثيرة قوي لازم هـ نعدي فى يوم نجربها من تشيز كيك وغيرها. "سوبريم" لهم موقع على الإنترنت (لكن لسه مش شغال)، و صفحة على الفيسبوك مليانة معلومات وصور ممكن تدخل عليه تعرف معلومات أكثر، المكان بـ يضيف خدمة فقط، وللأسف مافيهوش إنترنت Wi-Fi، لكن القعدة هناك مافيش كلام عليها.. بجد جوها مختلف هـ تحس فيه أنك فى المصيف.. والتغيير مطلوب دائمًا.

...

شيري أون توب: زبادي مثلج وكب كيك في مصر الجديدة
اصدرت في: 18/10/2012

بعد جولة تسوق مرهقة في سيتي ستارز بمحلاته اللي ما بـ تخلصش، كان أحسن حاجة نعملها نأكل أو نشرب حاجة مثلجة. زبادي مثلج منعش وحتة كب كيك فريش ومسكرة! هو ده الكلام..«شيري أون توب» اللي ظهر أمامنا في الدور الأرضي أصبح منافس خطير لمحلات الحلويات من النوع ده في كايرو.محاط بعدد من الكوفي شوب اللي بعد الفوود كورت اللي تحت، هـ يلفت نظرك بترابيزاته وكراسيه البيضاء اللميع اللي زي ديكورات العيادات، واللافتات المكتوب عليها بالوردي الفاتح. والمنيو الكبير اللي محطوط على الحائط بـ يوضح أن ده مش مجرد مكان عادي لتناول القهوة، لإنما بـ يقدموا تشكيلة كبيرة من نكهات الزبادي المثلج والكب الكيك المرصوص بطريقة مغرية على نهاية الكاونتر.أخذنا منيو صغير وقعدنا نتأمل الاختيارات وإزاي ممكن يكون طبقنا المثالي. وفجأة ظهر واحد من موظفين البيع في المحل ومعاه عينات من الزبادي علشان نتذوقها ونعرف نختار. الأولى كانت هاوايان ديلايت والثانية كانت بطعم عجين كيك. المذاقات كانت دقيقة بطريقة ما حصلتش، سواء في الفاكهة أو نسبة السكر وبالذات لأننا ماحسيناش بطعم القرمشة اللي بـ نلاقيه أحيانًا في الزبادي لما بـ يبقى مسكر.«شيري أون توب» بـ يقدم أحجام صغير ومتوسط وكبير وحجم عائلي من الزبادي. وممكن تحط من 4 لـ 6 إضافات على كل كوباية، والأسعار بـ تتراوح بين 16 لـ 67 جنيه. ولما جربنا قطعة الكيك بطعمها الخطير قررنا نعمل طبقنا من الكيك والزبادي المثلج من الحجم الوسط مع 6 إضافات (42 جنيه) وبدأنا نتفرج على أنواع الإضافات المعروضة تحت زجاج الكاونتر واختارنا في النهاية الكراميل وافلز وبسكويت الأوريو وقطع شوكولاتة الكيت كات وحبات الـ M&M وكرسبي البسكويت، ودلوقتي إحنا مقتنعين اننا عملنا أجمل قطعة كيك بالشوكولاتة "مثلجة" ممكن تحصل.الكب كيكس هنا بـ تيجي كل يوم فريش، فكان لازم نجرب حاجة تانية من الفريش ده، يعني مثلا واحدة كب كيك بالفانيليا (12 جنيه) ودي كانت طريقة والكيك الاسفنجي غني بالطعم وخفيفة في نفس الوقت وحجمها معقول جدًا وعليها آيسنج زبدة الفانيليا من فوق. وكنا سمعنا ناس بـ تشكر في كب كيك الفراولة (15 جنيه) والجزر (14 جنيه) والأوريو (16 جنيه) وده خلانا متأكدين أن المكان ده هـ يبقى منافس قوي جدًا لمحلات الكب كيك الموجودة في القاهرة في حالة أنه يعمل دليـﭭري.«شيري أون توب» بـ يعمل سموزي الزبادي المثلج بجانب الشاي والقهوة وطبعًا المياه المعدنية. بس الغريب أنهم مش بـ يبيعوا أي مياه غازية اللي كنا محتاجينها فعلًا بعد رحلة التسوق المتعبة. المحل إضافة حقيقية لمحلات الكب كيك اللي انتشرت بشكل جنوني في العاصمة مؤخرًا، بس الجديد هنا أنهم بـ يعملوا افتكاسات في الأصناف اللي بـ يقدموها. وزي ما الشعار اللي هما حاطينه بـ يقول: خذ لك "زبادي مثلج عالماشي" أو "Frozen Yoghart your way".

...

إكس- شيكس: مشروبات مثلجة لمقاومة الحر فى هليوبوليس
اصدرت في: 13/06/2012

فى حر القاهرة الرهيب، المشروبات الباردة المُنعشة اللى بـ تمنع الجفاف عن جسمك دائمًا بـ تكون محل ترحيب. فى منطقة شيراتون هليوبوليس، «إكس- شيكس» محل صغير بـ يقدم مشروبات باردة. التصميم بالداخل مش حلو، ملابس الموظفين مليانة بُقع. ده خلّانا نشُك، لكن كل الشكوك راحت لما وصلت المشروبات. كاونتر كبير موجود فى نصف المحل بـ يقسّم المكان الصغير لجزئين: الأول للعملاء علشان يشوفوا المنيو ويطلبوا مشروبهم، الجزء الثانى موظفين بـ يشتغلوا بسرعة يروحوا ويرجعوا بين المحل والغرفة الخلفية اللى فيها بـ يتم تحضير المشروبات. رغم أننا ما شوفناش اللى بـ يحصل الناحية الثانية، لكن شوفنا من شباك صغير أن المكان عبارة عن منطقة متبلّطة بسيراميك أبيض وقدرنا نسمع صوت الخلاطات والثلّاجات وهى بـ تتفتح وتتقفل. منيو إكس- شيكس فيها اختيارات كثيرة من العصائر الطبيعية الصحّية (6 جنيه). لو زودت 1 جنيه، ممكن تضيف حليب. كمان الكوكتيلات (8 جنيه( موجودة، لكن أنت اللى تحدد إيه نوع الفاكهة. عصير الكيوى كان طعمه فيه مزازة جميلة. كمان المانجو والبطيخ كويسين، لكن مشروبنا المفضّل هو الفراولة. تقدر كمان تضيف بولة أيس كريم بـ (2 جنيه). خليط الزبادى مع المانجو والفراولة موجود بـ (8 جنيه). كمان ممكن تطلب شاى (3 جنيه)، وقهوة (4 جنيه) وكابتشينو (5 جنيه)، وموكّا (6 جنيه) أو هوت تشوكلت (6 جنيه). بعيدًا عن المشروبات الصحية إحنا بـ نحب نشرب إكس- شيكس علشان مجموعة الـ "كاندي شيكس" اللي ممكن تدمنها. سنيكرز شيك (16 جنيه) خصوصًا، لكن باقى الحاجات الموجودة بـ تكون فى نفس المستوى. كمان حلويات ثانية زى كيت كات، وبونتى، وتويكس، وفيريرو روشيه ومارس. المشروبات بـ تيجى فى كوباية بلاستيك مع غطاء، مكونات الشيكس صعب تعرفها، لكنها بـ تعطى طعم قطع الشوكولاتة الحقيقية لكن فى شكل سائل. رغم أن مشروبات الشيك بـ تكون مسكّرة شوية، لكنها ممتازة علشان تزود طاقتك. مع 1 جنيه زيادة، تقدر تزود آيس كريم. مشروبات إكس-شيكس كبيرة وبـ تأخذ وقت علشان تخلص، لكن تأثيرها المنعش بـ يظهر بسرعة. أكيد ده خيار هائل لو نفسك تشرب حاجة مسكّرة تسيبك فترة وأنت منتعش. لكن لازم نحذرك، احتمال أنك تحتاج تروح الجيم علشان تعوض كل اللى عملته ده.

...

بينك بيري: حلوى زبادي الآيس كريم فريش في سيتي ستارز
اصدرت في: 30/01/2012

على رغم أنه مش أول محل لآيس كريم الزبادي أو الزبادي المجمد يفتح في القاهرة، ولكن بإجماع من ناس كثير «بينك بيري - Pinkberry» هو المحل الأصلي لسلسة المحلات اللي بـ تقدم آيس كريم الزبادي. «بينك بيري» أخذ سبع سنوات علشان يسيطر على العالم كله بنكهات الزبادي الغنية بتاعته. هو دلوقتي مفتوح في مصر هـ تلاقي أول فرع له في المرحلة الثانية في «سيتي ستارز» أمام «سيج - Segue». هـ تأخذ بالك من المحل من بعيد علشان أضواءه البراقة واللامعة وطبعًا الطابور اللي مش بـ يخلص أمامه، إحنا حسينا أن العاملين هناك بـ يشتغلوا جامد علشان يخلصوا الطابور اللي أمام المحل. مكان «بينك بيري» من الداخل لونه أصفر وبمبي لامع، ممكن تقعد بالداخل أو في التراس الصغير، أو ممكن تطلب تيك أواي. وكمان المهم أنك ما تكونش شخص متردد لأنك إما تروح هناك هـ تلاقي اختيارات كثيرة وقرارات كثيرة هـ تعملها، يعني في الأول هـ تختار النكهة اللي أنت عاوزها، ممكن تختار من نكهات الزبادي الأصلية وممكن تختار نكهة الرمان، المانجو، الشوكولاتة، جوز الهند أو الفاكهة، وبعد كده هـ تختار الحجم اللي أنت عاوزه سواء كان صغير، كبير، وسط، وبعدين هـ تختار الإضافات اللي هـ تضيفها عليه. حجم صغير بنكهة الزبادي العادي بـ 28 جنيه وبـ ييجي مع أربع إضافات، حجم الوسط بـ ييجي مع أربع إضافات وهكذا. فيه أنواع كثيرة قوي للإضافات علشان تختار منها، فيه فاكهة كثيرة زي التوت، البلوبيري، البلاك بيري، الأناناس، الكيوي والموز. وممكن كمان تطلب قطع وافلز، أو حلوى جيلاتينية وكمان أنواع مختلفة من الشوكولاتة. إحنا طلبنا نكهة الزبادي العادي مع قطع الراسبيري، البلاك بيري، الكيوي والبلوبيري. طعم الزبادي نفسه كان لذيذ جدًا وكمية الفاكهة كانت كثيرة. الفاكهة كان طعمها فريش رغم أننا شكينا أنها ممكن تكون مستوردة. الخبر الحلو أن «بينك بيري» ينفع في الدايت، لأن لو طلبت الحجم الصغير من الزبادي العادي مع الفاكهة بـ 140 سعرة حراري ومافيهاش أي دهون زيادة وده بـ يخليها أكلة خفيفة صحية. إحنا كمان جربنا الحجم الصغير من الزبادي بنكهة الشوكولاتة بـ 32 جنيه وعليه فستق، أناناس، قطع شوكولاتة بيضاء مبشورة وراسبيري. نكهة الشوكولاتة كانت واضحة في الزبادي لكن كان خفيف على عكس أي حلوى بالشوكولاتة بـ تخليك مش قادر تتحرك بعدها. مرة ثانية الإضافات كانت عليه كثيرة جدًا وخاصة الفستق اللي عمل مزيج لذيذ مع الشوكولاتة. آيس كريم الزبادي لذيذ جدًا في «بينك بيري»، لكن لازم ننصحك أنك تأخذ طلبك تيك آوي علشان المكان مش مجهز قوي وبـ يحاول أنه يضيف لمسة عصرية عليه. لو رحت لأي فرع من فروع «بينك بيري» هـ تعرف أنهم ممكن يعملوا حاجات أحلى من كده.

...

ديري كوين: سلسلة جديدة للآيس كريم والأكلات السريعة في سيتي ستارز
اصدرت في: 20/10/2011

رغم الظروف الصعبة اللي بـ تمر بها البلاد إلا أن ده ما منعش أن سلاسل محلات عالمية أنها تستمر في فتح فروع وأسواق جديدة في مصر زي سلسلة «ديري كوين – Dairy Queen» اللي فتحت مؤخرًا في سيتي ستارز مول واختصارها DQ وهي -للي مش عارف- سلسلة كافيهات أمريكية مشهورة بالآيس كريم بالمذاقات والمكونات المختلفة وبـ تقدم مأكولات سريعة. موجود في المرحلة الثانية من المول في ساحة الطعام الجديدة، وسهل أنك تأخذ بالك منه لأنه قريب قوي من «ماكدونالدز». واليافطة مكتوب عليها "DQ Chill & Grill" يعني ممكن ناس كثير ما تعرفش أن ده هو «دايري كوين». وقت زيارتنا للمكان كان واضح أن الموظفين في المحل كانوا متحمسين ومتعاونين جدًا، لكن باين عليهم أنهم لسه في فترة تدريب وكان المشرف بتاعهم بـ يوجههم طول الوقت وبـ يقول لهم يعملوا إيه ويقولوا إيه أمامنا. مافيش منيو مطبوع، بـ تقرأ الأصناف من المنيو الموجود خلف الكاونتر. المنيو بـ يضم بعض الأكلات الثابتة المشهور بها المحل زي Flame Thrower جريل برجر بحجم 2/1 باوند والمشروم سويس جريل برجر وساندويتش الدجاج بالإضافة إلى باسكت الجمبري المقلي المقرمش وساندويتشات الهوت دوج الـ Iron Grill اللي زي البانيني المميز للمحل. جربنا كومبو الجريل برجر الـ 2/1 باوند بالجبنة (32 جنيه) ودفعنا جنيه زيادة علشان المشروب وما كناش فاهمين هو كومبو إزاي! وجربنا ساندويتش شرائح الرومي المضغوط على الجريل بـ 29 جنيه وإضافة جنيه للمشروب برضه، ومعاهم بطاطس بالجبن الحارة بـ 20 جنيه. أولًا البطاطس بالجبنة كانت محبطة جدًا، يعني بدل من تل الجبنة السايحة الدسمة اللذيذة والبيف الحار على البطاطس اللي إحنا توقعناه، جاء لنا كمية قليلة من الجبنة الشيدر وكام قطمة من البيف هنا وهناك وما حسيناش بطعم الجبنة والمكونات ما كانتش مخلوطة بشكل كويس. برجر الجريل مع الجبنة جاء لنا حرارته معقولة بنفس طعم صوص المايونيز اللي جربناه في مطاعم برجر ثانية، واللحم نفسه كان سميك ولذيذ لكن في نفس الوقت ما حسيناش بفرق كبير بينه وبين البرجر في أي سلاسل محلات برجر ثانية. ساندويتش الرومي المضغوط على الجريل أو Turkey Iron Grill كان صحي أكثر من كونه أي حاجة ثانية علشان كله معمول على الجريل والعيش كان محمص كويس، وصوص المايونيز كان شبه دريسنج الـ Thousand Island والجبنة السايحة ما أضافوش أي إضافة لطعم الساندويتش اللي حسيناه ممل لكن ميزته الوحيدة أنه كان صحي أكثر من أي أكل ثاني في المطعم. لكن بالـ 30 جنيه اللي دفعناها كان ممكن نجيب حاجة ثانية دسمة وغنية أكثر في الزيارة القادمة. الأكلات السريعة ما كانتش على المستوى المطلوب، لكن كان لازم نجرب منيو الحلويات اللي كان فيه آيس كريم بليزارد Blizzards الماركة المسجلة الخاصة بـ «ديري كوين» بسعر 13 جنيه للحجم الصغير بمذاقات الكيت كات والمانجو بجوز الهند والموز. طلبنا آيس كريم بإضافة قطع شوكولاتة بزبدة الفول السوداني أو الـ Reese's وكان لذيذ ومخلوط كويس لكن قطع الـ Reese كانت قليلة، والآيس كريم كان باين فيه طعم اللبن بزيادة. طلبنا كمان التشيز كيك بليزارد بالفراولة وكان مش حلو للأسف وطعمه كان فراولة فقط من غير أي تشيزكيك تقريبًا. كان فيه حلويات ثانية زي البانانا سبليت (23 جنيه) براونيز أوريو (23 جنيه) والـ Pecan mudslide أو آيس كريم المكسرات المشهور في «دايري كوين» وسعره 21 جنيه، وكان معمول في كوباية بلاستيك زي الصنداي بتاع «ماكدونالدز». فيه مشروبات زي فريز الفواكة (11 جنيه) بالبرتقال والفراولة والتوت، وسموزي الفواكة (14 جنيه) للحجم العادي، وأخيرًا المولاتيه بـ 15 جنيه. يمكن إحنا كبرنا وأصبحنا مش قادرين نتقبل أمور كثيرة مستحدثة رغم أنها بقت جزء من الواقع وحقيقية، لكن علشان تدفع 21 جنيه في علبة آيس كريم صغيرة كانت صدمة حقيقية بالنسبة لنا! لأننا فاكرين أن من وقت حاسين أنه قريب لما كنا بـ نجيب أتخن آيس كريم في البلد كان بـ 10 جنيه فقط، واضح أننا عجزنا فعلًا! دفعنا 92 جنيه شاملة الضرائب في وجبتين لفردين والبطاطس بالجبنة؛ فلوس كثير على وجبتين يا دوب معقولين!

...

ميلك بار: ميلك شيك وسموسيز منعشة في سيتي ستارز
اصدرت في: 18/09/2011

بعد يوم طويل من اللف والدوران في سيتي ستارز، رجلنا ما كانتش شايلانا وبطننا بدأت تعلن حالة العصيان وبدأ صوتها يعلا، اتجهنا لمنطقة الأكل Food court الجديدة هناك (فيه منطقتين) وطلبنا أكلنا وبسطنا نفسنا، لكن طول ما إحنا قاعدين نأكل كان شادد نظرنا محل صغير لونه بمبي على يمين مدخل منطقة الأكل بعد «أنطي أن – Auntie Anne’s» بـ يعمل مشروبات مخفوقة ساقعة وسموسيز اسمه «ميلك بار – Milk Bar». ما ترددناش نروح نجرب، الموضوع كان مغري جدًا، كشك «ميلك بار – Milk Bar» الصغير لونه بمبي واللوجو بتاعه بالإنجليزي ولونه موف، على جنب الكشك فيه تصميمين للميلك شيك والسموسيز اللي بـ يقدموها وفيه شكل لشلال من اللبن متوظف حلو، واللي عرفناه بقى أن ده مشروع عاملاه شركة "لبنيتا" بـ تستخدم فيه اللبن كمكون أساسي لمنتجاتها، من جوه الديكور عامل زي مطبخ صغير فيه خلاط وأرفف عليها المكونات من كورن فليكس وبسكويت الأوريو وزجاجات صوص الشوكولاتة والآيس كريم في ثلاجة والنكهات بتاعة العصائر في عبوات، طلبك بـ يتحضر أمام عينيك لدرجة أنك ممكن تعرف هو بـ يتعمل إزاي خطوة بخطوة. "ميلك بار" عنده أصناف كثيرة بـ يقدمها: سحلب ميلك بار (أول مرة نشوف سحلب معمول زي الميلك شيك)، مشروبات باردة، شوكولاتة فرابيه، موكا فرابيه، ستيكي توفي فرابيه، سموزي (مانجو وفراولة وجوافة)، أوريو شيك، ميلك شيك، مزيج الرايب بالفواكة، مزيج الزبادي بالفواكة، فلاك شيك، وأخيرًا نافورة الشوكولاتة (عبارة عن مزيج من قطع المارشملو والفاكهة الطازجة المغطاة بالشوكولاتة). الأسعار بـ تتراوح من 10 إلى 20 جنيه أقصى حاجة، وفيه آيس كريم خالي الدسم بـ 7 جنيه، طلبنا أوريو شيك وفلاك شيك (20 جنيه الكوب، وهو عبارة عن آيس كريم شوكولاته ولبن مع الكورن فليكس) المشروبات بـ تقدم في كوب شفاف وأحلى حاجة بـ يحط لك شاليموه حلزوني ضخم منه ألوان كثيرة وشكله حلو قوي. المشروبات بصفة عامة هناك منعشة وطعمها رائع، طفت سخونة الأكلة اللي أكلناها قبلها وروتنا، والكباية ما كانتش عاوزة تخلص، والفلاك شيك كان رائع لما تأكل معاه قطع الكورن فليكس المقرمشة، بجد كان خاتمة جامدة جدًا ليوم طويل ومرهق. بـ ننصح ما تفوتوش في زيارتك القادمة لسيتي ستارز.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول